Roma 8

Gwolor gwoso Mulökötyo Loke ’de ’dekan

1Nyenagon soŋinana ŋutu logongwe ko Kristo Yesu i mugun kilo tine ’duŋöki putet riŋet. 2Kogwon saret lo Mulökötyo logon jakiŋdya yi ru ko Kristo Yesu i mugun lo, aje yukun nan kaŋo i saret lo toron se ko lo twan.

3Ŋo nagon kilo Saresi ti bulö koŋdya kune kogwon kune mugunya kaŋ a namunyak, a Ŋun lo koŋdi. Lepeŋ a sunyuŋdyö Ŋuro lonyit ko mugun na Ŋuto gwoso mugunya kaŋ nagon totoroŋdya kune, kogwon kulya ti toron, anyen ’duŋökiŋdyö putet riŋet lo toron na gwon i mugun na ŋuto lo la kak lo. 4Ŋun a koŋdya kine ŋo anyen ŋo na rigwo nagon Saresi ’de ’dekan adi ti konani kona kune, kine ŋo ködyo kokona jojo kayaŋ i mugunya, kogwon yi gwolor gwoso nagon Mulökötyo Loke ’de ’dekan na, ti gwon gwoso ’dekesi kaŋ ti mugunya ti na kak kune.

5Kogwon ŋutu logon gwolor gwosoi ’dekesi kase ti mugunya ti na kak kulo, lepeŋat tiŋdu toilyet kase i kulya ti gwiliŋit lo na kak, ama se logon gwolor gwoso nagon Mulökötyo ’de ’dekan kulo, lepeŋat tiŋdu töilyet kase i kulya ti Mulökötyo. 6Ko ŋuto tiŋdu töili lonyit i kulya ti gwiliŋit lo na kak, ŋina jakiŋdya lepeŋ twan, ama ko ŋuto tiŋdu töili lonyit i kulya ti Mulökötyo Loke, ŋina jakiŋdya lepeŋ ru se ko taliŋ. 7Kogwon ŋuto logon tiŋdu töili lonyit i kulya ti gwiliŋit lo na kak lo, lepeŋ a miriku lo Ŋun, kogwon lepeŋ ti twöju saresi ti Ŋun, ’diri nye ti bulö. 8Iŋkoi, ŋutu logon gwolor gwoso i ’dekesi kase ti mugunya ti na kak kulo ti bulö tulyöŋo Ŋun kwöŋ.

9’Diri ko Mulökötyo lo Ŋun gwolor kasu i mugunya, a ta tine gwolor gwoso i kulya ti gwiliŋit lo na kak, ama gwolor gwoso i kulya ti Mulökötyo. ’Diri ko lele ŋuto ’bak Mulökötyo lo Kristo nye ’bayin a lonyit kwöŋ.

10Ama ko Kristo gwon kasu i mugunya, ma ’di nagon mugunya kasu a twatwa kogwon toron, ama ködudwölön kasu gwon jörun kogwon Ŋun a tiŋdu ta gwon rigwo kanyit i komor. 11#1 Kor 3.16A ko Mulökötyo lo Ŋun lo toŋiju Yesu i twan lo gwolor kasu i mugunya, a nye lo toŋiju Kristo Yesu i twan lo mo köti toruje mugunya kasu na ’bu ’burön kine, kogwon Mulökötyo lonyit lo gwolor kasu i mugunya ŋilo.

12Nyenagon luŋasirik kwe, yi gwon ko möri, ama ŋina möri ti gwon i gwolor gwoso i ’dekesi ti mugunya kaŋ ti na kak. 13Kogwon ko ta gwolor gwoso nagon mugunya kaŋ ti na kak ’de ’dekan na, a ta mo twatwane twatwa, ama ko ta tatuja konesi ti mugun i riŋit na Mulökötyo a ta mo rune ru.

14Kogwon ŋutu liŋ logon Mulökötyo lo Ŋun lo nyömöddu kilo, lepeŋat a ŋwajik ti Ŋun. 15#Gal 4.5-7#Mar 14.36; Gal 4.6Mulökötyo logon ta a wu ŋilo ’bayin a mulökötyo logon tiŋdu ta i gwon a ’dupi a nyömöddi ta bot i kujönö, ama nye a Mulökötyo logon tiŋdu yi i gwon a ŋwajik ti Ŋun, a tiŋdi yi i luŋgu na lepeŋ adi, Aba, Baba! 16I ŋina Mulökötyo lepeŋ mora ko töilyet kaŋ tuggö adi yi a ŋwajik ti Ŋun. 17Koyi gwon a ŋwajik a yi mo wuji ŋo nagon Ŋun a ’delakin ŋwajik kanyit kune, a yi mo ŋaŋi se ko Kristo i pirit na geleŋ. Kogwon koyi a ŋarundya ŋoŋga na Kristo, a yi mo köti paruŋdye minyo lonyit.

Minyo lo molu

18Kogwon nan yeyeju adi ŋoŋesi ti na diŋit kune ti jukin töjowe ko minyo logon mo kwekweki yi lo. 19Kogwon ŋo liŋ logon Ŋun a gweja kulo mömönau ko pusök ga ’yu kweya na ŋwajik ti Ŋun. 20#Sul 3.17-19Kogwon ŋo liŋ lo gweya kulo a nyökwe kak a gwe ’bak ’bulit, ’bayin ko ’dekesi kase ama kogwon Ŋun ’de ’dekan adi ti se gwe sona. Ama yenet kata adi 21ŋo liŋ lo gweya kulo mo yuyukwe kaŋo i to ’dupien na ŋo na ’bu ’burön kune, anyen tolupöji i tolien nakwekwelen na ŋwajik ti Ŋun.

22Kogwon yi deden adi tojo ko na diŋit ŋo liŋ lo gweya kulo gwon i ’du ’duatu, totomie gwoso mien na ŋuto na tata ’du; 23#2 Kor 5.2-4ama ’bayin a ŋo liŋ lo gweya kulo ka ’de, ama yi logon a tiki Mulökötyo a waŋet lo ŋo na popo kulo köti ’du ’duatu i mömöŋdu na Ŋun i koŋdya na yi a ŋwajik kanyit, ko i lwöggu na mugunya kaŋ. 24a i diŋit nagon yi aje lwökö nu a yi mo gwe ko yenet na kine kulya, ama koyi a yeŋdu ŋo nagon yi a met kune, ŋina ’bayin a yenet. Ŋuto a ŋa logon yeŋdu ŋo nagon nye memet? 25Ama koyi yeŋdu ŋo nagon yi ti met kune, a yi möŋdi lepeŋ taliŋ ’bak wiwinya.

26Köti sona Mulökötyo Loke ŋaŋarakin tomunyan nikaŋ, kogwon yi ti den koyi ködyö muluŋdyö nyo, köti koyi ködyö kwakwaddu ada, ama Mulökötyo lepeŋ lo kwa kwa sakiŋdya yi ko ’du ’duatu ’bak jambu kulyaesi.

27Ŋun logon gaga ’yu töilyet ti ŋutu lo, lepeŋ deden ko yeyeet na Mulökötyo gwon ada, kogwon Mulökötyo mumulukiŋdyö ŋutu ti Ŋun gwoso nagon Ŋun ’de ’dekan na; 28kogwon yi deden adi ŋutu logon nyanyar Ŋun, logon nye a luŋun gwoso i yeyeet nanyit kulo, Ŋun kikita ko se i ŋo liŋ i tetenakiŋdya na se ŋo na ’but. 29Kogwon köju ’beron Ŋun a den ŋutu kanyit, a iŋge gelakin se anyen kelaji gwoso Ŋuro lonyit, anyen ŋilo Ŋuro ködyö gwon a kayu lo luŋasirik jore. 30Nyena a Ŋun köti luŋgi se logon nye a gelun kulo; a kilo ŋutu logon nye a luŋun kulo a nye köti tiŋdi se i gwon rigwo kanyit i komor; a nye köti tiŋdi kilo logon nye a tikin i gwon rigwo kanyit i komor kulo i parundya na minyo lonyit.

Nyaŋu na Ŋun na yi na gwon ko Kristo i mugun na

31Nyena a yi de kulyani ada i kine kulya? Ko Ŋun gwon kayaŋ i swöt, a ŋa lo ŋisani koyi? 32Lepeŋ a ko renya tiŋdu Ŋuro lonyit gwak, ama nye a wukin lepeŋ kogwon yi liŋ. A ko lepeŋ a koŋdya sona, nye ŋona mo ti tikin yi ŋo liŋ abur ko lepeŋ i pirit na geleŋ le?

33Ŋa logon ŋona mo ŋöŋökiŋdyö ŋutu lo wulwe ti Ŋun kilo? Ŋutu ’bayin, kogwon Ŋun ko mugun nanyit a tuggö adi se ’bak kulya. 34Ŋa logon bubulö ’duŋökiŋdyö se putet riŋet? Ŋuto ’bayin, kogwon Kristo Yesu logon a twan—ama bia parik lepeŋ a toŋiyu i twan, —logon gwo ’dan ko Ŋun i könin lutaten lo, lepeŋ ’diri momo ’yu Ŋun kogwon kulya kaŋ. 35Nyo nagon bubulö koraddu yi kaŋo i nyaŋu na Kristo na yi? Ŋona a yöyöŋesi le? ’Bayin. Kode gwon i nagusu? ’Bayin. Kode tolomerian? ’Bayin. Kode sasanyesi? ’Bayin. Kode dyaŋ? ’Bayin. Kode gwon a limu kana? ’Bayin. Kode gwon i kutuk na twan? ’Bayin. Kode tatua ko baŋdu? ’Bayin. 36#Sau 44.22Yeyene ta yeye kulyaesi ti Ŋun lo wurö kulo adi,

Yi tatatua i tuparan liŋ kogwon kulya kunök,

a yi iŋge kona gwoso yidin na ’du ’duŋö.

37’Bayin, kine ŋo ti bulö koraddu yi kaŋo ko Kristo, kogwon i kine kulya liŋ yi a katelak parik kogwon nye logon nyanyar yi lo. 38Kogwon nan a den ’bura adi nene ŋo ’bayin nagon bubulö koraddu yi kaŋo, kode twan, kode ru, kode malaikajin, kode tokimakan, kode ŋo ti na diŋit, kode ŋo ti molu, kode riŋitön, 39kode mulökö ti köbuŋöt, kode mulökö ti toŋolu na kak, kode nene ŋo i ŋo liŋ nagon a gweya kune, iŋkoi, nene ŋo ’bayin kwöŋ nagon bubulö koraddu yi kaŋo i nyaŋu na Ŋun na yi na gwon ko Kristo Yesu Matat likaŋ i mugun na.

Currently Selected:

Roma 8: BBE

Highlight

Copy