JINGPYNPAW 14

Ka jingrwai kiba la siewspah

1 # Ese. 9:4; Jpw. 7:3. Te nga la ïohi, bad ha khmih, U Khun langbrot u ïeng halor u lum Seïon, bad lem bad u ruh shispah sawphew saw hajar ngut, kiba don kata ka kyrteng jong u, bad ka kyrteng U Kpa jong u, ïa kaba la thoh halor ki shyllangmat jong ki. 2Bad nga la ïohsngew ïa ka ktien sawa na bneng, kum ka jingsawa shibun ki um, bad kum ka jingsawa u pyrthat bakhraw: bad kata ka jingsawa kaba nga la ïohsngew, ka la long kum ka jingsawa ki nongtem duitara haba ki ïatem ha ki duitara jong ki. 3Bad ki ïarwai kum ïa ka jingrwai bathymmai ha khmat kata ka khet, bad ha khmat kita ki saw ki jingthaw ba-im bad kita ki tymmen basan; bad uno uno ruh um lah ban nang keiñ ïa kata ka jingrwai, hynrei, tang kita ki shispah sawphew saw hajar, kita keiñ ïa kiba la siewspah noh na ka khyndew. 4Kine ki long kita ïa kiba ym shym la pynbit-tngit bad ki kynthei, namar ki long ki rangsotti. Kine ki long kita kiba bud ïa uta U Khun langbrot kat shaba u leit. Ïa kine la siewspah noh napdeng ki briew, kum u soh nyngkong ha U Blei bad ha uta U Khun langbrot. 5#Seph. 3:13.Te ha ka shyntur jong ki ym shym la shem ïa kaba arsap; ki long kiba khlem pop.

Ki lai ngut ki angel

6Bad nga la ïohi ïa uwei pat u angel uba her hapdeng ka bneng, uba don ka gospel bymjukut ban ïathuhkhana ha kita kiba shong halor kata ka khyndew, bad ha ka kynja bynriew bad ka jaid bad ka thylliej bad u paidlang baroh; 7bad u ong da ka ktien bajam, “To sheptieng ïa U Blei, bad to ai ka burom ha u; naba la wan ka por ka jingbishar jong u: bad to phin ïamane dem ïa uta uba la thaw ïa ka bneng bad ïa ka khyndew, bad ïa ka duriaw bad ïa ki pukri um.”

8 # Isa. 21:9; Jpw. 18:2. Bad uwei pat u angel, u ba-ar, u la bud, u da ong, “La kyllon, la kyllon ka Babilon, kata ka nongbah ka bakhraw, kaba la pyndih ïa ki kynja bynriew baroh na ka Waiñ ka jingkhih bitar ka jingklim sih jong ka!”

9Bad u angel u balai u la bud ïa ki, u da ong da ka ktien bajam, “Lada uno uno ruh u mane dem ïa uta u mrad khlaw bad ïa ka dur jong u, bad u pdiang ïa kata ka dak halor ka shyllangmat jong u, lane halor ka kti jong u, 10#Isa. 51:17; Jen. 19:24.uta ruh un dih na ka Waiñ ka jingbitar lep U Blei, ïa kaba la khreh khlem da pynkhleh ha kata ka khuri ka jingotshla jong u; bad yn pynkordit ïa u da ka ding bad da u kyndok ha khmat kita ki angel bakhuid, bad ha khmat uta U Khun langbrot: 11#Isa. 34:10.te ka tdem kata ka jingpynkordit ïa ki ka kiew noh sha ki bymjukut ki bymjukut; bad kim ïoh ïa kaba shongthait mynsngi bad mynmiet, kiba ïamane dem ïa uta u mrad khlaw bad ïa ka dur jong u, bad jar uba pdiang ïa kata ka dak ka kyrteng jong u.”

12Hangne ka don ka jingïaishah jong kita ki riewkhuid, kita kiba sumar ïa ki hukum U Blei, bad ïa ka jingngeit U Jisu.

13Bad nga la ïohsngew ïa ka ktien na bneng kaba ong, “To thoh: Suk kita ki nongïap kiba ïap ha U Trai naduh mynta”: “Shisha,” ong U Mynsiem, “ba kin ïoh shongthait noh na ki jingtrei minot jong ki; naba kita ki jingleh jong ki, ki ïabud ryngkat bad ki.”

Ka jingot ha ka khyndew

14 # Dan. 7:13. Bad nga la ïohi, te ha khmih, u lyoh balieh; bad halor uta u lyoh u da shong uba kum U Khun u briew, uba don halor ka khlieh jong u ka pansngiat ksiar, bad ha ka kti jong u ka rashi banep. 15#Jol. 3:13; Mat. 13:30.Bad uwei pat u angel u la wan mih noh na ka ïing Blei, u da pyrta da ka ktien bajam ha uta uba shong halor uta u lyoh, “To phah noh ïa kata ka rashi jong me, bad to ot; naba kata ka aïom ban ot ka la wan, naba kata ka jingot ka khyndew ka la ih rkhiang.” 16Te uta uba shong halor uta u lyoh u la buh ïa kata ka rashi jong u halor kata ka khyndew; kumta, la ot ïa kata ka khyndew.

17Bad uwei pat u angel u la wan mih noh na kata ka templ kaba ha bneng, uba don ma u ruh ka rashi banep. 18Bad uwei pat u angel u la wan mih noh na ka duwan, uba don ka bor halor ka ding; bad u la pyrta da ka jingpyrta bajam ha uta uba don kata ka rashi ka banep, u da ong, “To phah noh ïa kata ka rashi ka banep jong me, bad to lum ïa ki rynjup na u dieng soh Waiñ kata ka khyndew; naba ki soh Waiñ jong ka ki la ih bha.” 19Te uta u angel u la buh ïa ka rashi jong u ha kata ka khyndew bad u la kheit ïa uta u dieng soh Waiñ jong kata ka khyndew, bad u la bred ïa ki sha ka jingtylliat umsoh kaba khraw jong ka jingbitar U Blei. 20#Isa. 63:3; Jpw. 19:15.Te ïa kata ka jingtylliat umsoh la ïuh roit shabar kata ka nongbah, bad ka snam ka la mih noh na kata ka jingtylliat umsoh haduh ki lakam ki kulai, jin haduh arspah mail.

Currently Selected:

JINGPYNPAW 14: KHB

Highlight

Copy