LOUKAS 10

Kaba phah ïa ki hynñiewphew ngut ki synran ban leit ïalap

1 # Luk. 9:1-2,51-52; 7:13. Te hadien kine kiei kiei ruh, U Trai u la thung hynñiewphew ngut kiwei pat, bad u la phah noh ïa ki ar ar ha shuwa ka khmat jong u, sha ki shnong bad ki jaka baroh, sha kiba u hi un sa leit. 2#Mat. 9:37-38; Ïoan. 4:35.Bad u la ong ha ki, “Ka jingot ka bun shisha, hynrei, ki nongtrei ki khyndiat; namar kata, to ïakyrpad phi ïa U Trai kata ka jingot, ba un phah noh ïa ki nongtrei sha ka jingot jong u. 3#Mat. 10:7-16; Mrk. 6:8-11; Luk. 9:2-5; 22:35-36.To khie leit noh; ha khmih, nga phah noh ïa phi kum ki khun langbrot hapdeng ki suri. 4#Mat. 10:7-14; Mrk. 6:8-11; Luk. 9:3-5.Wat rah ïa u 'saipan, lymne ïa ka ïarong, lymne ïa ki juti; bad wat khublei ïano ïano ruh ha kata ka lynti. 5#1 Sam. 25:6.Sha kano kano ka ïing ruh ba phin rung, to ong shuwa, ‘Long ka jingsuk ïa kane ka ïing!’ 6Lada don te u khun ka jingsuk hangta, ka jingsuk jong phi kan ïaishong halor jong u; te lada ym don, kan wan phai pat ha phi. 7#1 Kor. 10:27; 9:14; 1 Tim. 5:18; Deu. 24:15.Bad phin ïaishong ha kata kajuh ka ïing, da bam da dih ruh ïa kiei kiei ruh katba kin ai; naba ka dei ïa u nongtrei ban ïoh ïa la ka bainong. Wat kynriah noh na ka ïing sha ka ïing. 8Bad sha kano kano ka shnong ruh ba phi rung, bad ki pdiang sngewbha ïa phi, to bam ïa kiei kiei ruh ïa kiba la buh ha khmat jong phi; 9te phin pynkhiah ïa ki bapang kiba don hangta, bad to ong ha ki, ‘Ka hima U Blei ka la wan hajan jong phi.’ 10Hynrei, sha kano kano ka shnong ruh ba phi rung, bad kim pdiang sngewbha ïa phi, phin mih noh sha ki lynti bah jong ka, bad phin ong, 11#Ki Kam. 13:51.‘Wat ïa ka 'dewmet kaba la snoh ha ngi na ka shnong jong phi, ngi shu ñiad noh sha phi pat; la kumta to tip ïa kane, ba ka hima U Blei ka la wan hajan.’ 12#Jen. 19:24-28; Mat. 11:24; 10:15; Jud. 1:7.Nga ong ha phi, ba kan long kham jem ïa ka Sodom ha kata ka sngi, ban ïa kata ka shnong.”

Ka jingkordit ïa ki shnong ki bym shym la kylla-ka-bamut

(Mat. 11:20-24)

13 # Isa. 23:1-18; Ese. 26:1—28:26; Jol. 3:4-8; Amo. 1:9,10; Sekh. 9:2-4; Mat. 11:21-23; Luk. 6:24-26. “Kordit ïa pha, Khorasin! Kordit ïa pha, Bethsaida! Naba lada la lah leh ïa kita ki kambah ha Tyros bad Sidon, ïa kiba la lah leh ha phi, kin jin da la kylla-ka-bamut la mynslem, kin da shong ha ka jaiñ khain bad ka dpei. 14Hynrei, kan long kham jem ïa ka Tyros bad ka Sidon ha ka jingbishar, ban ïa kaba ïa phi. 15#Isa. 14:13-15.Pha ruh, Kapernam, ïa kaba la kyntiew shaduh bneng, yn pynhiar noh arsut keiñ ïa pha haduh Hades.

16 # Mat. 10:40; 18:5; Mrk. 9:37; Luk. 9:48; Ïoan. 13:20; 12:48. “Jar uba sngew ïa phi, u sngew ïa nga; bad jar uba kyntait ïa phi, u kyntait ïa nga; bad jar uba kyntait ïa nga, u kyntait ïa uta uba la phah ïa nga.”

Ka jingwan phai ki hynñiewphew ngut

17Te kita ki hynñiewphew ngut ki la wan phai pat da ka jingkmen, ki da ong, “Ko Trai, wat ïa ki ksuid la pyndem hapoh jong ngi ha ka kyrteng jong me.” 18#Jpw. 12:9; Ïoan. 12:31.U te u la ong ha ki, “Nga la ïohi ïa u Soitan ba u hap kum ka leilieh na bneng. 19#Salm. 91:13.Ha khmih, nga la ai ka bor ha phi ïa ka ban ïuh roit halor ki bseiñ bad ki 'ñianglartham, bad halor ka bor baroh ka jong u nongshun; bad ym don ei ei ruh ka ban pynsniew ïa phi. 20#Eks. 32:32; Salm. 69:28; Dan. 12:1; Php. 4:3; Heb. 12:23; Jpw. 3:5; 13:8; 21:27.Hynrei, wat kmen ha kane, ba ïa ki mynsiem la pyndem hapoh jong phi; hynrei, to kmen namar ba la thoh ïa ki kyrteng jong phi ha bneng.”

Ka jingainguh U Jisu

(Mat. 11:25-27; 13:16-17)

21 # Mat. 11:25-27; 1 Kor. 1:26-29. Ha kata hi ka por, U Jisu u la shadkmen ha U Mynsiem Bakhuid, bad u la ong, “Nga nguh ïa me, ko Kpa, U Trai ka bneng bad ka khyndew, ba me la buhrieh ïa kine kiei kiei ruh na ki bastad bad na ki bashemphang, bad ba me la pynpaw ïa ki ha ki khunlung; shisha, ko Kpa, naba kumta ka la ibit ha khmat jong me. 22#Mat. 28:18; Ïoan. 3:35; 13:3; 10:15; 17:25.Ïa kiei kiei baroh la ai ha nga na U Kpa jong nga; ym don ruh uba ithuh ïa U Khun u long uei, hynrei, tang U Kpa; bad ïa U Kpa u long uei, hynrei, tang U Khun, bad uta ha uba U Khun u mon ban pynpaw.”

23 # Mat. 13:16-17; Ïoan. 8:56; Heb. 11:13; 1 Pet. 1:10-12. Te haba u la phai sha la ki synran kyrpang, u la ong, “Suk kita ki khmat kiba ïohi ïa kiei kiei ruh ïa kiba phi ïohi! 24Naba nga ong ha phi, ba bun ki nongïathuhlypa bad ki syiem, ki la kwah ban ïohi ïa kiei kiei ruh ïa kiba phi ïohi, hynrei, kim shym la ïohi, bad ban ïohsngew ïa kiei kiei ruh ïa kiba phi ïohsngew, hynrei, kim shym la ïohsngew.”

Ka pharshi u nong Samaria babha

25 # Mat. 22:34-40; 19:16; Mrk. 10:17; 12:28-34; Luk. 18:18. Ha khmih ruh, uwei u riewsaid u la ïeng bad u la tynjuh ïa U, u da ong, “Ko Nonghikai, ngan leh aïu ba ngan ïoh ka jingim bymjukut?” 26U te U la ong ha u, “La thoh aïu ha ka hukum? kumno me pule?” 27#Deu. 6:5; Leb. 19:18; Rom. 13:9; Gal. 5:14; Jak. 2:8.U te u la ïathuh bad u la ong, “ ‘Men ieit ïa U Trai uba U Blei jong me da ka dohnud jong me baroh, bad da ka mynsiem jong me baroh, bad da ka bor jong me baroh, bad da ka jingmut jong me baroh; bad ïa la u paramarjan kumba ïa lade.’ ” 28#Luk. 20:39; Leb. 18:25.U la ong te ha u, “Me la ïathuh ïa kaba dei: to leh ïa kane, te men ïoh im.”

29U te, ba u kwah ban pynksan ïa lade, u la ong ha U Jisu, “Uno te uba long u paramarjan jong nga?” 30U Jisu u la ïathuh bad U la ong, “Don uwei u briew uba la leit hiar na Jerusalem sha Jerikho; bad u la hap hapdeng ki nongtuh, kiba, haba ki la pynlyngkhuit ïa u, bad ba ki la shoh ïa u, ki la leit noh, ki da iehnoh ïa u, kum u baïap. 31Te uwei u lyngdoh, da kaba jia ryngkhat u la wan hiar na kata ka lynti; bad haba u la ïohi ïa u, u la ïaid kiar noh sharud lynti. 32Kumjuh ruh de, uwei u jaid Lebi, haba u la poi sha kata ka jaka, bad haba u la ïohi ïa u, u la ïaid kiar noh sharud lynti. 33#Luk. 9:51-56; 17:11-19; Ïoan. 4:4-42.Hynrei, uwei u kynja Samaria, katba u dang leit jingleit, u la poi haduh ha u; te haba u la ïohi ïa u, u la sngewsynei; 34bad u la wan ha u bad u la spaiñ ïa ki jingjngem snam jong u, u da theh ha ki, ïa ka umphniang bad ka Waiñ; te u la buh ïa u halor u mrad jong u hi, bad u la wallam ïa u sha ka ïingbasa, bad u la sumar ïa u. 35Te haba kaba lashai, haba un sa leit noh, u la sei noh ar tyngka bad u la ai ha u trai ïingbasa bad u la ong ha u, ‘To sumar ïa u; bad kaei kaei ruh ba men pynlut tam, nga, ynda nga wan phai pat, ngan siew pat ïa me.’ 36Na kine ki lai ngut, uno, me mut, uba la long u paramarjan ïa uta uba la hap hapdeng kita ki nongtuh?” 37Te u la ong, “Uta uba la leh isynei keiñ ïa u.” U Jisu namar kata U la ong ha u, “Khie leit, to leh ma me ruh kumjuh.”

U Jisu u leit jngoh ïa ka Martha bad ka Mari

38 # Ïoan. 12:1-3; 11:1-45. Te katba ki nang leit jingleit, u la rung ha kawei ka nongrit, bad kawei ka briew kaba kyrteng “ka Martha” ka la pdiang sngewbha ïa u sha ïing jong ka. 39Ka la don ruh ka para kaba kyrteng “ka Mari”, kaba la shong ruh ha ki kjat U Trai, bad kaba la shahshkor ïa ka ktien jong u. 40Hynrei, ka Martha ka la khuslai shaphang bun ka jingkam; te ka la wan ha u bad ka la ong, “Ko Trai, mem khmih ba ka para jong nga ka la iehnoh ïa nga ban shu trei jingtrei marwei? to ong ïa ka, namar kata, ba kan ïarap lem ïa nga.” 41#Luk. 7:13.Hynrei U Trai u la ïathuh bad u la ong ha ka, “Ko Martha, Martha, pha khuslai, bad pha pynshitom sat ïa lade shaphang bun kiei kiei ruh; 42hynrei, tang kawei kaba donkam eh; ka Mari te ka la jied ïa kata ka bynta ka babha, ïa kaba yn ym rong noh na ka.”

Currently Selected:

LOUKAS 10: KHB

Highlight

Copy