Roma 3

1A kirut Yudayaki gwe ko nan ’bulit? Kode ’bulit na tawero a nyo? 2Iŋkoi, lepeŋat gwon ko ’bulit a duma i ŋo liŋ. A kokwe Ŋun a yinikin Yudayaki i wuju na kulyaesi kanyit. 3A kirut gwe ada ko kulye kase ’bayin lo yiyiniki i ’debba na kulyaesi kanyit? Ko ŋina kwe a Ŋun mo gwe ’bayin a lo yiyiniki i koŋdya na ŋo nagon nye a jam kune le? 4#Sau 51.4’Diri ti gwon sona! Ŋun ’beron yeŋon a lo to ’diri, ma ’di ŋutu liŋ a ’burönök, gwoso na wurörikin na adi, Do Ŋun mo kurwe a loke ko do jajambu, do mo ’bu ’buŋu ko do a ’dunöki putet.

5Ama ko toron nikaŋ kwekiŋdya adi Ŋun ’duŋgö putet rigwo, a yi kulyani ada? Yi kulya adi Ŋun ti ’duŋgo putet gwogwo kogwon a riŋga yi na le? (Nan ŋilo jambu gwoso nagon ŋuto jajambi na.) 6’Diri ti gwon sona. Ko Ŋun ’bayin a lo rigwo a lepeŋ kodyö jujukin ’durigö kulya ti na kak le? 7Ama ko gwon nio a ’burönit a jakiŋdya Ŋun bulet a duma kogwon a kwekiŋdya adi lepeŋ a lo to ’diri, a ko nyo nagon nan köti nyuŋ ’duŋoki a katoronyanit? 8A ko sona ko nyo yi ti koŋdya kulya narok anyen ŋo na ’but pupukun? Iŋkoi, kulye Ŋutu a pökiŋdyö nan kana adi nan todiŋdyö adi ti ŋutu koŋdi kulya narok anyen ŋo na ’but pupukun. A na ’but ko ködyö kapöök gwoso kilo a ’duŋöki kulya narok.

Lele ŋutu ’bayin logon a lo rigwo

9Nyena gwon ada? Yi Yudayaki ŋona a lwöŋ ŋutu ti kulye jurön le? ’Bayin sona kwöŋ; kogwon nan dika aje jambu adi ŋutu liŋ Yudayaki ko Giriki gwon i riŋit na toron.

10 # Sau 14.1-3; 53.1-3 Kogwon a wurö adi, Lele ŋuto ’bayin logon a lo rigwo ma ’di geleŋ to.

11Lele ŋuto ’bayin logon kukurun kulya logon ga ’yu Ŋun.

12ŋutu liŋ a girara a swöt, soŋinana lepeŋat aje köŋu a gwe ’bak ’bulit;

a lele gwe ’bayin lo koŋdya ’bura ma ’di geleŋ to.

13 # Sau 5.9; Sau 140.3 Gworolo kase gwon gwoso dili nuket nagon a ko yikö,

a se jambi kulya ’burönö ko ŋedepa kase.

A wiri lo munuö gwoŋ korokokan gwe kase i ŋedepa.

14 # Sau 10.7 Kutusen kase a jore ko lömisi se ko kulya na pötwör.

15 # Yis 59.7, 8 Mokosi kase a lowulekak i ’buköddu na rima,

16a köŋu ko tukaŋu gwe a kikolin kase.

17Lepeŋat ti den kiko lo taliŋ,

18 # Sau 36.1 a lepeŋat tine yeye kugga Ŋun.

19Yi a den adi ŋo liŋ nagon kilo Saresi a tuk kine a ti ŋutu lo ’debba kilo Saresi kulo, anyen ŋuto gwon ’bayin logon ’buruddu mugun kaŋo anyen ŋutu liŋ ti kak ’bukuluŋ gwon i putet lo non. 20#Sau 143.2; Gal 2.16Kogwon ŋuto ’bayin logon a tetenaki a lo rigwo ko ŋun i komor kogwon ’debba na Saresi, kilo Saesi tuŋ tiŋdu ŋuto i deŋdya adi nye a katoronyanit.

Ŋun a tiŋdu ŋutu i gwon a lo rigwo kogwon yubbö nase

21Ama soŋinana Ŋun aje kweja ko nye tiŋdu ŋuto i gwon a lo rigwo ada kanyit i komor, ama ’bayin i koŋdya na Saresi. Kilo Saresi ti Mose se ko ŋo liŋ na wur nebijin kune a tokoŋu adi kine kulya a gwak.

22 # Gal 2.16 Kweja adi Ŋun a tiŋdu ŋutu i gwon a lo rigwo kanyit i komor kogwon yubbö nase na Yesu Kristo. Kine kulya a ti ŋutu liŋ tuka ’de ’bayin kwöŋ; 23kogwon ŋutu liŋ a toroŋdya, lepeŋat a karakin kiden a gwe a ko kek ŋo nakwekwelen nagon ŋun ’de ’deggi na. 24Lepeŋ a ’dogga ŋutu ’bak ropet ko ’busan nanyit na nyaŋu anyen se gwon a lo rigwo kanyit i komor, kogwon daket nagon Kristo Yesu a dakuŋdye yi a yi gwe a lui na. 25Ŋun a kweja lepeŋ anyen rima kanyit lalaju toronjin ti ŋutu lo yubbö nye kulo. Ŋun a koŋdya sona anyen kwekiŋdya adi nye a lo rigwo. kogwon i diŋitan ti ’beron nye a teŋgu mugun a gwe a ko riŋga toronjin. 26iŋkoi, lepeŋ koŋdya sona anyen kwekiŋdya i na diŋit na adi nye ko mugun nanyit a lo rigwo, a nye tiŋdi ŋuto logon yuyuŋ Yesu Kristo lo i gwon a lo rigwo kanyit i komor. 27a kirut yi bu ’ye ’börik ada? Nene ŋo ’bayin nagon yi bu ’ye ’börik. Ko nyo yi ti bu ’ya ’börik? Koyi a ’debba Saresi a yi bu ’ye ’börik, ama koyi a yubbö a yi tine bu ’ya ’börik. 28Nyena i ’dutet na kulya yi a den adi ŋuto a tetenaki a lo rigwo ko ŋuro i komor kogwon yubbö ka ’de, ti gwon i ŋo nagon kilo Saresi a tuggö adi ŋutu ködyö kökon se kune. 29Ŋun ŋona a Ŋun lo Yudayaki ka ’de le? Lepeŋ köti ’bayin a Ŋun lo ŋutu ti kulye jurön le? Iŋkoi, lepeŋ köti a lo kulye ŋutu. 30#Nyö 6.4; Gal 3.20Kogwon Ŋun geleŋ, lepeŋ ti kökoroja mugun. Lepeŋ mo titikin ŋutu lo tawero kulo i gwon a lo rigwo kanyit i komor kogwon yupet nase, köti nye mo titikin ŋutu logon a ko tawero kulo i gwon a lo rigwo kogwon yupet nase. 31Yi ŋona aje paju kilo Saresi adi ’bak ’bulit kogwon yi deŋdya yupet tuŋ le? ’Bayin sona kwöŋ. Yi kölumbö a togwi ’dikiŋdya kilo Saresi go adi gwiŋ.

Currently Selected:

Roma 3: BBE

Highlight

Copy