Matayo 7

An ta ko lilija ta kulya ti kulye ŋutu

(Köti Luka 6.37-38, 41-42)

1An ta ko liŋ ta kulya ti kulye ŋutu, anyen kulya kasu mo gwon ti lilia. 2#Mar 4.24Kogwon liliet nagon ta lileŋ na mo liliki i ta, a temet nagon ta yeŋ temakiŋdye kulye ŋutu na nye mo köti na temaki ’e ta. 3Ko nyo nagon do meddya korodoti na ’dit na gwon ko luŋösur i koŋe na, ama a do tine met bau na gwon konut i koŋe na? 4Do bubulö kulya ada ko luŋaser ilot adi, Ti nan kurutu ŋina korodoti na ’dit kaŋo konut i koŋe, kudyakan bau kata konut i koŋe. 5Do kamumulukanit, a kokwe kiyaŋ ’dumu bau kaŋo konut i koŋe, a kirut a do bulöni bulö meddya ’bura i kurutuŋdyö na korodoti na ’dit kaŋo ko luŋösur i koŋe. 6Ko tiŋdu ta ’dioŋ jin ŋo nagon a nake na rurwan, kode ko gubakiŋdya ta wuryö margaritajin kasu na gwörö go; ko ta koŋdya sona lepeŋat mo ryoryok se ko mok, a mo wöriŋöni i kekereŋdya na ta.

Pije ta, gale ta, totoggi ta kötumit

(Köti Luka 11.9-13; 6.31)

7Pije ta, a ta de tikine tiki; gale ta, a ta de ryöni ryo; totoggi ta, a ta deŋakine ŋaki. 8Kogwon ŋutu liŋ lo piyuŋdya kilo wuwuju, nye lo ga ’yu lo ryöryö, a nye lo totoggu lo ŋakine ŋaki. 9Kode lon ŋuto losu logon ko ŋuro lonyit a piyuŋdya ambata, a i pirit na ambata a kölumbö tiŋdi lepeŋ ŋurupit? 10Kode ko lepeŋ a piyuŋdya sumuti, a i pirit na sumuti a nye kolumbö tiŋdi lepeŋ munu? 11A ko ta logon a ŋutu lorok kulo deden tiŋdu ŋwajik kasu ŋo na ’but, a bia parik Monye losu lo gwon ki lu mo titin ŋutu logon a pija lepeŋ kulo ŋo na ’but!

12 # Luk 6.31 Nyena konakiŋdye ta ŋutu ŋo nagon ta ’de ’dekan adi ti se konakiŋdye ta na, kogwon Saresi ti Mose se ko ŋo na wur nebijin kune tökoŋu sona.

Lilim lo kötumit nagusu

(Koti Luka 13.24)

13Lupöri ta kötumit nagusu, kogwon kötumit a nagalaŋ ko kiko a luŋa laŋ logon tirikin pölilyö i twan, a ŋutu gwe jore logon tirikata. 14Kogwon kötumit a nagusu ko kiko a Iŋgo logon tirikin i ru, a ŋutu gwe ku ’dik lo ryeju nye.

Ködini dena i ludweki kanyit

(Köti Luka 6.43-44)

15Kunyar ta nebijin kamumulukak logon po kasu ni meta gwoso köbilu, ama i lukata nase lepeŋat ’diri gwoso lujin kakerenyak. 16Ta mo deden se i konesi kase. ŋutu ŋona bubulö ’deja ludweki ti binyo i kaden logon a kikwa, kode ’deja ki ’biet i losisilaŋ?

17Ködini lo ’but ŋupi radan ludweki lo ’but, ama ködini loron radan ludweki lorok. 18Ködini lo ’but ti bulö radan ludweki lorok, köti a ködini loron tine bulö radan ludweki lo ’but. 19#Mat 3.10; Luk 3.9Kaden liŋ logon ti radan ludweki lo ’but kilo toko kak a gubani i kimaŋ. 20#Mat 12.33Nyenagon ta mo deden nebijin kamumulukak i konesi kase.

Nan a ko den ta kwöŋ

(Köti Luka 13.25-27)

21Ti gwon a ŋutu liŋ lo luŋgu nan adi, MATAT, MATAT kilo, logon mo lupö i Tumatyan na Ki, ama ka ’de ŋuto lo koŋdya ŋo nagon Baba lo gwon ki lu ’de ’dekan lo mo lo lupö. 22I ŋilu lor lo ’dutet ŋutu jore mo kukulya ko nan adi, MATAT, MATAT, yi a ko keju i karin kunök le? Yi a ko riköddu mulökö lorok kaŋo i karin kunök le? Yi ŋona a ko koŋdya konesi sörösi jore i karin kunök? 23#Sau 6.8A kirut a nan mo tukökiŋdye se adi, Nan a ko den ta kwöŋ; wuddye ta wuddya köyö i komor ta kakonak ti toronjin.

Lilim lo ka ’dukök murek

(Köti Luka 6.47-49)

24Nyenagon ŋutu liŋ logon a yiŋ kulyaesi kwe a kone kon se kilo, mo gwon gwoso ŋuto lokoŋ logon a ’dukökiŋdyö kadi nanyit i lelya loki. 25a kudu ’done ’don, a bar poŋdi po, a köbuŋötön wuŋge wuggö, a puke puk nu kadi, ama a nye tine ’doro, kogwon nye a ’bokara kak i lelya. 26Ama ŋutu liŋ logon yiyiŋ kilo kulyaesi kwe a tine kon se kulo, mo gwon gwoso ŋuto lu ’böŋ logön nyekakiŋdya kadi nanyit i sese. 27A kudu ’done ’don, a bar poŋdi po, a köbuŋötön wuŋge wuggö, a puke puk nu kadi, a nye iŋge ’döro adi yurum.

Yesu gwon ko kido

(Köti Marako 1.22)

28 # Mar 1.22; Luk 4.32 A Yesu ko tutuŋge jambu kulo kulyaesi, a lodir lo ŋutu iŋge söŋu ko todiŋdyö nanyit, 29kogwon lepeŋ todiŋdyö se gwosö ŋuto logon ko kido, ti gwon gwoso katodinök kase ti Saresi ti Mose.

Currently Selected:

Matayo 7: BBE

Highlight

Copy