JINGPYNPAW 3

Ka khubor sha ka Balang ha Sardis

1 “Bad ha uta u angel jong ka balang kaba ha Sardis to thoh: Ïa kine kiei kiei ruh u ong uta uba don kita ki hynñiew ki Mynsiem U Blei, bad ïa kita ki hynñiew ki khlur: ‘Nga ithuh ïa ki jingleh jong pha, ba pha don ka kyrteng ba pha im, hynrei, pha long ka baïap. 2To long pha kaba sharai, bad to pynskhem ïa kita kiei kiei ruh kiba sah, ki ban sa ïap noh: namar ngam shym shem ïa kita ki jingleh jong pha kiba la dap janai ha khmat U Blei jong nga. 3#Mat. 24:43,44; Luk. 12:39,40; Jpw. 16:15.To kynmaw, namar kata, kumno pha la pdiang bad pha la ïohsngew, bad to ri skhem ïa ka, bad to kylla-ka-bamut. Namar kata, lada pham sharai, ngan wan kum u nongtuh keiñ, te phan ym ïoh tip ha kano ka por ngan wan ha pha. 4Hynrei, pha don khyndiat ki kyrteng wat ha Sardis ki bym shym la pynbit-tngit ïa ki jaiñkup jong ki: te kita kin ïoh ïaid lem bad nga ha ki jaiñkup balieh; naba ki long kiba dei. 5#Eks. 32:32,33; Salm. 69:28; Dan. 12:1; Mat. 10:32; Luk. 12:8; Jpw. 20:12.Uta uba jop, ïa uta, yn pynkup kumta ha ki jaiñkup balieh; bad ngan ym pyndam noh da lei lei ïa ka kyrteng jong u na ka kitab ka jingim, bad ngan phla keiñ ïa ka kyrteng jong u ha khmat U Kpa jong nga, bad ha khmat ki angel jong u. 6Jar uba don ka shkor, to un sngew ïa kaei ba U Mynsiem u ong ha kita ki balang.’ ”

Ka khubor sha ka Balang ha Philadelphia

7 # Isa. 22:22. “Bad ha uta u angel jong ka balang kaba ha Philadelphia to thoh: Ïa kine kiei kiei ruh u ong uta U Bakhuid, uta U Bashisha, uta uba don u shabi jong u Dabid, uta uba plie, te uno uno ruh um khang, bad u khang te uno uno ruh um plie:

8 “ ‘Nga ithuh ïa ki jingleh jong pha; ha khmih, nga la buh ha khmat jong pha ïa ka jingkhang ïa kaba la plie, te uno uno ruh um lah ban khang ïa ka; naba pha don khyndiat khynsoit ka bor, bad pha la ri skhem ïa ka ktien jong nga, bad pham shym la len ïa ka kyrteng jong nga. 9#Isa. 43:4; 49:23; 60:14.Ha khmih, nga aiti noh ïa kiba na kata ka synagog u Soitan, kiba ong ba ki long ki Jiw, bad kim long, hynrei, ki lamler; ha khmih, ngan pynleh ïa kita ba kin wan bad ïamane ha khmat ki kjat jong pha, bad ba kin tip ba nga la ieit ma nga ïa pha. 10Naba pha la ri skhem ïa ka ktien ka jingïaishah jong nga, te nga ruh ngan ri kyndong ïa pha na kata ka por jong ka jingtynjuh, ka ban sa jia long ha ka pyrthei baroh kawei, ban tynjuh keiñ, ïa kita kiba shong ha ka khyndew. 11Ha khmih, nga wan kloi: to bat skhem ïa kata kaba pha don, ba uno uno ruh un ym shim ïa ka pansngiat jong pha. 12#Ese. 48:35; Isa. 62:2; Jpw. 21:2.Uta uba jop, ngan pynlong u rijied ïa u ha ka ïing U Blei jong nga, te un ym mih noh shuh shabar: bad ngan thoh halor jong u ïa ka kyrteng U Blei jong nga, bad ïa ka kyrteng jong kata ka nongbah U Blei jong nga, ka Jerusalem bathymmai, kaba wan hiar na bneng na U Blei jong nga, bad ïa kata ka kyrteng jong nga ka bathymmai. 13Jar uba don ka shkor, to un sngew ïa kaei ba U Mynsiem u ong ha kita ki balang.’ ”

Ka khubor sha ka Balang ha Laodikaïa

14 # Salm. 89:27; Pro. 8:22; Ïoan. 1:1-3. “Bad ha uta u angel jong ka balang ha Laodikaïa to thoh: Ïa kine kiei kiei ruh u ong U Amen, U Nongphla U Baïaineh bad U Bashisha, ka jingsdang ka jingpynlong jong U Blei:

15 “ ‘Nga ithuh keiñ ïa ki jingleh jong pha, ba pham long kaba khriat lymne kaba shit: A nga da kwah dik dik ba phan da long kaba khriat lane kaba shit! 16Kumta, naba pha long kaba shu syaid, khriat ruh em, shit ruh em, ngan sa prie noh ïa pha na ka shyntur jong nga. 17#Hos. 12:8.Naba pha ong, “Nga kaba riewbha, bad nga la pynman spah, te ngam don ka jingkyrduh ei ei ruh em,” bad pham tip ba ma pha hi pha long kata kaba lanot khop, bad kaba jynjar sat, bad ka baduk, bad ka bamatlah, bad ka balyngkhuit. 18Nga pyni buit ha pha ba phan thied na nga ïa ka ksiar ba la phrang ha ka ding, ba phan da ïoh man spah; bad ïa ki jaiñkup balieh, ba phan ïoh kup ïa lade, bad ba kan ym paw kata ka jinglehrain ka jinglyngkhuit jong pha; bad ïa ka jingsleh khmat ban kyllan ïa ki khmat jong pha, ba phan ïohi. 19#Pro. 3:12.Kat ïa kiba nga ieit, nga sneng bad nga sympat; to sngewshitrhem namar kata, bad to kylla-ka-bamut. 20Ha khmih, nga ïeng ha ka jingkhang bad nga tied: lada uno uno ruh un ïohsngew ïa ka ktien jong nga, bad un plie ïa kata ka jingkhang, ngan wan rung hapoh ha u, bad ngan ïakhawai miet lem bad u, bad ma u lem bad nga. 21Uta uba jop, ngan ai ha u ban shong lem bad nga halor ka khet jong nga, kumba nga ruh nga la jop, bad nga la shong lem bad U Kpa jong nga halor ka khet jong u. 22Jar uba don ka shkor, to un sngew ïa kaei ba U Mynsiem u ong ha kita ki balang.’ ”

Currently Selected:

JINGPYNPAW 3: KHB

Highlight

Copy