LOUKAS 1

Ka Jinglamphrang

1Namar ba don shisha shibun kiba la shimti ban thoh lang ter ter ïa ka jingïathuhkhana shaphang kiei kiei ruh ba la pyndep hapdeng jong ngi, 2#1 Ïoan. 1:1; Ki Kam. 1:21; Heb. 2:3.kat kumba ki la ai pateng ha ngi, kiba long hi ki nongïohi naduh kaba mynnyngkong bad ki nongïalap jong kata ka ktien: 3#Ki Kam. 1:1.ka la ibit ha nga ruh haba nga la ïai-ïit biang biang ïa kiei kiei baroh naduh kaba mynnyngkong, ban thoh ryntih ter ter ha me, A Theophilos u babha tam eh, 4#Ïoan. 20:31.ba men ïoh tip skhem ïa ka jingshisha shaphang kita kiei kiei ruh, ha kiba me la ïoh hikai.

Ka jingïathuhlypa shaphang ka jingkha ïa u Ïoannis Nongpynbaptis

5 # 1 Khrn. 24:10; 2 Khrn. 31:2; Mat. 2:1. Ha ki sngi u Herod, u syiem ka Judia, la don uwei u lyngdoh uba kyrteng “u Sakharaïa”, na ka jingkylliang sngi u Abia: bad ka tnga jong u na ki khun kynthei u Aaron, kaba kyrteng “ka Elisabet”. 6Baroh ar ngut ruh ki la long ki bahok ha khmat U Blei, ba ki da ïaid ha ki hukum bad ki niam jong U Trai baroh khlem jingrem. 7Te kim don khun, naba ka Elisabet ka la long ka balyngki, bad ki sngi ka rta jong ki baroh ar ngut ki la noh arsut.

8Ka la jia te, haba u dang leh ïa ka kam lyngdoh ha khmat U Blei, ha kaba ter ter ka jingkylliang sngi jong u, 9#Eks. 30:7.katba kum ka rukom ka kam lyngdoh, ka la dei ïa u ban thang ka jingainguh thang baiwbih, haba u la leit ha kata ka jaka kyntang ka jong U Trai. 10Bad uta u paidbah baroh u dang ïaduwai habar ha kata ka por ka jingainguh thang baiwbih. 11#Luk. 2:9; Ki Kam. 5:19.Te la mihpaw ha u, u angel U Trai, u da ïeng sha kamon ka duwan ka jingainguh thang baiwbih. 12Bad u Sakharaïa haba u la ïohi, u la sngewkhuslai eh, bad ka jingsheptieng ka la kem ïa u. 13#Luk. 1:30,60.Hynrei, uta u angel u la ong ha u, “Wat sheptieng, ko Sakharaïa: naba la shahshkor ïa ka jingduwai jong me; te ka tnga jong me ka Elisabet kan kha khun shynrang ïa me, bad men khot ïa ka kyrteng jong u, ‘u Ïoannis’: 14te men ïoh ka jingsngewbha bad ka jingkmen; shibun ruh kin ïashadkmen namar ka jingkha jong u; 15#Jkñ. 6:3; Luk. 7:33.naba un long uba khraw ha khmat U Trai, bad un ym dih ïa ka Waiñ lane ka kyiad; bad yn pyndap ïa u da U Mynsiem Bakhuid, wat naduh ka kpoh ka kmie jong u: 16shibun te na ki khun Israel un pynphai sha U Trai uba U Blei jong ki. 17#Mal. 4:5,6; Mat. 11:14; 17:13.U te un leit ha shuwa ka khmat jong U, ha ka mynsiem bad ka bor u Elias, ban pynphai ïa ki dohnud ki kpa sha ki khun, bad ïa ki bymkohnguh sha ka jingstad ki bahok; ban pynkhreh ïa U Trai, u paidlang ba la pynbit.” 18#Luk. 1:34.U Sakharaïa te u la ong ha uta u angel, “Da kumno ngan ïoh tip ïa kane? naba nga long u tymmen, bad ki sngi ka rta ka tnga jong nga ki la noh arsut.” 19#Dan. 8:16; 9:21; Mat. 18:10.Uta u angel u da ïathuh u la ong te ha u, “Nga long u Gabriel, uba ïeng ha khmat U Blei; te la phah ïa nga ban kren ha me, bad ban wallam ruh ha me ïa kine ki khubor babha. 20Te ha khmih, men sngap jar, bad men ym lah ban kren, tad ynda kata ka sngi ba yn pynlong ïa kine kiei kiei ruh; namar ba mem shym la ngeit ïa ki ktien jong nga, ïa kiba yn pyndep ha ka Ïa jong ki.” 21Uta u paidlang te u dang ïa-ap ïa u Sakharaïa, bad ki la sngewlyngngoh naba u slem katta katta ha kata ka jaka kyntang. 22Bad haba u la mih noh, um lah shuh ban kren ha ki; ki la shemphang te ba u la ïohi ïa ka jingithuhpaw ha kata ka jaka kyntang: u te u shu ïaipynpaw da ki dak ha ki, u la sah ruh u bymnangkren. 23Ka la jia ruh, ynda la dep kita ki sngi ka jingkam lyngdoh jong u, u la leit noh sha la ïing.

24Hadien kita ki sngi te, ka Elisabet ka tnga jong u ka la punkhun, bad ka la buhrieh ïa lade san bnai, ka da ong, 25#Jen. 30:23; Isa. 4:1.“Kumne U Trai u la leh ha nga ha ki sngi ha kiba u la khmih ïa nga, ban weng noh ïa ka jinglongbeiñ jong nga hapdeng ki briew.”

Ka jingïathuhlypa shaphang ka jingkha ïa U Jisu

26Te ha u bnai u bahynriew#1:26 u bnai u bahynriew: Ha kane ka bynta, kine ki kyntien ki thew ïa u bnai ka jingpun khun ka Elisabet. Khmih Luk. 1:36. la phah ïa uta u angel Gabriel na U Blei sha ka shnong ha Galilaïa, kaba kyrteng “ka Nasaret”, 27#Mat. 1:18.sha ka theisotti kaba la ïatehktien bad u briew, uba kyrteng “u Joseph”, na ka ïing u Dabid; ka kyrteng kata ka theisotti te ka long “ka Mari”. 28Uta u angel te haba u la leit hapoh sha ka, u la ong, “Khublei, pha kaba la ïoh ka jingaiei bakhraw! U Trai u don lem bad pha; la kyrkhu ïa pha hapdeng ki kynthei.” 29Ka te ka la sngewkhuslai eh na ka jingong jong u, bad ka la puson ha lade hato kaba kumno ka lah ban long kane ka jingkhublei. 30#Luk. 1:13.Uta u angel u la ong te ha ka, “To wat sheptieng, ko Mari; naba pha la shem ka jingaiei bad U Blei: 31#Luk. 2:21; Mat. 1:21.te ha khmih, phan sa punkhun ha la ka kpoh, bad phan kha ïa u khun, bad phan khot ïa ka kyrteng jong u, ‘U Jisu’: 32#Isa. 9:7; Dan. 2:44; Mat. 28:18.une un long U Bakhraw, bad yn khot ïa u, ‘U Khun U Bahakhlieh Tam Eh’: bad U Trai uba U Blei un ai ha u ïa ka khet u Dabid u kpa jong u; 33bad un synshar halor ka ïing u Jakob ha la ka rta; bad ka hima jong u ruh ka ban ym kut shuh.” 34#Luk. 1:18.Te ka Mari ka la ong ha uta u angel, “Kumno kane kan long, haba ngam pat ithuh ïa u briew?” 35#Mat. 1:20.Uta u angel te u da ïathuh u la ong ha ka, “U Mynsiem Bakhuid un wan ha pha, bad ka bor U Bahakhlieh Tam Eh kan kah halor jong pha; namar kata ruh, ïa ita i bakhuid ïa iba yn kha, yn khot ‘U Khun U Blei’; 36ha khmih ruh, ka Elisabet ka kur jong pha, ka ruh ka la punkhun shynrang ha ka jinglong tymmen jong ka; bad une u long u bnai u bahynriew ïa ka, ïa kaba la ju khot ‘ka balyngki’. 37#Jen. 18:14.Naba kawei ruh ka ktien na U Blei kan ym long khlem ka bor.” 38Ka Mari te ka la ong, “Ha khmih ka shakri jong U Trai, to kan long ha nga katba kum ka ktien jong me.” Te uta u angel u la leit noh na ka.

Ka Mari ka leit jngoh ïa ka Elisabet

39Ka Mari te ka la ïeng ha kita ki sngi, bad ka la leit kyrkieh sha ka ri lum, sha kawei ka shnong kaba ha Juda; 40bad ka la leit rung ha ka ïing u Sakharaïa bad ka la khublei ïa ka Elisabet. 41Ka la jia ruh, katba ka Elisabet ka la ïohsngew ïa ka jingkhublei jong ka Mari, la khih i khun ha ka kpoh jong ka; bad la pyndap ïa ka Elisabet da U Mynsiem Bakhuid. 42#Luk. 11:27-28.Ka la pyrta te da ka ktien bajam, bad ka la ong, “La kyrkhu ïa pha hapdeng ki kynthei, bad la kyrkhu ruh ïa u soh ka kpoh jong pha! 43Nangno ruh, la jia kane ïa nga, ba ka kmie U Trai jong nga ka la wan ha nga? 44naba, ha khmih, katba ka ktien ka jingkhublei jong pha ka sawa ha ki shkor jong nga, la khih i khun na kaba shadkmen ha ka kpoh jong nga: 45suk ruh kata kaba la ngeit; naba ka jingpyndep kan long ïa kita kiei kiei ruh, ïa kiba la kren ha ka da U Trai.”

Ka jingrwai ïaroh ka Mari

46 # 1 Sam. 2:1-10. Ka Mari ruh ka la ong,

“Ka dohnud jong nga

ka pynkhraw ïa U Trai,

47 # 1 Tim. 2:3; Tit. 2:10; Jud. 1:25. bad ka mynsiem jong nga

ka shadkmen ha U Blei

U Nongpynim jong nga;

48naba U la khmih

ha ka jinglong rangli

ka shakri jong U:

naba, ha khmih, naduh mynta

ki pateng bynriew baroh

kin khot ‘kaba suk’ ïa nga.

49Namar uta U Badonbor

U la leh ki jingphylla ïa nga;

bad ka bakhuid ka kyrteng

jong U,

50bad ka jingisynei jong U

pateng la pateng bynriew

ha kita kiba sheptieng ïa U;

51U pyni ïa ka borbah

da ka ksangkti jong U;

U pynsakma

ïa kiba sarong ha ka jingmut

ka dohnud jong ki:

52U pynhiar ïa kiba khraw bor

na ki khet,

bad U kyntiew ïa ki barangli;

53ïa ki bathngan U pyndap

da kiei kiei ki babha;

ïa ki bariewspah te

U phah noh suda.

54U shan bor ïa u Israel

u shakri jong U,

ba Un ïoh kynmaw

ïa ka jingisynei

55 # Jen. 17:7; 18:18; 22:17; Mik. 7:20. (kumba U la ïathuh

ha ki kpa jong ngi)

ïa u Abraham, bad ïa u symbai

jong u ha la ka rta.”

56Ka Mari te ka la sah kumba lai bnai bad ka, bad ka la leit phai noh sha la ïing.

Ka jingkha ïa u Ïoannis Nongpynbaptis

57Ka por ka Elisabet te ka la dap ïa ka ban kha; te ka la kha khun shynrang. 58Te ki paramarjan bad ki kur jong ka ki la ïohsngew ba U Trai u la pynkhraw ïa la ka jingisynei ïa ka, bad ki la ïakmen lem bad ka. 59#Leb. 12:3; Jen. 17:12.Ka la jia ruh ba ha ka baphra sngi ki la ïawan ban otsher ïa uta u khunlung; bad kin sa kyrteng ïa u ha ka kyrteng u kpa jong u, u Sakharaïa. 60Te ka kmie jong u ka la ïathuh bad ka la ong, “Ym kumta, hynrei, yn khot ‘u Ïoannis’ ïa u.” 61Ki te ki la ong ha ka, “Ym don uwei ruh na ki kur jong pha, ïa uba la khot da kane ka kyrteng.” 62Te ki la kylli da ki dak ïa u kpa jong u, kumno u, u mon ban khot ïa u. 63#Luk. 1:13.U la pan te ïa i dieng lyngkniap, bad u la thoh, u da ong, “ ‘U Ïoannis’ long ka kyrteng jong u.” Baroh te ki la sngewkyndit. 64La plie te ïa ka shyntur jong u kumne kumne ruh, bad ïa u thylliej jong u la pyllait, bad u la kren, u da ïaroh ïa U Blei. 65Te ka jingsheptieng ka la ngat ha baroh kiba shong sawdong ïa ki: bad ïa kine kiei kiei baroh la pynbna kylleng ka ri lum jong ka Judia baroh. 66Baroh ruh kiba la ïohsngew ki la buh khop ïa ki ha ki dohnud jong ki, ki da ong, “Une u khunlung shisha u ban long kumno?” Te ka kti U Trai ka la don lem bad u.

Ka jingïathuhlypa u Sakharaïa

67La pyndap ruh ïa u Sakharaïa u kpa jong u da U Mynsiem Bakhuid, bad u la ïathuhlypa, u da ong,

68“Long ba la kyrkhu ïa U Trai

uba U Blei jong u Israel;

naba U la wan khmih,

bad U la pynlong

ka jingsiewspah ïa la ki briew;

69bad U la pynmih

ïa ka reng ka jingpynim ïa ngi,

ha ka ïing u Dabid u shakri

jong U;

70kumba U la kren

da ka shyntur

ki nongïathuhlypa bakhuid

jong U,

kiba na mynbarim,

71ka jingpynim na kiba shun

ïa ngi,

bad na ka kti kita baroh

kiba isih ïa ngi;

72ban pyni ka jingisynei

ïa ki kpa jong ngi,

bad ban kynmaw

ïa ka jutang bakhuid jong U;

73ïa ka jingsmai ïa kaba

U la smai

ha u Abraham u kpa jong ngi,

74ïa ka ban ai ha ngi,

ïa kiba la knieh kynthet

na ka kti kiba shun ïa ngi,

ba ngin shakri ïa U

khlem da sheptieng,

75ha ka jingkhuid

bad ha ka hok

ha khmat jong U,

baroh ki sngi ka rta jong ngi.

76 # Mal. 4:5; Luk. 7:26. Me ruh, ko khun, yn khot

‘u nongïathuhlypa

jong U Bahakhlieh Tam Eh’;

naba men leit ha shuwa

ka khmat U Trai,

ban pynkhreh

ïa ki lynti bah jong U;

77 # Mrk. 1:4. ïa ka ban ai ka jingtip

ïa ka jingpynim

ha ki briew jong U,

ha kaba map ïa ki pop jong ki,

78 # Mal. 4:2; Eph. 5:14. da ka jingisynei bajem eh

U Blei jong ngi,

da kaba ka jingmih

ka sngi na jrong

kan wan khmih ïa ngi,

79 # Isa. 9:2; Mat. 4:16. ban pynshai ïa kita

kiba shong ha ka ba-dum

bad ha ka syrngiew ka jingïap,

ïa ka ban ïalam beit

ïa ki kjat jong ngi

sha ka lynti ka jingsuk.”

80 # Luk. 2:40; 2:52. Uta u khynnah te u la nang san, u la nang khraw bor ruh ha ka mynsiem, bad u la don ha ki ri khlaw haduh kata ka sngi ba u la pynpaw ïa lade ha u Israel.

Currently Selected:

LOUKAS 1: KHB

Highlight

Copy