Malaki 3

1 # Mat 11.10; Mar 1.2; Luk 1.76; 7.27 Nan MATAT lo kurumi lo kulya adi, Mete, nan soson luyökie lio i tetenaddu na kiko koyo ŋerot, a nan MATAT logon ta gaga lo mo poŋdi a lunya den koyo i kadi; mete, luyökie lo tomoret logon ta a lyöŋgi lo odo popo.

2 # Yoe 2.11; Kwe 6.17 Ama ŋa logon jojo ŋoŋga i lor lo poŋdi nye lu? ŋa logon jojo gwo ’dan na pukuŋdye nye nu?

Kogwon nye gwon gwoso kimaŋ na bodo kanamanit ko gwoso sabun tokwekweyet lo boŋgwat; 3a nye mo si ’dani gwoso kanamanit ko gwoso katokelanit lo podo, a nye mo toke ’yi ŋwajik ti Lewi, a mo nambi se gwoso dakap ko podo i namaddu na korodo kaŋo tojo ko se a wukiŋdya MATAT ’dokesi na rigwo. 4A kirut ’dokesi na ’doggi ŋutu ti Yuda ko ti Yerusalema kune mo gwe a na ’but ko MATAT gwoso i perok ti koju ko gwoso i kiŋajin ti ’beron kulu.

5Nan MATAT lo kurumi lo kulya adi, Nan mo mimijoro kasu nyona i ’duŋgo na putet; a nan mo gwe ajo i tökoŋu arabat kulya ti ka ’demak, ko ti kalupok, ko ti kamilyok logon milyeju a wuya kana kilo, ko ti karudak ti ŋutu lo roröpaki kita, ko ti karudak ti karu ’be-jin, ko ti karudak ti kikijiko, ko ti se lo dukaddu ŋutu logon a lepelok kilo. Kilo a ŋutu logon ti kujono nan.

Tiŋdu na ’dokesi topuökisi

6Kogwon nan MATAT ti lopuggo kwoŋ; nyena ta nyakwariat ti Yakobo, ta a ko tukara. 7Suluja i perok ti merenyejin kasu, ta aje girara kaŋo i saresi kwe lo wuro, a ta gwe a ko ’dep se. Nan MATAT lo kurumi lo kulya adi, Yitwene ta koyö ni, a nan koti yitöni kasu ŋini. Ama a ta pipije adi, Yi yito ada? 8Adi, ŋutu bubulo koko ’ya ŋun le? Ama ta kilo gwon i koko ’ya na nan. A ta pipije adi, Yi a koko ’ya do ada? Adi kogwon ta a ko tiŋdu topuo kisi kasu se ko ’dokesi. 9Ta a lömö ko lomit, kogwon ta utu ti Jur liŋ gwon i koko ’ya na nan. 10#Lew 27.30; Ken 18.21-24; Nyö 12.6; 14.22-29; Nem 13.12Jo ta topuökisi liŋ i kadi ’delet, anyen böŋö kinyo gwon kata koyo kadi; nan MATAT lo kurumi lo kulya adi, Tembi ta nan ko ŋina temet ko nan ti pakin ta kwilisesi ti ki i ’bukökiŋdyo na ta ’boriet nagon ’bak temet. 11A nan mo riŋge ŋo lo nyesu kinyojin kogwon kulya kasu an se ko koŋu ludweki ti kak nasu; a kaden kasu ti binyo lo gwon i meleseno kulo mo tine jaran i radan na ludweki, nan MATAT lo kurumi lo kulya. 12a juron liŋ mo luŋgi ta a kalyöŋök, kogwon ta mo gwon a Jur kalyöŋonit, nan MATAT lo kurumi lo kulya.

Tuka ’de na ŋuto lo loti lo ’but se ko ŋuto loron

13Nan MATAT lo kulya adi, Ta aje Tamakiŋdya nan kulyaesi iŋgo. Kolumbo a ta pipije adi, Yi Tamakin do ada? 14Ta a kulya adi, ’Bulit ’bayin koyi kita-kiŋdya ŋun. ’Bulit a nyo kayaŋ i ’debba na saret lonyit kode i woro ko MATAT lo kurumi i komor gwoso ŋutu logon dedelya. 15Nyenagon a yi luŋgi kabulak ti kusik a kalyoŋok; iŋkoi katoronyak a puputuru ŋerot; iŋkoi a se mori ŋun ama a se iŋge rwoddu.

16A se logon kukuk MATAT kulo tujamaki ko ’borik; a MATAT togwi ’di-kiŋdye swo kanyit a yiŋge se, a karin ti ŋutu lo kukuk MATAT ko yeyeju karin kanyit kilo iŋge wuro i buk kanyit i komor anyen yeyeŋ. 17A nan MATAT lo kurumi kulyani adi, Se mo gwon a ŋutu kwe, iŋkoi, se a ŋutu kwe lomoriot gwak i ŋilu lor lo kitari nan lu, a nan mo wone konyen ko lepeŋat gwoso nagon ŋuto won konyen ko ŋuro lonyit logon kitakiŋdya lepeŋ lo.

18A ta mo yitwene i kuruŋdyo na tuka ’de i kiden na ŋuto lo loti lo ’but se ko ŋuto loron, ko i kiden na ŋuto lo kitakiŋdya ŋun se ko nye logon ti kitakiŋdya lepeŋ lo.

Currently Selected:

Malaki 3: BBE

Highlight

Copy