JINGPYNPAW 12

Ka briew bad u ïakjakor

1 # Jen. 37:9. Bad la ïohi ïa ka dak khyllah bakhraw ha bneng; ka briew kaba la kup da ka sngi, bad u bnai hapoh ki kjat jong ka, bad halor ka khlieh jong ka, ka pansngiat da ki khat-ar ki khlur; 2#Mik. 4:10.bad ka la punkhun, bad ka kyang jam haba ka suhkhun, bad haba ka pang shitom ban kha khun. 3#Dan. 7:7.Bad la ïohi ïa kawei pat ka dak khyllah ha bneng; bad ha khmih, u ïakjakor basaw uba khraw, uba don hynñiew ki khlieh bad shiphew ki reng, bad halor kita ki khlieh jong u, hynñiew ki pansngiat. 4#Dan. 8:10.Bad ka tdong jong u ka ring ïa ka balai ka bynta na ki khlur ka bneng, bad ka la bred noh ïa ki sha ka khyndew: bad uta u ïakjakor u la ïeng ha khmat kata ka briew ka ban sa kha khun, khnang ba ynda ka la kha, un ïoh bam duh ïa ita i khunlung jong ka. 5#Isa. 66:7; Salm. 2:9.Te ka la kha ïa u khun shynrang, u ban sa synshar ïa ki kynja bynriew baroh da ka dieng synshar nar; te la rong noh artet ïa ita i khunlung jong ka sha U Blei, bad sha ka khet jong u. 6Bad kata ka briew ka la phet ïap sha ka ri khlaw, ha kaba ka don ka jaka ïa kaba la khreh da U Blei, khnang ba hangta kin ïoh ïabsa ïa ka, shi hajar arspah hynriewphew sngi.

7 # Dan. 10:13,21; 12:1; Jud. 1:9. Bad ka thma ka la long ha bneng: u Mikhal bad ki angel jong u ki la ïaleh thma ïa uta u ïakjakor; te uta u ïakjakor ruh bad ki angel jong u ki la ïaleh thma; 8hynrei, kim shym la jop, lymne ïa ka jaka jong ki ym shym la shem shuh ha bneng. 9#Jen. 3:1,14-15; Sekh. 3:1; Luk. 10:18.Te la shop noh arsut ïa uta u ïakjakor bakhraw, uta u bseiñ tymmen ïa uba la khot “u Ksuid”, bad “u Soitan”, uba shukor ïa ka pyrthei baroh kawei; la shop noh arsut ïa u sha ka khyndew, bad ïa kita ki angel jong u la shop noh arsut lem bad u. 10#Job. 1:9-11; Sekh. 3:1.Bad nga la ïohsngew ïa ka ktien bajam ha bneng, kaba ong, “Mynta la wan jia kata ka jingpynim bad kata ka bor, bad kata ka hima U Blei jong ngi bad kata ka bor synshar uta U Khrist jong u: naba la shop noh arsut ïa uta u nongmudui ïa ki parabangeit jong ngi, uba shait mudui ïa ki ha khmat U Blei jong ngi mynsngi bad mynmiet. 11Hynrei, ki la jop noh ma ki ïa u, namar kata ka snam jong uta u Khun langbrot, bad namar kata ka ktien ka jingphla jong ki; te kim shym la ieit ïa ka jingim jong ki jin haduh ka jingïap. 12#Isa. 44:23; 49:13.Naba kumta to ïakmen, ko ki bneng, bad phi kiba shong ha ki. Kordit ïa kata ka khyndew, bad ïa ka duriaw! naba uta u Ksuid u la leit hiar ha phi, uba don ka jingbitar bakhraw, naba u tip ba u don tang khyndiat por.”

13Te mynba uta u ïakjakor u la ïohi ba la shop noh arsut ïa u sha ka khyndew, u la behbeiñ ïa kata ka briew kaba la kha khun shynrang. 14#Dan. 7:25; 12:7.Te la ai ha kata ka briew ar tylli ki thapniang jong ka pukni ka bakhraw, ba kan da ïoh her noh sha kata ka ri khlaw sha kata ka jaka jong ka, ha kaba yn bsa ïa ka shi Ïa, bad ki Ïa, bad ka shiteng Ïa, na khmat uta u bseiñ. 15Bad uta u bseiñ u la theh buk buk na ka shyntur jong u ïa ka um kum ka wah na shadien kata ka briew, khnang ba un ïoh pynrong noh ïa ka da kata ka wah. 16Hynrei, kata ka khyndew ka la ïarap ïa kata ka briew, te kata ka khyndew ka la ang ïa la ka shyntur, bad ka la nguid noh khoit ïa kata ka wah ïa kaba uta u ïakjakor u la theh buk buk na ka shyntur jong u. 17Te uta u ïakjakor u la sngewbitar lep ïa kata ka briew, bad u la leit noh ban ïaleh thma bad kita kiba sah na u symbai jong ka, kita kiba sumar ïa ki hukum U Blei bad kiba bat ïa kata ka jingphla ïa U Jisu Khrist. Te u la ïeng halor u shyiap ka duriaw.

Currently Selected:

JINGPYNPAW 12: KHB

Highlight

Copy