Amarku 9

1Eyesu a sa a lu mi le, E gno, moakyeŋ eshki hi á kpu mbo, o wo le moa á ka Oreŋ ba Ahogbrẽ la o ba la ekʼpo ayga dne.

Ozhiozhiŋ

2Ambla ba elum efĩ nga, Eyesu a da Ebitru, ta la Eyakubu, ta la Eyohana a vre anyuŋ akũ-akyeŋ ka la ŋa. Omba moa a wo akũ lo otsotse nga, Eyesu a zhiŋ egi ayi moanwyeotum atra he lo. 3Anzho baŋ a ygi egʼba a zhiŋ a dzu akyle nga a shka ayi leleleŋ. Arekyeŋ obiŋ hi a kpo a gbu baŋ a ndza aknye a da lo a zgi pse nga a shka ayi leleleŋ eka he mbo. 4Moanwyeotum atra he lo a ka Eliya, ta la Omusa a kpla egba ta la Eyesu. 5Ebitru nga a lu odlo angyangyeŋ ta la Eyesu a lu mi le, Andakʼpo, o wo odzi o gre eshri bi e wo ahe ka la ŋo. O gno, agi é ta abro atra, akyeŋ okyku ŋo, akyeŋ okyku Omusa, nga akyeŋ okyku Eliya. 6Eyli e kpo Ebitru, pa la moanwyeotum aha he lo a gre eshri, nga moa a yi ekplo moa a la a lu mbo. 7Etabro e gile e ba eshri akũ lo nga e shki mo mvye, nga enzi e zgi ma e lu mi le, E ka Anwye Esesla me ba esõ me e gno oraŋ ka la ŋa nzenze angyiŋ a wo ahi lo. Agimi e ngli e gno odlo baŋ. 8Omba moanwyeotum a zhiŋ ayi a ka egi hi a sa a ka egi hi, moa a ka arekyeŋ mbo, o wo le Eyesu sha a mo.

9Omba ba Eyesu, pa la moanwyeotum atra a gile akũ a ba nga, Eyesu a sliĩ moanwyeotum he lo a lu mi le, Agimi e lu ekplo bimi e ka anye he e da arekyeŋ mbo, o wo le moa a da Anwye Arehwĩ a kso eku ayga dne. 10Moa a bmi ta la ekplo baŋ a lu, ambo moa atra lo a zhĩ emo a lu mi le, Eshi e ri oksoeku ba Eyesu a la a lu hi? 11Nga moa a sa a zhĩ Eyesu a lu mi le, Okyku eshi moa la a nye odaŋ a la a lu mi ma Eliya á ba a ba ori? 12Eyesu a tno mo ma a lu mi le, Eka he lo angyiŋ, Eliya á ba a ba ori, okyku o daŋ a nyuŋ ekployaŋ a mbo a kpo okyku oba-ba me Anwye Arehwĩ. Ambo moa a lu Akpa ba Ahogbrẽ ma moa á kpo Anwye Arehwĩ ewu nga, á tla ŋa mbo? 13Ame e lu e da gimi, Eliya a sheŋ a ba, nga moarehwi obiŋ hi a kpo ŋa ewu eka ba moa a klo, eka ba Akpa ba Ahogbrẽ a lu.

Eyesu a sliaŋ anwye ba ogbgabi o kpo otum ka la ŋa

14Omba ba Eyesu a ba pa la moanwyeotum atra lo, moanwyeotum baŋ ahwõ a ba a ka mo. Omba he lo moare nzenze a ba a shki okyku o ka Eyesu, Moa la a nye odaŋ nga a la a kla odlo pa la moanwyeotum. 15Omba ba moare a ka ba Eyesu a ba nga, moa a ka egbregbre, nga moa a yi a shko ŋa. 16Eyesu a zhĩ moanwyeotum baŋ a lu mi le, Agimi e la e kla eshi pa la moare? 17Alomakyeŋ a kso eshki a nyuŋ Eyesu a lu mi le, Andakʼpo, ame e shri anwye me ba ogbgabi o kpo otum ka la ŋa e ba, okyku eshi a kpla egba a gbu mbo. 18Ombayaŋ a mbo ba alo o tka ŋa, a la a tsu a gbu obiŋ, nga a tra azhga, nga a kpo afunvu anyu, egʼba e kpo nga e mom. Ame e vẽ moanwyeotum boŋ okyku o da mo a se ogbgabi lo a sku ŋa ambo moa a kpo a gbu mbo. 19Eyesu a nyuŋ moanwyeotum baŋ a lu mi le, Agimi e bmi ba adlidzi a wo mbo! Agimi e klo me e dzu ka la gimi e nye gimi ekayaŋ ayga bimi e bmi ba adlidzi? E shri anwye lo e kom me. 20Moa a shri ŋa a kom Eyesu. Omba ba ogbgabi o ka Eyesu nga, o sheŋ anwye lo obiŋ. Anwye a la a waŋ obiŋ nga a kpo afunvu anyu. 21Eyesu a zhĩ adaŋ anwye a lu mi le, Omba ba anwye lo a no o gyuŋ bgu? Adaŋ a tno ma a lu mi le, Anwye lo a zga esĩ olo he lo omba baŋ a wo anwye afifi ple. 22Adaŋ a sa a lu mi le, O ka, ombamba, ogbgabi o kpo nga o mu anwye lo o ta ovo, o mbo le ami, nga o klo o bga ŋa. Eyesu, aŋo o bmi le o ka gi ayiekŋe, nga o kpo o ghwo a gi, o wo boŋ o kpo o gbu. 23Eyesu a tno ŋa ma a lu mi le, Aŋo o bmi ba adlidzi bgu le, ekployaŋ a mbo é kpo é gbu o wo ba obmi ba adlidzi o wo ma. 24Adaŋ anwye lo a ta enzi angyangyeŋ a lu mi le, O bli me la obmi ba adlidzi nga o kpo o ghwo a me.

25Moare a ba a ta Eyesu a kpaŋ nga a fye ŋa ta la adaŋ anwye lo, ta la anwye lo. Eyesu a ka eka he nga a nyuŋ ogbgabi lo a lu mi le, Aŋo ogbgabi la o tsom atuŋ nga o kpla egba o gbu mbo, ame e nyuŋ ŋo, o kyu anwye lo abgo, nga o tka ŋa ondakyeŋ nga mbo. 26Ogbgabi lo o ta akhi nga o sheŋ anwye lo obiŋ nga egʼba baŋ e mom gzegze nga ogbgabi lo o zgi. Anwye a lom eka okom, okyku eka he areyaŋ a mbo a ka eka baŋ a kpu angyiŋ. 27Ambo Eyesu a kom ŋa abgo a daŋ a kso.

28Ambla ba Eyesu a gre odne, moanwyeotum baŋ a zhĩ ŋa shu a lu mi le, Okyku eshi agi e se ogbgabi e sku anwye lo e gbu mbo. 29Eyesu a tno mo ma a lu mi le, Moa a se ogbgabi edgu he lo la ekplokyeŋ a gbu mbo, o wo le la olu sha.

Eyesu a sa a lu odlo eshri eku baŋ

30Eyesu pa la moanwyeotum baŋ a zgi ahe a sõ obiŋ Egalili a gre egi ehwõ. Eyesu a klo ba arekyeŋ a yi okro baŋ a wo ma mbo, okyku eshi a klo o nye moanwyeotum baŋ. 31A nye mo a lu mi le, Agimi e gno, moa á vu Anwye Arehwĩ á shri á da moarehwi, nga moa á bga ŋa, ambo ambla ba elum etra moa á kso ŋa ongybi la esõ. 32Moanwyeotum a ka ekplo baŋ a nye mo a bmye mbo, ambo moa a zhĩ ŋa mbo okyku eyli.

Ayi a wo anyuanyuŋ a gre mvye?

33Ambla ba Eyesu, pa la moanwyeotum baŋ a gbu Akafanahum, moa a gre odne a khwo nga Eyesu a zhĩ mo a lu mi le, Agimi e la e kla eshi ozhẽ omba bi e ba? 34Moa a tno Eyesu ma mbo, okyku eshi omba moa a ba ozhẽ moa a la a kla odlo eshri are la a wo anyuanyuŋ a gre moahwõ. 35Eyesu a dzu obiŋ nga a bzi moanwyeotum baŋ otsko a nyuŋ mo a lu mi le, Areyaŋ a mbo la a klo o dzu andakʼpo eshri moahwõ le, á dzu awaghrẽ moahwõ pyeŋ. 36Eyesu a da anwye afifi a tspi egi ayi moanwyeotum baŋ. A sko anwye lo a ba a ghwo eshaku baŋ, nga a nyuŋ mo a lu mi le, 37Areyaŋ a mbo la a yga anwye afifi eka he eshko me, a yga me sha mbo, ambo a yga are la a hom me otum a mbo.

Are la a kpo ofpu ka la gi mbo le a wo a bi

38Eyohana a nyuŋ Eyesu a lu mi le, Andakʼpo, agi e ka alomakyeŋ la a wo eshki bi mbo a se egbgabi eshko boŋ. Agi e gno oraŋ mbo, okyku eka he agi e shrom ŋa ma a kyu abgo. 39Eyesu a tno ma a lu mi le, Agimi e tla edgu are he lo mbo. Okyku eshi are la a kpo akplo egbregbre eshko me á njygu me mbo. 40Areyaŋ a mbo la a wo efpu ka la gi mbo a wo a bi. 41E ngli e gno, areyaŋ a mbo la a shri ami owa-wa a kom gimi okyku bimi e wo moarehwi ba Ekristi le, á hwiŋ egbre baŋ.

Are la a bile mo a da mo a kpo odlobi

42Eyesu a lu mi le, Areyaŋ a mbo la a da akyeŋ eshki moanwye afifi la a bmi ba adlidzi pa la me a tsu a gbu le, o raŋ o gre moa a dze ŋa eghwo oto nga a ndbi ŋa a ta anyuŋ-ondzu. 43O wo ba obgo boŋ o doŋ o tsu o gbu, o kplu lo o ta a bi. O raŋ o gre boŋ o hwiŋ esõ la obgo okyekyeŋ o sku boŋ o yi enzheovo la abgo ahaha. Ovo lo ó rum ku-ku mbo. [ 44Enzheovo lo akpadzidzi la a wo ma á kpu mbo, ovo lo ó rum nga mbo.] 45O wo ba odga boŋ o doŋ o tsu o gbu le, o kplu lo o ta a bi. O raŋ o gre boŋ o hwiŋ esõ la odga okyekyeŋ o sku boŋ o yi enzheovo la adga ahaha. [ 46Enzheovo lo akpadzidzi la a wo ma a kpu mbo, nga ovo lo ó rum mbo.] 47O wo ba eyi boŋ e doŋ o tsu o gbu le, o gʼbu lo. O raŋ o gre boŋ o hwiŋ esõ la eyi ekyekyeŋ o sku boŋ o yi enzheovo la ayi ahaha. 48Enzheovo lo akpadzidzi la a wo ma a kpu mbo, ovo lo ó rum nga mbo. 49Ovo ó nyuŋ areyaŋ a mbo ó kpo eka ba moa a nyuŋ ebi a kpo ta la eŋe. 50Eŋe e wo edzi, ambo o wo ba oraŋ lo o kpu le, agimi é kpo anyu é ba e da lo e sa e raŋ? Agimi e da eŋe e dzu esõ bimi, nga e dzu pyapyaŋ ta la egimi.

Currently Selected:

Amarku 9: EGONT74

Highlight

Copy