LOUKAS 7

U Jisu u pynkhiah ïa u shakri u Rangbah Shispah

(Mat. 8:5-13)

1 # Mat. 8:5-10,13; Ïoan. 4:46-53. Te ynda U la lah pyndep ïa ki jingong jong U baroh ha kaba ïohsngew uta u paidbah, U la rung shapoh Kapernam. 2Te don u shakri uwei u rangbah shispah, uba u la ieit eh, uba la pang bad ha tmier ka jingïap. 3Te haba u la ïohsngew shaphang U Jisu, u la phah ha U ïa ki tymmen basan ki Jiw, u da kyrpad ïa U ban wan pynim ïa uta u shakri jong u. 4Ki te, haba ki la poi ha U Jisu, ki la kyrpad eh ïa U, ki da ong, “U long uba dei ba men leh ïa kane ïa u; 5#Ki Kam. 10:2.naba u ieit ïa ka kynja jong ngi, bad la tei ma u ïa ka synagog ïa ngi.” 6U Jisu te U la leit lem bad ki. Te haba um jngai shuh na kata ka ïing, u rangbah shispah u la phah ïa ki lok sha U, ban ong ha U, “Ko Kynrad, wat pynshitom ïa lade; naba ngam long uba dei ba men wan rung hapoh ka ïing jong nga: 7lymne ngam sngew ïa lade uba bit ban wan ha me: hynrei, shu ong da ka ktien, te yn sa pynkhiah ïa u shakri jong nga: 8naba nga ruh nga long u briew ba la buh hapoh ka hukum, uba don ki shipai hapoh jong nga; te nga ong ha une, ‘Khie leit’, te u leit; ha uwei pat ruh, ‘Ale’, u ruh u wan; bad ha u shakri jong nga, ‘Leh ïa kane’, u ruh u leh.” 9Te haba U Jisu u la ïohsngew ïa kine kiei kiei, U la sngewphylla ïa u; bad haba U la phai, U la ong ha uta u paidbah ba bud ïa U, “Nga ong ha phi, ngam shym la shem kat kane ka jingngeit, em, wat ha Israel ruh.” 10Te haba kita ïa kiba la phah ki la leit phai pat sha kata ka ïing, ki la shem ïa uta u shakri ba u koit bha pat.

U Jisu u pynim pat ïa u khun ka riewkynthei

11 # Mrk. 5:21-24,35-43; Ïoan. 11:1-44; 1 Syiem. 17:17-24; 2 Syiem. 4:32-37. Ka la jia te kum lashai, ba U la leit sha ka shnong ba khot “Nain”: te ki synran jong U ki la ïaleit lem bad U, bad u paidbah byllien. 12Te katba U la wan hajan ka khyrdop kata ka shnong, ha khmih, ki ïabah shabar ïa uba la ïap, u khun marwei ka kmie jong u, bad ka ruh ka long ka riewkynthei; bad bun u paidbah na kata ka shnong u la don lem bad ka. 13#Luk. 7:19; 10:1; 11:39; 12:42; 13:15; 17:5-6; 18:6; 19:8; 22:61; 24:3.Haba U Trai te U la ïohi ïa ka, U la sngewsynei ïa ka, bad U la ong ha ka, “To wat ïam.” 14Te U la wan hajan bad U la ktah ïa ka krong, kita kiba ïabah te ki la ïeng. Bad U la ong, “Ko samla, nga ong ha me, To ïeng.” 15Te uta uba la ïap u la khie shong, bad u la sdang ban kren: U te U la ai noh ïa u ha ka kmie jong u. 16#Luk. 7:39; 24:19; Mat. 21:11; Ïoan. 6:14.Ka jingsheptieng te ka la ngat ha ki baroh; bad ki la ïaroh ïa U Blei, ki da ong, “U nongïathuhlypa u bakhraw u la mih hapdeng jong ngi, bad U Blei u la wan-i ïa la ki briew.” 17Te kane ka jingbna shaphang jong U ka la phriang noh kylleng ka Judia baroh, bad kylleng kata ka ri kaba baroh sawdong.

Ki nonglam-ktien na u Ïoannis Nongpynbaptis

(Mat. 11:2-19)

18 # Mat. 11:2-19. Bad ki synran u Ïoannis ki la ïathuh ha u shaphang kine kiei kiei baroh. 19Te haba u Ïoannis u la khot ha lade ar ngut na ki synran jong u, u la phah ïa ki ha U Trai, u da ong, “Me long uta u ban sa wan, ne ngin ïa-ap ïa uwei pat?” 20Te haba kita ki briew ki la poi ha U, ki la ong, “U Ïoannis u Nongpynbaptis u la phah ïa ngi ha me, u da ong, ‘Me long uta u ban sa wan, ne ngin ïa-ap ïa uwei pat?’ ” 21#Mat. 4:23; Mrk. 3:10.Te ha kata hi ka por U la pynkhiah shibun ki briew na ki jingpang, bad na ki jingpang kordit, bad na ki mynsiem bymman; ïa shibun ki bamatlah ruh U la pynpeit. 22#Isa. 29:18-19; 35:5-6; 61:1; Luk. 4:18-19.U Jisu te u la ïathuh bad u la ong ha ki, “Khie leit ïathuh ha u Ïoannis ïa kiei kiei kiba phi la ïohi bad ba phi la ïohsngew ruh; ba ki bamatlah ki peit pat, ki ba-dkoh ki ïaid, ïa kiba sa 'ñiangthohlieh la pynkhuid, ki bakyllut ki ïohsngew, ïa ki baïap la pynim pat, bad la ïalap ïa ka gospel ha ki baduk: 23suk ruh uta u ban ym thut ha nga.”

24Te haba kita ki nonglam-ktien u Ïoannis ki la ïaleit noh, U la sdang ban ong ha kita ki paidbah shaphang u Ïoannis: “Phi la leit sha ka ri khlaw ban jngoh aïu? ïa u khah ba la pynkhih da ka lyer? 25Hynrei, phi la leit ban ïoh khmih aïu? Ïa u briew uba la kup ki jaiñkup bani? Ha khmih, kita kiba kup da ka jaiñkup thaba babun rong, bad kiba shongsuk ruh, ki don ha ki ïingsyiem. 26Hynrei, phi la leit ban ïoh khmih aïu? ïa u nongïathuhlypa? Shisha, nga ong ha phi, bad ïa uba kham khraw ïa u nongïathuhlypa. 27#Mal. 3:1; Mrk. 1:2.Une u dei uta ba la thoh shaphang jong u:

“ ‘Ha khmih, nga phah

ïa u nonglam-ktien jong nga

ha shuwa ka khmat jong me,

u ban pynkhreh

ïa ka lynti jong me

ha shuwa jong me.’

28 “Naba nga ong ha phi, ‘Na kiba la kha na ki kynthei, ym don u nongïathuhlypa uba kham khraw ban ïa u Ïoannis u Nongpynbaptis: pynban, uba kham rit ha ka hima U Blei, u long uba kham khraw ïa u.’ ” 29#Mat. 21:32; Luk. 3:12.Te uta u paidlang baroh haba u la ïohsngew, bad ki nongkhrong ruh, ki la pynksan ïa U Blei, haba la pynbaptis ïa ki da ka jingbaptis u Ïoannis. 30Hynrei, ki Pharisi bad ki riewsaid, ki la kyntait noh ïa ka mon U Blei sha ka ban sniew ïa lade, haba ym shym la pynbaptis ïa ki da u.

31U Trai u la ong ruh, “Namar kata, kum kaei ngan tharai ïa ki briew jong kane ka pateng bynriew? kum kaei ruh ki ïasyriem? 32ki long keiñ kum ki khynnah kiba ïashong ha ka jaka ïew, bad kiba ïapyrta paralok; kiba ong,

“ ‘Ngi la ïa-put jingput ha phi,

te phim shym la shad;

ngi la ïarwai sngewsynei

ha phi,

te phim shym la ïam.’

33 # Luk. 1:15. “Naba u Ïoannis u Nongpynbaptis u la wan, um da bam kpu lymne um da dih Waiñ; te phi ong, ‘Uba shong ksuid’ ïa u. 34#Luk. 5:29; 15:1-2; 7:36-50.U Khun u briew u la wan u da bam u da dih ruh; te phi ong, ‘Ha khmih, u briew uba bam lalot, bad uba dih kyiad, u lok ki nongkhrong bad ki bapop.’ 35Hynrei, ka jingstad ka la ksan na ki khun jong ka baroh.”

U Jisu ha ka ïing u Simon u Pharisi

36 # Mat. 26:6-13; Mrk. 14:3-9; Luk. 11:37; 14:1; Ïoan. 12:1-8. Te uwei na ki Pharisi u la khot ïa U ba un ïawan bam ja bad u; kumta te U la rung hapoh ka ïing uta u Pharisi, bad U la shong shaniah ban bam. 37#Mat. 26:7; Mrk. 14:3; Ïoan. 12:3.Ha khmih ruh, ka briew ha kata ka shnong, kaba long ka bapop, haba ka la tip ba U shong shaniah ban bam ha ïing uta u Pharisi, ka la wallam ïa ka dabi alabaster ka jingsleh; 38haba ka la ïeng ruh hajan ki kjat jong U na shadien, ka da ïam, ka la sdang ban sait ïa ki kjat jong U da la ki jingjaw ummat, bad ka la ñiad da u 'ñiuh khlieh jong ka; bad ka la doh ïa ki kjat jong U, bad ka la pynsleh ïa ki da kata ka jingsleh. 39#Luk. 7:16; 24:19; Mat. 21:11; Ïoan. 6:14.Te haba uta u Pharisi uba la khot ïa U, u la ïohi, u la kren ha lade, u da ong, “Lada une u long u nongïathuhlypa, un da la ithuh kaei bad kaba kumno kane ka briew kaba ktah ïa u, ba ka long ka bapop.” 40U Jisu te U da ïathuh U la ong ha u, “Ko Simon, nga don ei ei ban ong ha me.” U te u la ong, “Ko Nonghikai, to ong.” 41“Uwei u nongai ram u la don ar ngut ki nongkit ram; uwei u kit ram, sanspah tyngka, bad uwei pat, sanphew: 42#Mat. 18:25.te haba kim don ei ei ruh ban siew, u la map ei ïa ki baroh ar ngut. Namar kata, to ong, uno na kita u ban kham ieit tam ïa u?” 43#Luk. 10:28.U Simon u la ïathuh bad u la ong, “Uta, nga mut, uba la ïohmap ei ïa kaba kham bun.” U te U la ong ha u, “Me la bishar kaba dei.” 44Bad haba U la phai sha kata ka briew, U la ong ha u Simon, “Me ïohi ne em ïa kane ka briew? nga la rung hapoh ka ïing jong me, te mem shym la ai um ïa ki kjat jong nga, hynrei, kane, ka la sait ïa ki kjat jong nga da ki jingjaw ummat jong ka, bad ka la ñiad da u 'ñiuh khlieh jong ka: 45mem shym la ai ka jingdoh ïa nga, hynrei, kane, naduh ba nga la wan hapoh, kam shym la keiñ noh ban doh ïa ki kjat jong nga: 46mem shym la pynsleh ïa ka khlieh jong nga da ka umphniang, hynrei, kane, ka la pynsleh ïa ki kjat jong nga da ka jingsleh: 47naba kumta nga ong ha me, ‘La map ïa ki pop ki babun jong ka: namar ka la ieit shibun: hynrei, uta uba la ïohmap khyndiat, u ieit khyndiat.’ ” 48#Mat. 9:2; Mrk. 2:5; Luk. 5:20.U la ong te ha ka, “La map ïa ki pop jong pha.” 49Kita kiba ïashong bam lem ki la sdang te ban ong ha lade, “Uei une uba map kat ïa ka pop?” 50#Mat. 9:22; Mrk. 5:34; Luk. 8:48.Te U la ong ha kata ka briew, “Ka jingngeit jong pha ka la pynim ïa pha; to khie leit ha kaba suk.”

Currently Selected:

LOUKAS 7: KHB

Highlight

Copy