TITOS 2

Ka jinghikai bajanai

1Hynrei, ma me, to kren ïa kita kiei kiei ruh kiba dei ïa kata ka jinghikai bajanai: 2ba ki riewtymmen kin long kiba sharai, kiba shida, kiba khan adkar, kiba janai ha ka jingngeit, ha ka jingieit, ha ka jingïaishah. 3Ba ki kynthei tymmen kin long kumjuh, kiba leh khia leh don akor ha la ka jinglong jingim, ym kiba kren siar, lymne ïa kiba la pynlong mraw ha ka dih Waiñ shibun, ki nonghikai ïa ka babha; 4ba ki lah ban hikai ïa ki kynthei samla ban ieit ïa la ki tnga, ban ieit ïa la ki khun, 5ban long kiba khan adkar, kiba sngur, kiba trei ha la ïing, kiba sbun, kiba kohnguh ïa la ki tnga, ba yn ym krenbeiñ ïa ka ktien U Blei. 6Kumjuh ïa ki rangbah ba kham samla, to sneng ban long kiba khan adkar. 7Ha kiei kiei baroh, da pyni ïa lade ka rukom ha ki jingleh babha: ha la ka jinghikai da pyni ïa ka jingsngur, ïa ka jingsngewkhia, 8ïa ka ktien janai, ïa ka bym lah ban pynrem; ba uta uba ïaleh pyrshah un ïoh lehrain, naba um don ei ei ka basniew ban ong shaphang jong ngi. 9To sneng ïa ki shakri ban kohnguh ïa la ki kynrad, bad ban pynsngewbha ïa ki ha kiei kiei baroh, ym kiba ïa-pharshi kylliang; 10ym kiba buit'ti, hynrei, kiba pyni ïa ka jingsngur babha baroh; ba ha kiei kiei baroh kin pynitynnad ïa kata ka jinghikai jong U Blei U Nongpynim jong ngi.

11Namar ka jingaiei ka jong U Blei ka la paw, kaba wallam jingpynim ha ki briew baroh, 12kaba hikai ïa ngi, khnang ba haba la len noh ïa ka jingbymriewblei bad ïa ki jingkwah brai ka pyrthei, ngin ïoh im bakhan adkar, bad bahok, bad bariewblei, ha kane ka pyrthei kaba mynta; 13kiba ïakhmih ïa kata ka jingkyrmen basuk, bad ïa ka jingmihpaw ka burom jong U Blei Bakhraw bad U Jisu Khrist U Nongpynim jong ngi; 14#Eks. 19:5; Deu. 4:20; 7:6; 14:2; 26:18; Salm. 130:8; Ese. 37:23; 1 Pet. 2:9.uba la aiti noh ïa lade na ka bynta jong ngi, ba un ïoh siewspah noh ïa ngi na ka jingbymhok baroh, bad ba un pynkhuid ha lade hi ïa u paidlang ban long ka bynta kynti jong u hi, uba shitrhem ïa ki jingleh babha.

15Ïa kine kiei kiei ruh, to kren bad to kyntu, bad to sneng kum uba don bor. Wat shah ba uno uno ruh un ibeiñ ïa me.

Currently Selected:

TITOS 2: KHB

Highlight

Copy