JINGPYNPAW 9

1Bad u angel u basan u la pynsawa; te nga la ïohi ïa u khlur ba la hap na bneng sha ka khyndew; bad la ai ha u ïa u shabi kata ka 'liewlong kaba khlem trai. 2#Jen. 19:28; Eks. 19:18; Jol. 2:10.Te u la plie ïa kata ka 'liewlong bakhlem trai; te ka la leit kiew ka tdem na kata ka 'liewlong, kum ka tdem ka lawar ding kaba khraw; te la pyndum ïa ka sngi bad ïa ka suiñbneng da ka tdem jong kata ka 'liewlong. 3#Eks. 10:12-15.Bad na kata ka tdem la mih noh ki puit halor ka khyndew; bad ha ki, la ai ka bor, kumba ki 'ñianglartham jong ka khyndew ki don ka bor. 4#Ese. 9:4.Bad la ong ha ki ba kin ym pynsniew ïa u phlang ka khyndew, lymne ïa kaei kaei ruh ka bajyrngam, lymne ïa uno uno ruh u dieng, hynrei, tang ïa kita ki briew ki bymdon kata ka jingshon shab jong U Blei halor ki shyllangmat jong ki. 5Bad la ai ha ki ba kin ym pynïap noh ïa ki, hynrei, ba yn pynkordit ïa ki, san bnai: te kata ka jingpynkordit ïa ki, ka la long kum ka jingpynkordit ka 'ñianglartham haba ka la dait ïa u briew. 6#Job. 3:21.Te ha kita ki sngi, ki briew kin wad noh ïa ka jingïap, bad kin ym shem ïa ka satia; bad kin kwah eh ban ïap noh, te kata ka jingïap kan phet noh na ki.

7 # Jol. 2:4. Bad ki dur kita ki puit ki la syriem kum ki kulai ïa kiba la khreh ïa ka thma; bad halor ki khlieh jong ki, ki la don kum ki pansngiat kiba syriem ïa ka ksiar, bad ki khmat jong ki kum ki khmat ki briew, 8#Jol. 1:6.bad ki la don u shñiuh kum u shñiuh ki kynthei, bad ki bniat jong ki, ki la long kum ki jong ki sing; 9#Jol. 2:5.bad ki la don ki jingïada shadem kum ki jingïada shadem nar; bad ka jingsawa ki thapniang jong ki, ka kum ka jingsawa ki kali babun ki kulai haba ki ïatur keiñ sha ka thma; 10bad ki don ki tdong kiba syriem ïa ki 'ñianglartham, bad ki sni; bad ka bor jong ki ban pynsniew ïa ki briew san bnai ka la long ha ki tdong jong ki. 11Bad ki don u syiem halor jong ki, uba u angel kata ka 'liewlong bakhlem trai, uba ka kyrteng jong u ha ka Hebru ka long “u Abaddon”, bad ha ka Grik u don ka kyrteng “u Apollion”.

12Kata kawei ka jingpynkordit ka la dep noh: ha khmih, ki dang wan shuh sa ar ki jingpynkordit hadien.

13 # Eks. 30:1-3. Bad u angel u bahynriew u la pynsawa; te nga la ïohsngew ïa kawei ka ktien sawa na kita ki reng jong kata ka duwan ksiar kaba ha khmat U Blei, 14ka da ong ha uta u angel u bahynriew uba la don kata ka turoi, “To pyllait noh ïa kita ki saw angel ïa kiba la khum hajan kata ka wah ka bakhraw ‘ka Ïuphratis’.” 15Te la pyllait noh ïa kita ki saw ngut ki angel, ïa kiba la khreh khnang ïa kata ka por bad ïa ka sngi bad ïa u bnai bad ïa ka snem, ba kin ïoh pynïap noh ïa ka balai ka bynta jong ki briew. 16Bad ka jingkheiñ ki paidïapom shong kulai ki la long ki arspah hajar ki hajar: nga la ïohsngew keiñ ïa kata ka jingkheiñ jong ki. 17Te kumne nga la ïohi ïa kita ki kulai ha kata ka jingithuhpaw, bad ïa kita kiba shong halor jong ki, kiba don ki jingïada shadem kum ka ding, bad kum ki Haïakinth, bad kum u kyndok; bad ki khlieh kita ki kulai, ki kum ki khlieh ki sing; bad na ki shyntur jong ki, ka mih ka ding bad ka tdem bad u kyndok. 18Da kine lai tylli ki jingïapthem la pynïap noh ïa kata ka balai ka bynta jong ki briew, da kata ka ding, bad da kata ka tdem, bad da uta u kyndok, kiba la mih noh na kita ki shyntur jong ki. 19Naba kata ka bor jong kita ki kulai ka long ha ka shyntur jong ki, bad ha ki tdong jong ki; namar kita ki tdong jong ki, ki syriem kum ki bseiñ, bad ki don ki khlieh, bad da kita, ki pynsniew.

20 # Salm. 115:4-7; 135:15-17; Isa. 17:8; Dan. 5:4. Te kita kiba sah na ki bynriew, ïa kiba ym shym la pynïap noh da kine ki jingïapthem, kim shym la kylla-ka-bamut na kita ki jingleh ki kti jong ki, ba kin ym mane ïa kita ki ksuid, bad ïa kita ki bleithaw kiba da ka ksiar, bad da ka rupa, bad da ka rnong, bad da u maw, bad da ka dieng, ki bym lah ban ïohi, lymne ïohsngew, lymne ïaid: 21bad kim shym la kylla-ka-bamut na kita ki jingpynïap jong ki, lymne na kata kaba ai ksuid jong ki, lymne na kata ka jingïakai kynthei jong ki, lymne na kita ki jingtuh jong ki.

Currently Selected:

JINGPYNPAW 9: KHB

Highlight

Copy