Amarku 8

Eyesu a vgi moare ezbienyi

1Ambla fi nga eshki ehwõ e ba e shki okro Eyesu. Omba moa a wo ekplokyeŋ ba ori ma mbo, Eyesu a bzi moanwyeotum baŋ a lu mi le, 2Eshki moarehwi e wo me ayiekŋe e gre eshri okyku eshi moa a wo ahe pa la me olum ba otra a mo, nga algo mo a khwo. 3O wo ba ame e da mo a gre odne embyembyle le, moabze a kpu embyle ozhẽ okyku eshi moabze a zgi ogyugyuŋ a ba. 4Moanwyeotum baŋ a zhĩ ŋa a lu mi le, Moa á kpo anyu á ba a hwiŋ algo la á ba a tse moarehwi nzenze eka he akla ahe? 5Eyesu a zhĩ mo a lu mi le, Agimi e wo agbrotsa ahrẽ e ma? Moa a tno ŋa ma a lu mi le, Agi e wo agbrotsa afoha e ma. 6Eyesu a da moare mvye a dzu obiŋ. A sko agbrotsa afoha a vye Ahogbrẽ a khwo nga a gʼba lo. A shri lo a da moanwyeotum baŋ nga moa a yga a gʼba eshki. 7Ela atsakyeŋ e wo ma, Eyesu a vye Ahogbrẽ okyku lo a khwo nga a shri lo a da moanwyeotum okyku o da mo a gʼba eshki lo. 8Moare a ri algo nga a ra. Moare la a ri lo, a wo ezbienyi. 9Moanwyeotum a pla ekplo la e ra, e bli aksu afoha. Eyesu a kyu eshki abgo a khwo nga, 10ebuebu aŋa pa la moanwyeotum baŋ moa a gre amgblami a gre obiŋ ba moa a bzi lo ma Edlamanuta.

MoaEfarisi a zhĩ okyku ekʼpo ba Ahogbrẽ

11MoaEfarisikyeŋ a ba okro Eyesu okyku o kla odlo ka la ŋa. Moa a klo o kpyi ŋa. Okyku eka he moa a klo o daŋ a kpo ekplo egbregbre la e tsa ekʼpo ba Ahogbrẽ. 12Eyesu a ta agyim nga a zhĩ mo a lu mi le, Okyku eshi agimi arehwĩ ba ekplu hi, e klo o ka ayakplo egbregbre ba ekʼpo Ahogbrẽ? Ame e lu e da gimi, agimi é ka lo mbo. 13Ambla he nga Eyesu a dzu moaEfarisi a zga nga a gre amgblami a bmyi atam a gre ongre ohwõ.

Eyist ba moaEfarisi ta la Ehirudu

14Moanwyeotum ba Eyesu a gre esõ a ghre a sko agbrotsa mbo. Agbrotsa la a wo pa la mo amgblami a gre akyeŋ mbo. 15Eyesu a nyuŋ moanwyeotum baŋ a lu mi le, E nyuŋ e kpo-kpo ta la eyist ba moaEfarisi, ta la e ba Ehirudu. 16Moanwyeotum a lu ta la emo a lu mi le, Eyesu a lu ka la gi eka he okyku ba agi e shri agbrotsa mbo angyiŋ. 17Eyesu a ka odlo moa a lu ta la emo a bmye nga, a zhĩ mo a lu mi le, Okyku eshi agimi e lu ba agbrotsa a wo ma mbo? Agimi e ka ekplo ba ame e lu e bmye mbo? Agimi e wo okaobmye ma mbo eka he angyiŋ? 18Agimi e wo ayi ma, ambo agimi e ka la lo mbo? Agimi e wo la atuŋ ma, ambo agimi e gno la lo mbo? 19Omba ame e gʼba agbrotsa atno okyku o vgi moarehwi ezbietno, ekplo la e ra e bli aksu ahrẽ? Moa a tno ŋa ma a lu mi le, Aksu otsko. 20Eyesu a zhĩ mo a lu mi le, Omba ame e gʼba agbrotsa afoha okyku o vgi moare ezbienyi, ekplo la e ra e bli aksu ahrẽ? Moanwyeotum a tno ma a, lu mi le, Aksu afoha. 21Eyesu a zhĩ mo a lu mi le, Agimi e ka e bmye a mo ma?

Eyesu a shaŋ avgayi osku ba Ebetseda

22Eyesu pa la moanwyeotum baŋ a ba Ebetseda nga moarekyeŋ a shri avgayi a shri a kom ŋa, moa a vẽ ŋa okyku o daŋ a tka ŋa. 23Eyesu a vu avgayi lo obgo nga a zgi ka la ŋa a sku anwye osku lo. Ambla baŋ a ta akyi a ygi alom lo ayi a khwo nga, a tka ayi alom lo abgo baŋ nga a zhĩ ŋa a lu mi le, Aŋo o ka ekplokyeŋ? 24Avgayi a tno ma a lu mi le, Ame e ka moarehwi eka akiki, moa a la a dzi. 25Eyesu a sa a bla a tka ayi alom lo. Ambla he nga a ka okro dzo, nga ayi baŋ a hwile, a ka ekployaŋ a mbo zhezheŋ. 26Eyesu a lu ta la alom lo a lu mi le, O bla o yi anwye osku lo mbo, ambo o yi odne tsoŋ.

Ebitru a ka Eyesu a bmye

27Ambla he nga, Eyesu pa la moanwyeotum baŋ a kso a gre anwye esku ba Esizariya obiŋ ba Efilibi. Omba moa a wo ozhẽ nga, Eyesu a zhĩ moanwyeotum baŋ a lu mi le, Moare a la a bzi me ma ayi angyiŋ? 28Moa a tno ŋa ma a lu mi le, Moabze a la a lu mi ma aŋo o wo Eyohana la a kpo abaptisma, nga moabze a la a lu mi ma aŋo o wo Eliya, moabze a la a lu mi ma aŋo o wo akyeŋ eshki moarehwi ba Ahogbrẽ a hom otum. 29Eyesu a zhĩ mo a lu mi le, Agimi e la e bzi me ayi? Ebitru a tno ma a lu mi le, Aŋo o wo Emisiya#A ba Ahogbrẽ a sla. angyiŋ. 30Eyesu a shĩ moanwyeotum baŋ a lu mi le, Agimi e lu e da arekyeŋ ba ame e wo Emisiya mbo.

Eyesu a lu eka moa á kpo ŋa ewu nga a bga ŋa

31Eyesu a nye moanwyeotum baŋ a lu mi le, Ame Anwye Arehwĩ, o dzu omgbybi ba ame é kpo ewu abgo moandakʼpo, pa la moandakʼpo olu ba Ahogbrẽ, pa la moa la a nye odaŋ. Moa á bga me nga, ambla elum etra nga Ahogbrẽ á kso me ongybi. 32Eyesu a tsa mo odlo he lo zhezheŋ. Ebitru a gre a yi a ka Eyesu agbakyeŋ nga a shrom ŋa, a lu mi le, Ekplokyeŋ é kpo ka la ŋo mbo. 33Eyesu a zhiŋ ayi a ka moanwyeotum baŋ nga a shrom Ebitru a lu mi le, Aŋo Eshitaŋ, o kye o sku me, aga boŋ a wo a ba moarehwi angyiŋ, a wo a ba Ahogbrẽ mbo.

34Eyesu a bzi eshki pa la moanwyeotum baŋ nga, a lu mi le, Are la a klo o lu me ma, o dzu omgbybi baŋ a shri eshri baŋ mvye a di nga a shri egŋe aki baŋ, nga a lu me ma. 35Are la a klo o kpo ekployaŋ a mbo okyku ohwihwiŋ eshri baŋ sha le, á kpu. Ambo are la a shri eshri baŋ a di okyku me, ta la o nyum oshpa me le, á hwiŋ esõ. 36O wo ba arehwĩ a hwiŋ oraŋ obiŋ hi mvye, ambo o wo ba esõ baŋ é ba e yla le, a wo akplokyeŋ angyiŋ? O wo akplokyeŋ tsitsi a mbo mbo. 37Ekplokyeŋ e wo ma ba are á shri á di okyku o daŋ a hwiŋ esõ mbo. 38O wo ba arekyeŋ a kpo anzi okyku me ta la odlo me omba ba odlobi nzenze he lo le, Anwye Arehwĩ á kpo anzi okyku are he lo, onda baŋ á ba a ba la ayimom ba esesla ba Adaŋ, pa la moanwyeadga ba Ahogbrẽ.

Currently Selected:

Amarku 8: EGONT74

Highlight

Copy