Roma 4
4
Kulya ti Abarayama a jama a miret
1Nyenagon a yi kulyani ada i kulya ti Abarayama merenye lo kötumit nikaŋ? 2Ko ködyö Abarayama a koŋdya mugun a lo rigwo ko Ŋun i komor kogwon ŋo nagon nye a kon kune, a lepeŋ ködyö bulöni bulö bu ’ya mugun, ama bu ’ya nanyit ’bayin ko Ŋun i komor. 3#Sul 15.6; Gal 3.6Kulya ti Ŋun na wurö kune tuggö adi nyo? Adi, Abarayama köju a yubbö Ŋun a Ŋun ruŋge lepeŋ a ŋuto lo rigwo kanyit i komor kogwon yubbö nanyit. 4Ko ŋuto logon kita ko ropet, ropesi kanyit ti kena a ŋo na ’dokari nye kana ama tiki lepeŋ a ropesi ti kita nanyit. 5Ama ko ŋuto yiyinikin mugun ko Ŋun logon tiŋdu katoronyak i gwon a lo rigwo kanyit i komor lo, a gwe ti kita anyen koŋdya mugun a lo rigwo, a Ŋun ruŋge lepeŋ a lo rigwo kogwon kulya ti yupet nanyit. 6Köti sona Dawidi a jambu lyöŋön na ŋuto logon Ŋun a ruk a lo rigwo lo, ma ’di nagon nye a ko kita anyen koŋdya mugun a lo rigwo.
7 #
Sau 32.1, 2 Kulya na jam Dawidi kune gwon sona adi,
Lyöŋön gwon i ŋuto logon Ŋun a pitökin i ’beleŋgu na saresi lo,
iŋkoi, lyöŋön gwon i ŋuto logon nye a lalaju toronjin kanyit lo.
8Lyöŋön gwon i ŋuto logon Matat a ko kenakin toronjin kanyit kak lo.
9Ŋina lyöŋön jama a na ŋutu lo tawero ka ’de le, kode köti jama a na ŋutu logon a ko tawero kulo? Kogwon yi a kulya adi, Ŋun a ruk Abarayama a lo rigwo kanyit i komor kogwon yubbö nanyit. 10A köju gwe ada i nu diŋit na ruŋge Ŋun lepeŋ nu? Lepeŋ a tawero kode a ko tawero? ’Bayin, lepeŋ a ko nyuŋ tawero. 11#Sul 17.10Lepeŋ ko taweroni i mukök, a tawero nanyit gwe a kweyet nagon kweja adi, i diŋit nagon nye a ko nyuŋ tawero nu, Ŋun a ruk lepeŋ a lo rigwo kogwon yubbo nanyit. Nyena a lepeŋ gwe a merenye lo ŋutu liŋ logon a yubbö i diŋit nagon se a ko nyuŋ tawero nu, a Ŋun iŋge ruk se a lo rigwo. 12Lepeŋ köti a merenye lo ŋutu lo tawero logon tawero nase ’bayin a ŋo kana, ama lepeŋat kepoddu kiko lo yupet logon kata ko merenye likaŋ Abarayama i diŋit nagon nye a ko nyuŋ tawero nu.
Ŋo nagon Ŋun a milyekin tiŋdu kune tiki kogwon yupet
13 #
Sul 17.4-6; 22.17, 18; Gal 3.29 Ŋun a milyekin tiŋdu Abarayama se ko nyakwariat kanyit kak ’bukuluŋ a nase lomore; lepeŋ a koŋdya sona ti gwon kogwon Abarayama a ’dep saresi, ama kogwon Ŋun a ruk lepeŋ a lo rigwo kanyit i komor kogwon yubbö nanyit. 14#Gal 3.18Kogwon ko ködyö Ŋun a milyekin tiŋdu kak ’bukuluŋ a lomore nase i ŋutu logon ’debba kilo saresi, kweja adi yupet gwe a ŋo kana a milye lo Ŋun gwe ’bak ’bulit. 15Kogwon ko saret kata riŋet kata, ama ko saret ’bayin, a ’beleŋgu na saret gwe ’bayin, a riŋet koti gwe ’bayin. 16#Gal 3.7Nye ŋina kwe nagon kine ŋo kona kogwon yupet, anyen ŋo liŋ nagon Ŋun a milyekin tiŋdu kune böŋö tiki kana kogwon ’busan nanyit na nyaŋu, a rukökine nyakwariat liŋ ti Abarayama, ti gwon a na ŋutu ti ŋilo Saret ka ’de, ama köti a na ŋutu lo yubbo kulo gwoso na yubbe Abarayama nu, kogwon lepeŋ a merenye likaŋ liŋ,
17 #
Sul 17.5
gwoso na jamarikin i kulya ti Ŋun na wurö kune adi, Nan Ŋun aje tiŋdu do i gwon a merenye lo jurön jore.Ŋina ruket a gwak ko Ŋun i komor logon Abarayama yuyuŋ lo, ŋilo a Ŋun logon torujö ŋutu lo twatwa lo, a luŋgi ŋutu logon nyuŋ ’bak yuŋwe kulo gwoso logon aje yuŋwe. 18#Sul 15.5Ma ’di nagon Abarayama ’bak yenet na yuŋ undyö ama lepeŋ nyuŋ yeyen ko yuyuŋ anyen nye böŋö gwon a merenye lo jurön jore, gwoso na takiŋdye Ŋun nye nu adi, Nyakwariat kulök mo gwon jore gwoso kaser. 19#Sul 17.17Lepeŋ gwe nyona ko kiŋajin mia geleŋ, ama yupet nanyit a ko rorogga na yeyeji nye mugun gwe nyona ko twan nu, se ko na yeyeji nye adi Sara gwe a ’baŋ nu.
20Lepeŋ a ko kö ’yu yubbö, a nye gwe a ko dyadya ’yu i ŋo nagon Ŋun a milyekin tiŋdu lepeŋ kune, ama a lepeŋ wuji riŋit kogwon yupet nanyit, a lepeŋ iŋge bu ’ya Ŋun; 21kogwon lepeŋ ’diri a yinikin adi Ŋun bubulö koŋdya ŋo nagon nye a milyekin tiŋdu kune.
22Nyena ko kwe na ŋina yupet nanyit, a Ŋun iŋge ruk lepeŋ a lo rigwo. 23Kulyaesi logon adi Ŋun a ruk lepeŋ a lo rigwo kulo, a ko wurö i kulya ti Abarayama ka ’de, 24ama köti a wurö i kulya kaŋ. Yi logon a yubbö adi nye a toŋiju Matat likaŋ Yesu i twan kulo Ŋun mo ruruk yi a lo rigwo köti.
25 #
Yis 53.4, 5 Ŋilo a Yesu logon a tatua kogwon toronjin kaŋ, a iŋge toŋiyu anyen tetenayeiŋdya yi a lo rigwo ko Ŋun i komor lo.
Currently Selected:
Roma 4: BBE
Highlight
Share
Copy
Want to have your highlights saved across all your devices? Sign up or sign in
Bari Bible © United Bible Societies, 1979.
