1 Korinto 6

Kayupök yegga ’börik i putet

1Ko lele losu gwon ko kulya ko luŋaser lo yubbö lo, kwe nanyit Ŋona ti yu i joŋga na lepeŋ i putet ko paganojin i komŋo le? Ko nyo lepeŋ joŋ i komor na ŋuto ti Ŋun? 2Ta a ko den adi ŋutu ti Ŋun mo lo ’duŋgö kulya ti ŋutu ti na kak le? A kirut ko ta molu lo ’duŋgö kulya ti na kak, a ta ŋona ti jukin i lilija na kulya na ’di ’dik le? 3Ta a ko den adi yi molu lo ’duŋgö kulya ti malaikajin le? A bia parik yi ŋona ti bulö ’duŋgö kulya ti lo gwiliŋit le? 4A ko kulya gwoso kine a pukun, ta ŋona jojoŋ i tetena ko ŋutu logon kanisa ti twö se kulo le? 5Nan wuŋö kine kulya anyen toyujö kusik kasu. ’Diri gwak ŋuto geleŋ lokoŋ Ŋona ’bayin kwoŋ kasu kiden logon bubulö teteŋdya kulya i kiden na luŋasirik kayupök le? 6A kölumbö luŋaser joŋgi luŋaser i putet, ma ’di tojo i komŋo na ŋutu logon a ko yubbö kilo.

7Toyek nasu i putet ŋona ti kwekiŋdya adi ta a ’doro i yupet le? Bia parik ta ŋona ti ŋoŋga ko ta konaki arabat le? Bia parik ta ŋona ti ŋoŋga ko ŋutu a mumulugga ta le? 8Kölumbö a ta ko mugunya kasu konakiŋdye ’borik arabat a mumuluŋge ’börik, ta logon a luŋasirik kayupök gwak. 9Ta a ko den le adi katoronyak mo ti gwon a ŋutu ti tumatyan na Ŋun le? Ko kaka lakiŋdya ta ’börik; kweja adi kawutejin, kode kakwakwasak ti nyömuejin, kode kalupejin, kode ŋutu lyan logon dodototu ko ’börik, 10kode kolak, kode kagomak, kode kamerak, kode kamomorok, se ko karyakak, ŋutu gwoso kilo mo ti gwon a ŋutu ti tumatyan na Ŋun.

11Kulye kasu köju gwoso kilo ŋutu, ama ta aje lalai, ta aje tokela a ŋuto ti Ŋun, ta aje tiki i gwon a lo rigwo ko Ŋun i komor i karin ti Matat Yesu Kristo se ko i riŋit na Mulökötyo lo Ŋun likaŋ.

Bu ’ye ta Ŋun kasu i mugunya

12 # 1 Kor 10.23 Kode ta kulya adi, Yi a lui i koŋdya na ŋo liŋ. Iŋkoi, yi ’diri a lui, ama ŋo lio parakiŋdya. Nan a luitöt i koŋdya na ŋo liŋ, ama nan ti ’bön gwon a ’dupiet lo nene ŋo. 13Ta köti kulya adi, Kinyo a lo pele, a pele gwe a na kinyo. Iŋkoi, ama Ŋun mo tutu’baka se liŋ. Mugun na ŋuto ’bayin gweki a na wutön, ama a na Matat, a Matat gwe a monye lo mugun na ŋuto.

14Ŋun a toŋiju Matat i twan; lepeŋ ko riŋit nanyit mo köti totoŋi yi i twan.

15Ta ti den le adi mugunya kasu aswötön ti mugun na Kristo? Ti nan ’dumuŋdye swöt lo mugun na Kristo anyen gwon a mugun geleŋ ko kawute le? ’Bayin kwoŋ. 16#Sul 2.24Ta a ko den le adi ko ŋuto logon a mora ko kawute lo, ŋilo ŋuto a wora a mugun geleŋ ko lepeŋ? Kogwon a tukö i kulya ti Ŋun na wurö kune adi, Se liŋ murek mo gwon a mugun geleŋ.

17Ama ko ŋuto a tomorakiŋdya töili lonyit ko Matat, a se gwe a ŋo geleŋ i Mulökötyo Loke. 18Paji ta towutön. Kunie toronjin liŋ nagon ŋutu kökon kune ti bulö morga mugunya kase, ama ŋuto logon koŋdya towutön lo, lepeŋ toroŋdya mugun nanyit. 19#1 Kor 3.16; 2 Kor 6.16Ta a ko den le adi, mugunya kasu a kadi na Mulokotyo Loke lo gwon kasu i mugunya, logon Ŋun a tikin ta lo le? Ta ’bayin gwon a ’borik ko mugunya kasu ama ta a ti Ŋun. 20Lepeŋ a gworun ta ko ropet duma, nyena bu ’ye ta Ŋun kasu i mugunya.

Currently Selected:

1 Korinto 6: BBE

Highlight

Copy