TITOS 1

Ka jingkhublei

1U Paul, u shakri U Blei, bad u apostol U Jisu Khrist, katba kum ka jingngeit kiba la jied jong U Blei, bad ka jingtip ïa ka jingshisha kaba katba kum ka jingriewblei; 2ha ka jingkyrmen ïa ka jingim bymjukut, ïa kaba U Blei, u bym lah ban lamler, u la lah kular mynshuwa ki por bymjukut; 3hynrei, ha ki Ïa jong u hi, u la pynpaw ïa ka ktien jong u ha ka jingïalap, ïa kaba la aiti ha nga katba kum ka hukum ka jong U Blei U Nongpynim jong ngi;

4 # 2 Kor. 8:23; Gal. 2:3; 2 Tim. 4:10. Ha u Titos, u khun bashisha jong nga katba kum ka jingngeit ba ïadei lem:

Ka jingaiei bad ka jingsuk na U Blei U Kpa bad U Khrist Jisu U Nongpynim jong ngi.

Ka kamram u Titos ha Krit

5Na ka bynta kane, nga la iehnoh ïa me ha Krit, khnang ba men ïoh buh beit ïa kita kiei kiei kiba dang duna, bad ban thung ïa ki tymmen basan man la ka shnong, kumba nga la hukum ïa me: 6#1 Tim. 3:2-7.lada uno uno ruh u long uba khlem shah kynnoh pop, u tnga jong kawei ka tnga, uba don ki khun kiba ngeit, ki bym shym la budnam lane bymkohnguh. 7Namar ka dei keiñ ïa u nongsharai ban long uba khlem shah kynnoh, kum u sordar jong U Blei; ym uba ïaid mon, ym uba bitar shen, u bym shait ïamai, u bymïashoh ïadat, u bymkhwan myntoi; 8hynrei, uba khot ieit basa, uba ieit ïa ka babha, uba khan adkar, u bahok, u bakhuid, uba don bor halor lade; 9uba bat skhem ïa ka ktien bashisha kaba long katba kum kata ka jinghikai, ba un ïoh long uba lah ban sneng ha kata ka jinghikai bajanai, bad ban pynkynduh ruh ïa kiba ïa-pharshi kylliang. 10Namar don bun ki briew ki bymkohnguh, kiba kren thala thaleiñ bad kiba shukor, kham tam kita kiba na ka jingotsher: 11kiba ïa ki shyntur jong ki dei ban set noh, ki briew kiba pynkyllon ïa ki ïing baroh shi ïing da kaba hikai ïa kiei kiei ki bymdei, na ka bynta ka jingkhwan myntoi. 12Uwei na ki hi, u nongïathuhlypa jong ki hi keiñ, u la ong, “Ki Krit borabor ki long kiba lamler, ki mrad khlaw bymman, kiba jlawnguid ba alhia.” 13Kane ka jingphla ka long kaba shisha. Namar kane ka daw, to sneng tyngeh ïa ki, khnang ba kin ïoh long janai ha kata ka jingngeit; 14ki bym pynshahshkor ha ki puriskam kai jong ki Jiw, bad ha ki hukum ki briew kiba phai dien noh na ka jingshisha. 15Kiei kiei baroh ki long khuid ha kita ki bakhuid: hynrei, ha kita ïa kiba la pyntngit bad ki bymngeit, kaei kaei ruh em kam long khuid; hynrei, la pyntngit ïa ka jingmut bad ïa ka jingïatiplem jong ki. 16Ki phla ba ki tip ïa U Blei; hynrei, ha la ki kam ki len ïa u, ba ki long kiba ijli, bad ki bymkohnguh, bad ha ki jingleh babha baroh ki bymsuidñiew.

Currently Selected:

TITOS 1: KHB

Highlight

Copy