MARKOS 16

Ka jingmihpat U Jisu

(Mat. 28:1-8; Luk. 24:1-12; Ïoan. 20:1-10)

1 # Mat. 28:1-8; Luk. 23:56; 24:1-10; Ïoan. 19:39; 20:1-2. Ynda la lah ka Sabbaton, te ka Mari ka nong Magdala, bad ka Mari ka kmie u Jakob, bad ka Salomi, ki la thied ïa ki jingiwbih, ba kin ïoh wan ban pynsleh ïa U. 2Te dang step eh ha ka sngi nyngkong jong ka taïew, ki la ïawan sha kata ka jingtep, hamar kaba mih ka sngi. 3Ki la ïakren paralok hi te, “Uei u ban pyntyllun noh ïa u maw ïa ngi na ka jingkhang ka jingtep?” 4(Te haba ki la jngoh, ki la ïohi ba la lah pyntyllun noh ïa uta u maw); naba u la long uba khraw eh. 5Haba ki la bsut te ha kata ka jingtep, ki la ïohi ïa u samla uba shong sha kamon, uba la kup ïa ka jaiñ lieh kaba jynsur; ki la sheptieng ruh. 6U te u la ong ha ki, “Wat sheptieng; phi wad ïa U Jisu uba na Nasaret, ïa uba la sahnarphna? U la mihpat, um don hangne: ha khmih ka jaka ha kaba ki la ïabuh ïa U. 7#Mat. 26:32; 28:7; Mrk. 14:28; Ïoan. 21:1-23.Hynrei, khie leit ïathuh ha ki synran jong U, bad ha u Petros, ba U leit sha shuwa jong phi sha Galilaïa; hangta phin ïohi ïa U, kumba U la ong ha phi.” 8Haba ki la mih noh te, ki la phet noh na kata ka jingtep, namar kaba sngewphieng bad kaba sngewkyndit ki la ngat ha ki; hynrei, kim shym la ïathuh ei ei ruh hano hano ruh naba ki la sheptieng.

U Jisu u mihpaw ha ka Mari ka nong Magdala

(Mat. 28:9-10; Ïoan. 20:11-18)

9Haba U la mihpat te mynstep eh ha ka sngi nyngkong jong ka taïew, U la paw nyngkong ha ka Mari ka nong Magdala, na kaba U la lah beh noh ïa ki hynñiew ki ksuid. 10Ka te ka la leit ïathuh ha kita kiba la ju don lem bad U, katba ki dang ïasngewsih bad ïaïam. 11Ki te haba ki la ïohsngew ba U dang im, bad ba la lah ïohi ruh ïa U da ka, kim ngeit.

U Jisu u mihpaw ha ki ar ngut ki synran

(Luk. 24:13-35)

12Hadien kata, U la paw ha kawei pat ka dur ha ki ar ngut na ki katba ki ïa-ïaid ha la ka lynti sha ka ri bri. 13Ki ruh ki la leit noh bad ki la ïathuh ha kita kiba dang sah, hynrei, ïa ki ruh, kim ngeit.

U Jisu u phah ïa ki khatwei ngut ban leit ïalap

(Mat. 28:16-20; Luk. 24:36-49; Ïoan. 20:19-23; Ki Kam. 1:6-8)

14Hadien te U la paw ha kita ki khatwei ngut hi, katba ki ïashong bam lem; bad U la pynrem ïa ka jingbymngeit bad ïa ka jingeh ka dohnud jong ki, namar ba kim ngeit ïa kita kiba la lah ïohi ïa U hadien ba U la mihpat. 15#Ki Kam. 1:8.U la ong ruh ha ki, “To leit sha ka pyrthei baroh, bad to ïalap ïa ka gospel ha ki bynriew baroh; 16te uta uba ngeit bad ïoh pynbaptis, yn pynim; hynrei, ïa uta u bymngeit, yn pynrem. 17Kine ki dak ruh kin bud ïa kita kiba ngeit; ha ka kyrteng jong nga kin ïabeh noh ïa ki ksuid, kin kren da ki thylliej bathymmai; 18kin rah noh ïa ki bseiñ, bad lada kin dih ei ei ruh kaba pynïap, kan ym pynsniew ïa ki keiñ; kin buh ïa ki kti ha ki bapang, bad kita kin khiah.”

La pdiang noh ïa U Jisu sha bneng

(Luk. 24:50-53; Ki Kam. 1:9-11)

19 # Ki Kam. 1:9-11. Kumta te ïa U Trai Jisu, hadien ba U la lah kren ha ki, la pdiang soit sha bneng, bad U la shong sha kamon U Blei.

20Ki te haba ki la mih noh, ki la ïalap kylleng sawdong, U Trai ruh U da trei lem, bad U da pynskhem ïa kata ka ktien da ki dak kiba bud. Amen.

Currently Selected:

MARKOS 16: KHB

Highlight

Copy