Roma 9
9
Ŋun ko ŋutu kanyit Yisaraele
1Nan ŋilo jambu kulya ’dirigwoso ŋuto lo Kristo, nan ’bayin ’bu ’burönö; töili liŋ denet logon tiyu ko Mukölötyo Loke lo tuggö adi 2nan gwon ko delya a duma köyö i töili se ko mien nagon ti ’duddyö kwöŋ. Kogwon nan gwon ko pusök i kulya ti luŋasirik kwe logon a ŋutu kwe ti jur. Kogwon ko ködyö se bubulö lwökö, a bia ti Ŋun lömi löm ko ti korara nan kaŋo ko Kristo i mugun. 3Kogwon nan ködyö ’de ’dekan adi ti Ŋun lömi löm nan ko ti korara nan kaŋo ko Kristo i mugun, anyen ködyö luŋasirik kwe logon a ŋutu kwe ti jur lwölwökö.
4 #
Yuö 4.22
Lepeŋat a kötumit na Yisaraele; Ŋun a koŋdya lepeŋat a ŋwajik kanyit, a tiŋdi se minyo lonyit, ko tomoresi nagon nye a teten ko se i pirit na geleŋ kune, a tiŋdi se Saresi todinesi, se ko saresi kwakwasesi, ko a milyekin tiŋdu se ŋo na popo. 5Lepeŋat a nyakwariat ti merenyejin temejik ti kokwe, a Masia köju gwe a lo gweyari lose, gwoso na gwoŋdi lepeŋ a ŋuto nu. Ti Ŋun logon a duma lo ŋo liŋ lo purani pura ŋupi ŋupi. Amin!
6Ama ti gwon adi ŋo na milyeji Ŋun kune a jaran; kogwon ’bayin a nyakwariat liŋ ti Yisaraele logon a ŋutu ti Yisaraele gwak. 7#Sul 21.12Köti ti gwon a nyakwariat liŋ ti Abarayama logon a ŋwajik kanyit gwak, kogwon a milyeki lepeŋ adi, Nyakwariat kulök mo pipiluŋdya ko Yisaka. 8Ŋina kweja adi ti gwon a ŋwajik logon ŋutu lo yuŋ undyö kulo logon a ŋwajik ti Ŋun, ama ŋwajik logon yuŋwe i ŋilu milye kulo logon luŋu a nyakwariat ti Abarayama gwak. 9#Sul 18.10Kogwon Ŋun a milyeju adi, Nan köti mo yiyitwe konut ni i diŋit na wulwe, a Sara mo yuŋuŋdye ŋuro lulalet.
10Ama ’bayin a kine kulya ka ’de, kogwon ŋwajik murek ti Rebeka kulo ŋaŋu monye logon a Yisaka merenye likaŋ. 11#Sul 25.23Ama i ŋerot nagon kilo ŋwajik a ko nyuŋ yuŋwe, a gwe a ko koŋdya nene ŋo na ’but kode naron nu,
12a Ŋun takiŋdye ŋote adi, Kayu mo kitakiŋdya loponi. Kine kulya gwon sona anyen kwekiŋdya adi Ŋun ’de ’dekan wuluŋdyö ŋutu ti gwon i konesi kase, ama tuŋ gwoso nye a wakun luŋgu; 13#Mal 1.2, 3gwoso na tuŋge kulya ti Ŋun na wurö kune adi, Nan aje nyar Yakobo, ama a nan maŋdi Esau.
14A kirut yi de kulyani ada? Yi kulya adi Ŋun ’bayin a lo rigwo le? ’Bayin sona kwöŋ. 15#Yuö 33.19Kogwon lepeŋ köju a takiŋdya Mose adi, Nan yayatakin ŋuto logon nan ’dek yatakiŋdya lo, a nan wone konyen ko ŋuto logon nan ’dek won konyen ko nye lo.
16Nyena kine kulya ti gwon i ŋo nagon ŋuto ’de ’dekan kode ŋo nagon nye kökon, ama tuŋ gwon a kulya ti Ŋun i yatakiŋdya. 17#Yuö 9.16Kogwon a wurö adi Ŋun köju a kulya ko Paro adi, Ko ŋina kwe nan a ’bilikin do ki anyen nan kweja riŋit nio konut i mugun, anyen karin kwe böŋö kukuörö i kak ’bukuluŋ. 18Nyena ko Ŋun a wakun i yatakiŋdya na ŋuto a nye yatakiŋdye yatakiŋdya, a ko lepeŋ ’de ’dekan togo ’yu töili lo ŋuto anyen gwon ti twöju a nye togo ’yi togo ’yu.
Woran na Ŋun se kowon nanyit na konyen
19Ta köti ’dek pija nan adi, A ko sona ko nyo Ŋun gwon i yuyuggö na ŋutu? Ŋa logon ŋona bubulö renya ŋo nagon nye ’de ’dekan kune? 20#Yis 29.16; 45.9Ama do ŋuto kana, do a ŋa anyen ŋetakiŋdya Ŋun kulya? Sape ŋona bubulö pija kagweyanit lonyit le adi, Ko nyo nagon do gweja nan sona? 21Kagweyanit lo sapya ŋona ti konakiŋdya liŋo gwoso nagon nye a wakun le? Lepeŋ ŋona ti bulö gweyuŋdya sapya murek i liŋo geleŋ lo nutu, lele a minyotat se ko lele kitarikin abur le?
22Ŋun ŋona a ko koŋdya ŋo gwoso kine le? Ma ’di ködyö nye ’de ’dekan kwekiŋdya woran nanyit i tiŋdu na riŋit nanyit i dena, lepeŋ a ŋoŋaddu diŋit a najo ko ŋutu logon towoŋa lepeŋ logon ködyö tutukara kulo.
23Lepeŋ koŋdya sona anyen kwekiŋdya tukworien na minyo lonyit i ŋutu logon nye ’dek won konyen ko se kulo, logon nye köju a tetenakin a ti minyo.
24Yi gwoso kilo sapya logon nye wowoji konyen kilo. Nye a ko lupuŋdya yi i kiden na Yudayaki ka ’de, ama nye köti a lupuŋdya yi i kiden na ŋutu ti jurön; 25#Ose 2.23gwoso na kulyari nye i buk na Osea nu adi,
Ŋutu logon ’bayin a kwe kulo, nan mo luluŋ a ŋutu kwe,
a nye nagon ti nyara na, a nan mo luŋgi a nyaratti nio.
26 #
Ose 1.10
A i pirit na taki ’e se köju adi, Ta ’bayin a ŋutu kwe nu,
i ŋinu pirit gwak a lepeŋat mo luŋuni a ŋwajik ti Ŋun lo gwon jörun.
27 #
Yis 10.22, 23 A Yisaya köju iŋge laŋa i kulya ti Yisaraele adi,
Ma ’di ködyö ŋutu ti Yisaraele gwon jore gwoso sese na tör duma na ’balaŋ, tuŋ a pitönö ti lepeŋat ka ’de mo lo lwököni;
28kogwon Matat mo kokonakin ’de ’de i na kak ŋo nagon nye a jam adi nye kökon na, a mo tine karakin.
Koti gwoso na kulyari Yisaya köju nu adi,
29 #
Yis 1.9
Ko ködyö Matat lo kurumi a ko kölökin yi nyakwariat ku ’dik,
a yi kodyö gwe gwoso Sodoma, a yi ködyo konani gwoso Gomora.
Paulo gwon ko pusök anyen ŋutu kanyit logon a Yisaraele böŋö lwölwöko
30A kirut yi de kulyani ada? Yi de kulya adi ŋutu ti jurön logon a ko ga ’yu tetenakiŋdya ’börik i gwon rigwo ko ŋun i komor kulo aje tetenaki a lo rigwo ko lepeŋ i komor kogwon yupet. 31Ama kölumbö ŋutu ti Yisaraele logon ga ’yu i gwon rilo ko Ŋun i komor kogwon saresi kulo, kwöŋ gwe a ko ryö saresi logon tiŋdu se i gwon rigwo. 32Ko nyo lepeŋat a ko ryö? Lepepat a ko ryö kogwon se a yinikin kitajin na ’but nagon se kökon kune, a gwe a ko ga ’yu tetenaki rigwo ko yupet. Lepeŋat a köpukö ko ŋurupit, 33#Yis 28.16logon kulya kanyit a jama i kulya ti Ŋun na wurö kune adi,
Meddi, nan lo petakiŋdya ŋurupit Siona,
logon a ŋurupit köpuket, ko a lurutat to ’dorowet;
ama ŋuto logon a yubbö lepeŋ lo mo ti toyuö kwe.
Currently Selected:
Roma 9: BBE
Highlight
Share
Copy
Want to have your highlights saved across all your devices? Sign up or sign in
Bari Bible © United Bible Societies, 1979.
