1 Korinto 5
5
Toluŋ kata i kiden na kanisa
1 #
Nyö 22.30
’Diri ŋutu gwon i jambu adi toluŋ kata kasu kiden; ŋina toluŋ a naron ma ’di Iwolwoŋ ŋo na kon paganojin na; adi ŋuto gwon ko narakwan na monye lonyit. 2A kirut ta bu ’ye ’börik ada? Kölumbö ta ködyö dedelya, anyen ŋuto lo koŋdya ŋo gwoso ŋina lo kodyö riköji kaŋo kasu kiden.
3Ma ’di ködyo nan ko mugun nio ’bayin ŋini, ama köyö i töili yi gwon ko ta i pirit na geleŋ, a nan iŋge ’duŋökin putet 4i karin ti Matat Yesu i ŋuto lo koŋdya ŋo gwoso ŋina lo, gwoso nagon nan ’diri kata ŋini. Na momori ta nu, a toili lio gwe kasu ŋini, se ko riŋit na Matat likaŋ Yesu, 5a ta ködyö ŋutö kiŋdye ŋilo ŋuto ko Satani i riŋit anyen kökör mugun nanyit, anyen ködudwö nanyit böŋö lwölwökö i lor lo pöri Matat lu.
6 #
Gal 5.9
Bu ’ya nasu na kusik ’bayin a na ’but. Ta a ko den le adi kape ku ’dik toyujö wi ’di liŋ? 7#Yuö 12.5Nyenagon ’bukörö ta kape logon a ŋoroko kilo kaŋo anyen ta böŋö gwon a ambata ludukötyo. Ta gwon gwoso ambata nagon ’bak kape nagon nyei i Pasaka; kogwon rorwe likaŋ lo Pasaka aje suluki, kilolor aje ’duŋö logon a Kristo. 8#Yuö 13.7; Nyö 16.3Nyena ti yi koŋdi ta rorwe, ’bayin ko ambata nagon ko kape poroko logon a ŋisa ko toron, ama ko ambata nagon ’bak kape, iŋkoi, ambata nagon a kelan se ko kulya ’diri.
9I leta nagon nan aje wurökin ta nu, nan aje takin ta adi, an ta ko momora ta ko Ŋutu kalupok. 10Nan ’bayin jambu adi ta ködyö paju Ŋutu liŋ ti na kak logon a kalupök, kode logon a kagomak, kode a karyakak, kode a kakwakwasak ti nyömuejin; ko ködyö nan a jambu adi ta kodyö paju lepeŋat, a ta ködyö wuddye wuddya i na kak asut. 11Ama kulya na wur nan kunu kweja adi, ta ködyö ti mora ko lele Ŋuto logon luŋgu mugun a luŋaser lo yubbö ko nye a kalupönit, kode a kagomanit, kode a kakwakwasanit lo nyömuejin, kode a kamomoronit, kode a kamere, kode a karyakanit. An ta ko si ’da ta ma ’di i nyesu ko Ŋuto gwoso ŋilo i pirit na geleŋ. 12#Nyö 13.5; 17.7Kulya kwe a nyo i ’duŋgö na kulya ti Ŋutu ti kaŋo? Ama ta a ka ’duŋok ti Ŋutu lo gwon i momoret na kayupök. 13Ŋun lepeŋ a ka ’duŋonit lo kulya ti Ŋutu lo gwon kaŋo kilo. Nyena riköddi ta ŋuto loron kaŋo kasu kiden.
Currently Selected:
1 Korinto 5: BBE
Highlight
Share
Copy
Want to have your highlights saved across all your devices? Sign up or sign in
Bari Bible © United Bible Societies, 1979.
