LOUKAS 11

Ka jinghikai shaphang ka jingduwai

(Mat. 6:9-13; 7:7-11)

1 # Mrk. 1:35; Luk. 3:21; 5:16; 6:12; 9:18,28; 5:33; 7:18. Ka la jia ruh, haba U dang duwai ha kawei ka jaka, ba ynda U la wai noh, uwei na ki synran jong U, u la ong ha U, “Ko Trai, to hikai ïa ngi ban duwai, kumba u Ïoannis ruh u la hikai ïa ki synran jong u.” 2#Mat. 6:9-13.U la ong te ha ki, “Haba phi duwai, to ong:

“Ko Kpa jong ngi uba ha bneng,

long bakhuid ka kyrteng

jong me:

wan ka hima jong me:

long ka mon jong me

ha ka khyndew ruh,

kumba ha bneng.

3 Ai ha ngi ha la ka sngi

ka sngi

ïa ka jingbam jong ngi

kaba biang.

4 # Mrk. 11:25; Mat. 18:35. To map ruh ïa ngi

ïa ki pop jong ngi;

naba ngi hi ruh ngi map

ïa baroh kiba leh sniew

ïa ngi.

To wat ïalam ïa ngi

sha ka jingpynshoi ruh,

hynrei, sumar ïa ngi

na ka basniew.”

5 # Luk. 18:1-8. U la ong ruh ha ki, “Lada uwei na phi u don u lok, bad un leit ha uta shiteng synñia, bad un ong ha u, ‘Ko lok, ïa-ai kylliang ïa nga lai tylli ki kpu; 6naba u lok jong nga u dang poi ha nga na la ka jingleit, bad ngam don ei ei ruh ïa kaba ngan buh ha khmat jong u’; 7uta te napoh ïing un jubab bad un ong, ‘Wat pynshitom ïa nga; la khang ïa ka jingkhang mynta, bad ki khun jong nga ruh ki ha jingthiah bad nga; ngam lah ban khie bad ban ai ha me’; 8nga ong ha phi, la un ym khie bad un ym ai ruh ha u namar ba u long u lok jong u; pynban, namar kata ka jingïaikyrpad jong u, un da khie un ai ruh ha u katba u donkam. 9#Mat. 7:7-11; 18:19; 21:22; Mrk. 11:24; Jak. 1:5-8; 1 Ïoan. 5:14-15; Ïoan. 15:7; 16:23-24.Nga ruh nga ong ha phi; to pan, te yn sa ai ha phi; to wad, phin sa shem ruh; to tied, te yn sa plie ïa phi. 10Naba baroh uba pan, u pdiang; bad jar uba wad, u shem; bad ïa uta uba tied, yn sa plie. 11Te lada u khun un pan kpu na uno uno ruh na phi uba long u kpa, hato un ai noh da u maw ha u? lane un pan ruh#11:11 un pan ruh: Kine ki kyntien ki don ha ki edition barim jong Ka Baibl Khasi. La buh biang hangne ba ka ïarap ban pynshai bad ruh ba ka ïatuid kyntien bad ka dkhot kaba bud. ïa ka dohkha, bad ha kaba dei da ka dohkha un ai noh da u bseiñ ha u? 12Ne lada un pan ïa ka pylleng, hato un ai noh da ka 'ñianglartham ha u? 13Namar kata, lada phi, kiba long bymman, phi tip ïa ka ban ai ïa ki jingai babha ha ki khun jong phi, kaba katno tam ba U Kpa jong phi uba ha bneng un ai ïa U Mynsiem Bakhuid ha kita kiba pan na u?”

U Jisu bad u Belsebul

(Mat. 12:22-30; Mrk. 3:20-27)

14 # Mat. 9:32-34; 12:22-30; 10:25; Mrk. 3:23-27. Te U dang beh ïa u ksuid u bymnangkren; ka la jia ruh, haba uta u ksuid u la mih noh, ba uta u bymnangkren u la kren; te ki paidbah ki la sngewkyndit. 15#Mat. 9:34; 10:25.Hynrei, don na ki, kiba la ong, “Da u Belsebul, u rangbah ki ksuid, U beh noh ïa ki ksuid.” 16#Mat. 12:38; 16:1; Mrk. 8:11; Ïoan. 2:18; 6:30.Kiwei pat de, ba ki da tynjuh ïa U, ki la ïapan na U ïa ka dak na bneng. 17Hynrei, U, ba U da tip ïa ki jingmut jong ki, U la ong ha ki, “Ka hima baroh kaba ïaleh makynti kan jot noh; bad ka ïing ruh kaba ïaleh makynti, kan kyllon. 18Te lada u Soitan ruh u ïaleh hi ïa lade, kumno kan neh ka hima jong u? naba phi ong ba nga beh noh ïa ki ksuid da u Belsebul. 19Lada nga te nga beh noh ïa ki ksuid da u Belsebul, hato dano ba ki khun jong phi ki beh noh ïa ki? namar kata, ki hi kin long ki nongbishar jong phi. 20Hynrei, lada nga beh noh ïa ki ksuid da ka shynriah'ti U Blei, te kumta ka hima ka jong U Blei ka la wan ha phi. 21Haba u bakhlaiñ uba la kieng atiar bha u ap phira ïa ka ïingbah jong u, kiei kiei ruh kiba don ki jong u ki don ha ka jingskhem. 22Hynrei, ynda uba kham khlaiñ ïa u un wan ïaleh ïa u, bad un jop ïa u, u shim noh ïa ka jingkieng atiar jong u baroh ha kaba u la shaniah, bad u ïabynta ïa ki jinglute jong u. 23#Mrk. 9:40; Luk. 9:50.Jar u bymlong bad nga, u ïaleh ïa nga; bad jar u bymïalum bad nga, u pynsaphred.”

Ka jingwan phai u mynsiem bymkhuid

(Mat. 12:43-45)

24 # Mat. 12:43-45. “Haba u mynsiem bymkhuid u la mih noh na u briew, u ïaid ïa ki jaka ryngkhiang, u da wad jaka shongthait; te haba um shem, u ong, ‘Ngan leit phai pat sha la ïing na kaba nga la mih noh.’ 25Haba u la wan te, u shem ïa ka, ba la sar, bad ba la buh beit ïa ki jingbuh. 26Ynda kumta, u leit noh, bad u shim lem bad u, sa hynñiew ki mynsiem kiba kham bymman ban ïa u hi; bad haba ki la rung shapoh, ki shong sah hangta; te ka jinglong bakhatduh jong uta u briew ka kham sniew ïa ka banyngkong.”

Ka jingsuk kaba shisha

27 # Luk. 1:42; 23:29. Ka la jia ruh, katba u dang kren ïa kine kiei kiei, ba kawei ka briew kaba na uta u paidbah ka la pyrta, bad ka la ong ha u, “Suk kata ka kpoh kaba la pun ïa me, bad ki jymbuiñ ïa kiba me la buiñ!” 28#Luk. 8:21; Ïoan. 15:14.Hynrei u te u la ong, “Kham suk shisha kita kiba ïohsngew ïa ka ktien ka jong U Blei, bad kiba sumar ruh ïa ka.”

Ka jingpan ban ïoh ka dak

(Mat. 12:38-42; Mrk. 8:12)

29 # Jon. 3:4-5; Mat. 12:39-42; 16:4; Mrk. 8:12; Luk. 11:16. Te katba kita ki paidbah ki la nang ïalang ha u, u la sdang ban ong, “Kane ka pateng bynriew ka long ka pateng bynriew kaba bymman; ka ïaiwad ïa ka dak, hynrei, yn ym ai ïa ka dak ha ka, hynrei, tang ka dak u Jonah. 30#Jon. 3:4.Naba kumba u Jonah u la long ka dak ïa ki nong Ninebeh, kumta ruh U Khun u briew un long ïa kane ka pateng bynriew. 31#1 Syiem. 10:1-10; 2 Khrn. 9:1-12.Ka syiem kaba na shathie kan ïamih lem ha ka jingbishar bad ki briew jong kane ka pateng bynriew, bad kan pynrem ïa ki; naba ka la wan na sha ki bakut ka pyrthei, ïa ka ban ïohsngew ïa ka jingstad u Solomon, bad ha khmih, uba kham khraw ïa u Solomon u don hangne. 32#Jon. 3:5; Mat. 12:6.Ki nong Ninebeh kin ïaïeng lem ha ka jingbishar bad kane ka pateng bynriew, bad kin pynrem ïa ka; naba ki la kylla-ka-bamut da ka jingïalap u Jonah, bad ha khmih, uba kham khraw ïa u Jonah u don hangne.

Ka jingshai jong ka met

(Mat. 5:15; 6:22-23)

33 # Mat. 5:15; Mrk. 4:21; Luk. 8:16. “Ym don u briew, haba u la thang ïa ka sharak, uba buh ïa ka hapoh khrum, lymne hapoh ka shang, hynrei, ha ka dieng pynïeng sharak keiñ, ba kita kiba rung hapoh kin ïohi ïa ka jingshai. 34#Mat. 6:22-23.Ka sharak jong ka met ka long ka khmat: namar kata, haba ka khmat jong me ka long kaba sngur, ka met jong me baroh ruh ka shai bha; hynrei, haba ka long kaba jngut, ka met jong me ruh ka dum. 35Namar kata, to sumar ïoh ba kata ka jingshai kaba ha me ka long ka jingdum! 36Haba kumta, lada ka met jong me baroh ka shai bha, bymdon ruh ka bynta ka ba-dum, baroh kan shai bha, kumba haba ka sharak ka pynshai ïa me da ka jingtyngshaiñ jong ka.”

U Jisu u pynrem ïa ki Nongthoh bad ki Pharisi

(Mat. 23:1-36; Mrk. 12:38-40; Luk. 20:45-47)

37 # Luk. 7:36; 14:1. Te ynda U la lah kren, uwei u Pharisi u la khot ïa U ba un wan bam ja bad u; te haba U la rung U la shong bam. 38#Mrk. 7:1-5.Hynrei, haba uta u Pharisi u ïohi ïa kata, u la sngewphylla ba um shym thet shuwa, haba un sa bam ja. 39#Mat. 23:25-26; Luk. 7:13.Bad U Trai u la ong ha u, “Te phi ki Pharisi, phi pynkhuid ïa kaba shabar ka khuri bad ka pliang, hynrei, kaba shapoh jong phi ka dap da ka jingleh-jubor bad ka jinglehsniew. 40A phi ki babieit! Uta uba la thaw ïa kaba shabar, hato um shym la thaw ïa kaba shapoh ruh? 41#Tit. 1:15; Mrk. 7:19.Te hynrei, to ai kum ka jingai isynei na kiei kiei kiba shapoh; te ha khmih, kiei kiei baroh ki long khuid ïa phi.

42 # Leb. 27:30; Mik. 6:8; Mat. 23:23-24. “Hynrei, kordit ïa phi ki Pharisi! Naba phi ai ïa kaba shiphew na u pudina, bad na u rue, bad na u jhur baroh, phi ryngkang te ïa ka hok bad ïa ka jingieit ka jong U Blei; ka la dei ban leh ïa kine kiei kiei ruh, hynrei, ban ym iehnoh keiñ ïa kita kiwei. 43#Mat. 23:6-7; Mrk. 12:38-39; Luk. 20:46.Kordit ïa phi ki Pharisi! Naba phi ieit ïa ki jingshong bakor tam ha ki synagog bad ïa ki jingnguh ha ki ïew. 44#Mat. 23:27.Kordit ïa phi ki nongthoh bad ki Pharisi kiba arsap! naba phi long kum ki jingtep ki bym paw, bad ki briew kiba ïaid shalor kim tip ïa kata.”

45Ynda kumta, uwei na ki riewsaid u da ïathuh u ong ha U, “Ko Nonghikai, da kaba ong ïa kane me krenbeiñ ïa ngi ruh.” 46#Mat. 23:4.U te U la ong, “Kordit ïa phi ruh ki riewsaid! Naba phi pynbah ha ki briew da ki jingkit kiba eh ban bah, phi hi te phim ktah ïa kita ki jingkit da kawei na ki shynriah'ti jong phi. 47#Mat. 23:29-32; Ki Kam. 7:51-53.Kordit ïa phi! Naba phi ïatei ïa ki maw jingtep ki nongïathuhlypa, bad ki kpa jong phi ki la pynïap ïa ki. 48Kumta, phi long ki sakhi bad phi ïakohnguh lem ïa ki kam ki kpa jong phi: naba ki, ki la pynïap ïa ki, phi ruh phi ïatei ïa ki maw jingtep jong ki. 49#Mat. 23:34-36; 1 Kor. 1:24; Kol. 2:3.Namar kata ruh, ka jingstad jong U Blei ka la ong, ‘Ngan phah sha ki, ïa ki nongïathuhlypa bad ïa ki apostol; te ïa kiba na ki kin pynïap bad kin behbeiñ noh’; 50ba yn wad noh na kane ka pateng bynriew ïa ka snam jong kita ki nongïathuhlypa baroh, ïa kaba la pynmih na myndanglong ka pyrthei; 51#Jen. 4:8; 2 Khrn. 24:20-21; Sekh. 1:1.naduh ka snam u Abel haduh ka snam u Sakharaïa, ïa uba la pynïap hapdeng ka duwan bad ka ïing U Blei; shisha nga ong ha phi: Yn wad noh ïa ka na kane ka pateng bynriew. 52#Mat. 23:13.Kordit ïa phi ki riewsaid! Naba phi la rah noh ïa u shabi jong ka jingtip: phi hi phim shym la rung shapoh, bad ïa kita kiba dang ïarung phi la khang.”

53 # Mrk. 12:13. Te haba u la mih noh nangta, kita ki nongthoh bad kita ki Pharisi ki la sdang ban ban shikatdei eh ïa u, bad ban pankwah ïa u ban shu kren naphang shaphang kham bun kiei kiei ruh, 54ki da ap thap ïa u ban ïoh kem daw ei ei na ka shyntur jong u, ba kin dup ïoh mudui ïa u.

Currently Selected:

LOUKAS 11: KHB

Highlight

Copy