JINGPYNPAW 13

Ar tylli ki mrad khlaw

1 # Dan. 7:1-6; Jpw. 17:3,7-12. Bad nga la ïohi ïa u mrad khlaw uba kiew noh na ka duriaw, uba don hynñiew ki khlieh bad shiphew ki reng, bad halor kita ki reng jong u, shiphew ki pansngiat, bad halor kita ki khlieh jong u ki kyrteng ka jingkrenbeiñ Blei. 2#Dan. 7:4-6.Bad uta u mrad khlaw ïa uba nga la ïohi, u la syriem ïa u 'labasa, bad ki kjat jong u kum ki kjat dngiem, bad ka shyntur jong u kum ka shyntur sing: te uta u ïakjakor u la aiti ha u ïa ka bor jong u, bad ïa ka khet jong u, bad ïa ka bor synshar bakhraw. 3Bad nga la ïohi ïa kawei na kita ki khlieh jong u kum ïa kaba la pynmong haduh ka ban ïap; hynrei, la pynkhiah ïa kata ka jingmong ïap jong u: te baroh kawei ka pyrthei ka la sngewphylla ïa uta u mrad khlaw. 4Bad ki la ïamane dem ïa uta u ïakjakor naba u la aiti ïa ka bor synshar jong u ha uta u mrad khlaw; te ki la ïamane dem ïa uta u mrad khlaw, ki da ong, “Uei, uba long kum uta u mrad khlaw? uei uba lah ban ïaleh thma bad u?”

5 # Dan. 7:8,25; 11:36. Te la ai ha u ka shyntur kaba ïalap ïa kiei kiei ki bakhraw, bad ïa ki jingkrenbeiñ Blei; bad la ai ha u ïa ka bor synshar ban sah jin sawphew ar bnai. 6Te u la ang ïa ka shyntur jong u ïa ka ban krenbeiñ ïa U Blei, ban krenbeiñ ïa ka kyrteng jong u, bad ïa ka ïing kyntang jong u, bad ïa kita kiba shong ha bneng. 7#Dan. 7:21.Bad la ai bor ha u ban ïaleh thma bad kita ki riewkhuid, bad ban jop noh ïa ki: bad la ai ha u ïa ka bor synshar halor ka jaid, bad u paidlang, bad ka thylliej, bad ka kynja bynriew baroh. 8#Salm. 69:28.Te kita baroh kiba shong halor ka khyndew kin ïamane dem ïa u, kiba ki kyrteng jong ki ym shym la thoh ha kata ka kitab ka jingim jong uta U Khun langbrot, ïa uba la pynïap la myndanglong ka pyrthei. 9#Mrk. 4:23.“Lada uno uno ruh u don ka shkor, to un sngew.

10 # Jer. 15:2. “Lada uno uno ruh

u ïalam mraw,

u leit noh hi keiñ

sha ka jinglongmraw:

lada uno uno ruh u pynïap noh

da ka waitlam,

ka dei ban pynïap noh ïa u

da ka waitlam.

“Hangne don ka jingïaishah bad ka jingngeit jong kita ki riewkhuid.”

11Bad nga la ïohi ïa uwei pat u mrad khlaw uba kiew noh na kata ka khyndew; bad u la don ar tylli ki reng ba syriem kum i khun langbrot, bad u la kren kum u ïakjakor. 12Bad ïa kata ka bor synshar baroh ka jong uta u mrad khlaw banyngkong u leh ha khmat jong u, bad u pynbor ïa kata ka khyndew bad ïa kita kiba shong ha ka ba kin ïamane dem ïa uta u mrad khlaw banyngkong, ïa uba la pynkhiah ïa kata ka jingmong ïap jong u. 13Bad u leh ïa ki dak khyllah bakhraw, kat ban pynhiar ïa ka ding na bneng sha ka khyndew ha khmat ki briew. 14#Deu. 13:1-5.Te u shukor noh ïa kita kiba shong halor kata ka khyndew, da kita ki dak khyllah ïa kiba la ai bor ha u ban leh ha khmat uta u mrad khlaw; u da ong ha kita kiba shong halor kata ka khyndew ba kin thaw dur ïa uta u mrad khlaw, uba la ïoh ïa kata ka jingmong da ka waitlam, bad ba la ïoh im pynban. 15#Dan. 3:5.Bad la ai bor ha u ban ai ka mynsiem ha kata ka dur uta u mrad khlaw, ba kata ka dur uta u mrad khlaw kan da ïoh kren ruh, bad ba kan ïoh pynlong ba kat ki ban ym mane dem ïa kata ka dur uta u mrad khlaw, yn pynïap noh ïa ki. 16Bad u pynlong ïa ki baroh, ïa ki barit baraiñ ruh bad ki bakhraw batri, ïa ki bariewspah ruh bad ki baduk, ïa kiba laitluid ruh bad ki mraw, ba yn buh ha ki, ïa ka dak halor ka kti kamon jong ki, lane halor ki shyllangmat jong ki; 17bad ba uno uno ruh un ym lah ban thied lane ban die, hynrei, tang uta uba don kata ka dak, kata ka kyrteng hi uta u mrad khlaw keiñ, lane kata ka jingkheiñ ka kyrteng jong u. 18Hangne don ka jingstad. Uta uba don ka jingshemphang, to un kheiñ ïa kata ka jingkheiñ uta u mrad khlaw; namar ka long ka jingkheiñ u briew: bad kata ka jingkheiñ jong u ka long, Hynriewspah hynriewphew hynriew.

Currently Selected:

JINGPYNPAW 13: KHB

Highlight

Copy