Roma 5

Yi a tetenaki a lo rigwo ko Ŋun i komor

1Nyenagon kogwon yi a tetenaki a lo rigwo ko Ŋun i komor kogwon yupet na, a yi gwe ko taliŋ ko Ŋun kogwon kulya ti Matat likaŋ Yesu Kristo. 2Lepeŋ a pakiŋdya yi kiko logon yi ryeji ’busan na nyaŋu nagon yi gwogwo ’di ’e na, a yi lyoŋi lyöŋön i yeŋdu adi yi mo parundya minyo lo Ŋun. 3iŋkoi, a yi köti lyöŋi lyoŋön i sasanyesi kaŋ, kogwon yi deden adi sasanyesi tiŋdu yi i ŋoŋaddu diŋit a najo, 4a koyi aje ŋoŋaddu diŋit a najo kweja adi yi aje tema ajo, a tema nikaŋ ajo tiŋdi yi i yeŋdu na Ŋun.

5Ŋina yenet ti tuyaŋ yi kogwon Ŋun a ’bukökin nyaret nanyit kayaŋ i töilyet kogwon Mulökötyo Loke logon nye a tikin yi lo.

6Kogwon i diŋit gwak nagon Ŋun a wulun na gwoŋdi yi nyuŋ a lomunyak nu, Kristo a twan kogwon ŋutu logon ti twöju Ŋun. 7A ŋo nago ko lele ŋuto i twan kogwon kulya ti lele ŋuto lo rigwo, iŋkoi, ko ködyö ŋuto a purutat, lepeŋ ködyö twatwan kogwon ŋuto lo ’but. 8Ama Ŋun a kwekin yi adi nye nyanyar yi parik, kogwon i diŋit nagon yi nyuŋ gwon a katoronyak nu, a Kristo iŋge twan kogwon kulya kaŋ.

9Soŋinana rima kanyit aje tetenakin yi a lo rigwo ko Ŋun i komor, nyena bia parik lepeŋ nio lwölwök yi i woran na Ŋun. 10Kogwon ko twan na Ŋuro lo Ŋun a tomoruŋdya yi ko Ŋun i diŋit nagon yi nyuŋ a merok nu, bia parik yi logon aje tomora ko Ŋun kulo mo lwölwökö kogwon Ŋuro lonyit aje ru i twan. 11Ama ’bayin a kine ŋo ka ’de, ama yi köti lyöŋön ko Ŋun kogwon kulya ti Matat likaŋ Yesu Kristo, logon soŋinana aje tomor a yi ko Ŋun lo.

Kulya ti Adama ko ti Kristo

12 # Sul 3.6 Dene ta den adi toron lupe i na kak i kulya ti ŋuto geleŋ, a toron joŋdi twan, nyena a twan reki i ŋutu liŋ kogwon ŋutu liŋ a toroŋdya.

13Iŋkoi, toron köju kata i kak i ŋerot nagon saret a ko nyuŋ tiki nu, ama ko saret ’bayin toron ti kenaki ŋutu.

14Ama suluja i diŋit na Adama tojo ko diŋit na Mose, twan tutumatyan ma ’di ko ŋuto logon a ko toroŋdya gwoso na toroŋdi Adama i ’beleŋo na saret lo Ŋun nu.

Ŋilo Adama a kweyet lo nye lo popo lo. 15Ama tuka ’de kata a duma, kogwon ’doket nagon ŋun a ’doggi ŋutu ’bak ropet na a duma bia parik lwölwöŋ toron na kon Adama nu. Kogwon ko ködyö toron na ŋuto geleŋ a jakiŋdya ŋutu jore twan, nyena bia parik a ’busan na nyaŋu na Ŋun aje baranyakiŋdya i ŋutu jore parik. ŋina ’busan na nyaŋu, Ŋun ’doggi ŋutu ’bak ropet ko ŋuto geleŋ i mugun logon a Yesu Kristo. 16iŋkoi, tuka ’de kata i kiden na ’doket nagon ŋun ’doggi Ŋutu ’bak ropet na se ko toron na lu ŋuto geleŋ. Kogwon ŋina toron na lu ŋuto geleŋ joŋdya ’duŋöki adi nye a loron, ama i mukök nagon ŋutu a koŋdya toronjin jore a Ŋun ’doggi lepeŋat kana i ’duŋökiŋdyö na se adi se ’bak kulya.

17Nyena ko twan tutumatyan kogwon toron na ŋilo Ŋuto geleŋ, bia parik ŋutu logon Ŋun a ’dogga se kana anyen gwon rigwo kanyit i komor kulo kogwon ’busan nanyit na nyaŋu nagon a baraŋdu na, kilo ŋutu mo gwon jörun a gwe a katelak ko ŋuto geleŋ i mugun logon a Yesu Kristo lo.

18Nyena ko toron na ŋuto geleŋ tiŋdu ŋutu liŋ i ’duŋöki adi se a lorok, sona köti ŋo nagon ŋuto geleŋ n kon rigwo na tiŋdu Ŋutu liŋ i ’duŋoki adi se ’bak kulya, a tiŋdi lepeŋat i gwon jörun. 19Kogwon ko ŋuto geleŋ a ’beleŋo saret a tiŋdi ŋutu jore i gwon a katoronyak, sona köti ko ŋuto geleŋ a twöju Ŋun, a ŋutu jore konani a lo rigwo ko Ŋun i komor.

20Saret a jukiŋdya nyin anyen ’ya ’yu toron, ama ko toron aje odi, a ’busan na nyaŋu na Ŋun baraŋdi baraŋdu bia parik. 21Nyena gwoso nagon tumatyan na toron jakiŋdya ŋutu twan na, sona köti tumatyan na ’busan na nyaŋu na Ŋun tiŋdu ŋutu i gwon rigwo ko Ŋun i komor, a tiŋdi se ru na yeŋ nyin kogwon Matat likaŋ Yesu Kristo.

Currently Selected:

Roma 5: BBE

Highlight

Copy