1 Korinto 4
4
Luyökie ti Kristo
1Nyena ta ködyö yeye yi adi yi a kölipönök ti Kristo. Ŋun aje wulun yi i tiju na lwönö kanyit ti Ŋun.
2Ama katiyuk agu ködyö yiyiniki i kitajin kase. 3Ama meta a na ’dit köyö adi ta kode kulye ŋutu ködyö lilija kulya kwe, ma ’di nan ko Rigun nio ti lilija kulya kwe. 4Kogwon nan ti den nene ŋo naron nagon nan a kon, ama ŋina ti kweja adi nan ’bak kulya. Ama Matat lo lilija kulya kwe. 5Nyenagon ko lilija ta kulya ti lele Ŋuto i ŋerot na nu diŋit, tojo ko Matat a po. Lepeŋ mo kwe kweyun Iwono na gwon i mudwe kune i parara, iŋkoi, lepeŋ mo kwekwe yeyeesi nagon ŋutu a ’de kase i töilyet kune. A kirut Ŋun mo pupurje ŋutu liŋ geleŋ geleŋ.
6Nyena luŋasirik, nan aje löpukun kine kulya gwoso miret kayaŋ ni yi ko Apolo kogwon kulya kasu, anyen ta böŋö denuŋdya kayaŋ adi ti ta gwe ti Iwoŋ kulya ti Ŋun nagon a wuro kune, anyen lele losu boŋo gwon ti bu ’ya mugun i kulya ti lele ŋuto a lauŋdye lele. 7Löju, nyo lo tiŋdu do gwon ka ’de lwölwöŋ kulye ŋutu? Ŋo a nyo konut nagon do a ko wu? A ko do a wu lepeŋ, a nyo nagon do bu ’ye mugun gwoso nye ’bayin a ’doket?
8Ta soŋinana aje yimöno ko ŋo liŋ, ta soŋinana gwe a kwörinikö, ta tutumatyan, ma ’di kodyö yi ’bayin. Iŋkoi, nan ’de ’dekan ta tutumatyan ’diri anyen yi tutumatyan ko ta i pirit na geleŋ! 9Kogwon meta köyö gwoso nagon Ŋun aje kwekiŋdya yi luyökie gwoso ŋutu ti ’dutet. Yi gwon gwoso ŋutu logon a ’buruki i tatua i pirit nagon a terere anyen kwekweniarikin, kogwon yi gwon gwoso ŋo nagon kak ’bukuluŋ didir, kweja adi a ŋo nagon malaikajin se ko ŋutu didir na. 10Yi a lu ’boŋ kogwon kulya ti Kristo, ama ta a lokoŋ ko Kristo i mugun! Yi a lomunyak, ama ta a iŋgo! Ta a bula, ama yi a lawe!
11Tojo ko na diŋit yi gwon ko magor se ko kure; yi jupu kereketwat, yi ’bi’bitotu; yi ’bak pirit; 12#Kon 18.3yi dadara parik i kita ko konisi kaŋ. Ko ŋutu a lombu yi, a yi luŋgi Ŋun anyen ’boroja lepeŋat; a ko se a sasaŋdu yi, a yi ŋoŋgi taliŋ;
13a ko ŋutu a momoröju yi, a yi waddi lepeŋat ko kulyaesi lo ’but. Ŋutu konakiŋdya yi gwoso yi a korodo ti na kak, iŋkoi, tojo ko na diŋit yi meta gwoso lut na ’bukoŋ mu ’diŋ.
14Nan ’bayin wurokiŋdyo ta kine kulya anyen toyujo kusik kasu, ama anyen kukuju ta gwoso ŋwajik kwe lonyanyara. 15Ma ’di ta ködyö gwon ko kanyömok alipan puök ko Kristo i mugun, ama ta ti gwon ko komonye jore. Kogwon nan lo yupuŋdyö ta ko Kristo Yesu i mugun kogwon tokujö nio na Loŋe Lo ’but. 16#1 Kor 11.1; Pil 3.17Nyenagon nan mo ’yu ta, böŋö mirakiŋdye ta nan.
17Ko ŋina kwe nan ŋilo soson Timoteo kasu ŋini. Lepeŋ a ŋuro lio lonyanyara ko yiyiniki ko Matat i mugun. Lepeŋ mo totoyiyikin ta kulya ti gwiliŋit lio ko Kristo i mugun ko nan gwolor ada, gwoso nagon nan todinikiŋdye kanisajin liŋ i piritön liŋ ko se ködyo gwolor ada ko Kristo i mugun. 18Kulye kasu yeyeju adi nan ködyö ti tu i ’yö ’yu na ta, a se gwe a kabulak ti kusik. 19Ama ko Matat ’de ’dekan, nan ŋilo mo tutu kasu ŋini ’de ’de; a nan mo denuŋdye kaŋo ko riŋit konet na kilo kabulak ti kusik gwon ada, ti gwon a kulyaesi lo jam se kilo. 20Kogwon tumatyan na Ŋun ti gwon a kulya na jajama, ama a kulya ti riŋit konet. 21Ta ŋona ’dek nyo? Ta ’dek adi ti nan iti kasu ŋini i ’biddyö na ta ko koli? Kode ti nan iti kasu ŋini ko nyaŋu ko toili lokoyok?
Currently Selected:
1 Korinto 4: BBE
Highlight
Share
Copy
Want to have your highlights saved across all your devices? Sign up or sign in
Bari Bible © United Bible Societies, 1979.
