Amarku 7

Onyenye moadimo

1MoaEyahuda moa a bzi mo moaEfarisi pa la moa la a nye odaŋ, moa a zgi Orushalima a ba nga, a dzu okro Eyesu. 2Moa a ka moanwyeotum ba Eyesu akyeŋ a la a ri algo la abgo eririm. Moa a ndza abgo ayga eka ba odzudzu moaEfarisi o lu mbo.

3MoaEfarisi ba Eyahuda mvye, a la a kpo otum ta la edgu onyenye moadimo a nye mo. Moa a ri algo mbo, o wo le moa a ndza abgo eka onyenye moadimo ayga dne. 4Moa a ri emakyeŋ moa a gbmo ekyku mbo, o wo le moa a ndza lo ayga dne. Moa a wo odaŋ ma nzenze moa a la a kpaŋ. Odaŋ o wo ma okyku o ndza etku o wa ami, ta la eshyeshyẽ, ta la egba, ta la amgbla olom ma.

5MoaEfarisi, pa la moa la a nye odaŋ a zhĩ Eyesu a lu mi le, Okyku eshi moanwyeotum boŋ a lu onyenye moadigi ma mbo, nga moa a la a ri algo la abgo eririm? 6Eyesu a tno mo ma a lu mi le, Okaolu ba Eshaya a ka a lu eshri bimi o wo adlidzi angyiŋ! Agimi e wo abibli moarehwi eka baŋ a ta akpa a lu mi le,

Ahogbrẽ a lu mi le, Moare a la a hlu me eshko la anyu mo,

Ambo esõ mo e wo ogyugyuŋ pa la me.

7Ototno angyiŋ moa a la a hlu me eshko,

Okyku eshi moa a la a nye odaŋ moarehwi a zga, eka ba Ahogbrẽ angyiŋ a zga!

8Eyesu a nyuŋ mo a lu mi le, Agimi e la e tla odaŋ ba Ahogbrẽ nga e kpo otum ta la onyenye moarehwi.

9Eyesu a sa a lu a ta ma a lu mi le, Agimi e wo elom ba o tla odaŋ Ahogbrẽ nga, e la e kpo otum ta la onyenye moarehwi e gre eshri. 10Omusa a lu mi le, O fa olbi o da adoŋ, ta la anoŋ. Ma areyaŋ a mbo la a lu odlobi ta la adaŋ, ta la anaŋ le, moa á bga ŋa. 11Ambo agimi e nye moare, ma are la a wo ekplokyeŋ ma okyku o kpo o ghwo adaŋ, ta la anaŋ, ambo a lu mi ma aŋa á shri lo á da Ahogbrẽ angyiŋ le, 12ma ohi lo o wo odlobi angyiŋ mbo. Agimi e da are he lo a tla adaŋ, ta la anaŋ a ta. 13Okyku eka he agimi e tpi odlo Ahogbrẽ ayi angyiŋ la edgu odzudzu moadigimi. Agimi e la e kpo ayakplo nzenze edgu ahe lo.

Ayakplo la a tpi are ayi

14Eyesu a sa a bzi eshki nga a lu odlo pa la mo a lu mi le, Agimi mvye e ngli e gno adzadzi. 15Ekplo ba are a ri a gre akpyki angyiŋ e la e tpi ŋa ayi mbo. Ambo ekplo la e zgi esõ baŋ angyiŋ, e la e tpi ŋa ayi. [ 16O wo bimi e wo atuŋ ma ba o gno odlo, e ngli e gno.] 17Eyesu a kso a sku eshki a khwo nga a gre odne. Moanwyeotum baŋ nga a zhĩ ŋa odlo eshri egŋe baŋ a ta. 18Eyesu a tno mo ma a lu mi le, Agimi e ka egŋe ame e ta e lu mi ma ekplo ba are a ri e gre akpyki angyiŋ e tpi are lo ayi mbo e bmye mbo? O wo eka he okaobmye bimi o wo ogyugyuŋ o gre o moahwõ mbo. 19Ekplo ba are a ri e gre akpyki é tpi ŋa ayi mbo okyku eshi e yi egʼba angyiŋ, e yi esõ mbo. Ekployaŋ a mbo ba ori, are a kpo a gbu baŋ a ri lo. 20Eyesu a lu mi le, Aga esõ arehwĩ angyiŋ a la a tpi ŋa ayi. 21Esõ arehwĩ nga, aga ba o kpo ayakplobi, eka esi, ta la obga ebga, 22ta la o ta ekpa, ta la okayiogro, ta la aga abi, ta la emgbʼbo, ta la o kpo ayakplobi, ta la o ta efpu, ta la onjygu, ta la ohregʼba, ta la o kpo ayakplo adro. 23Ayakplo he lo mvye a la a zgi esõ arehwĩ angyiŋ a tpi ŋa ayi.

Ashe la a bmi ba adlidzi

24Eyesu a kso a gre obiŋ-okyeŋ la o wo osusku ta la osku ba Ataya. A klo ba arekyeŋ a ka ŋa mbo, okyku eka he a gre odnekyeŋ. Ambo ekakahelo moare a yi. 25Ashekyeŋ a wo ma, ba ogbgabi o kpo otum ta la anwye-alashle baŋ. A gno oshpa ba Eyesu a ba osku mo, ebuebu nga a gre okro baŋ nga a kʼpu obiŋ egi ayi baŋ. 26Ashe lo a wo azhẽ ba Esiriya obiŋ ba Efonisha. A vẽ Eyesu okyku o daŋ a se ogbgabi a sku anwye baŋ. 27Eyesu a nyuŋ ŋa a lu mi le, Aŋo o da gi e vgi moanwye bi ayga. O wo odzi bi e sko algo moanwye e ygi ebu mbo. 28Ashe lo a tno ma a lu mi le, Ada, ebu a mbo la e lom okũ atku algo, e la e ri algo moanwye a ri a ra. 29Eyesu a tno ma a lu mi le, Okyku obmi ba adlidzi boŋ o yi odne a mo. Ogbgabi o zgi o sku anwye-alashle boŋ! 30Ashe lo a gre odne nga a ka anwye baŋ a shaŋ nga a lom amgbla. Adlidzi angyiŋ, ogbgabi o sheŋ o zgi o sku ŋa bgu.

Eyesu a shaŋ are la a tsom atuŋ nga a zhga olom

31Eyesu a zgi akekaŋ ba Ataya nga a sõ Esidoŋ a gre atam Egalili nga a gre Edekapoli, obiŋ ba esku okʼpo. 32Moare-kyeŋ a shri alomakyeŋ la a tsom atuŋ nga a zhga olom a shri a ba okro Eyesu, nga moa a vẽ ŋa ma a shki ŋa abgo. 33Eyesu a sko ŋa a sku eshki a khwo nga, a ghwo ŋa evgo atuŋ, nga a ta akyi, a tka olom baŋ. 34Ambla he nga Eyesu a ka ongyeŋ, a ta agyim agagre, nga a nyuŋ alom he lo la olomokyeŋ a lu mi le, Epifata, o dzu, O hwile. 35Ebuebu atuŋ baŋ a hwile, nga olom baŋ o ngla, nga a lu odlo a gbu. 36Eyesu a shĩ mo mvye a lu mi le, E lu ekplo la e kpo e da arekyeŋ mbo. Ambo moare a zga gble nga a lu lo. 37Moa la a gno oshpa ekplo la e kpo mvye a ka egbregbre a gre eshri. Moa a lu mi le, Aŋa a kpo ekployaŋ a mbo shasha. Aŋa a la a kpo anyu, a da moa la a tsom atuŋ a gno, nga moa la a zhga olom a lu odlo.

Currently Selected:

Amarku 7: EGONT74

Highlight

Copy