2 KORINTH 8

Ka jingïasynñiang sbai sbun ki balang ha Makedonia

1 # Rom. 15:26. Nga pyntip ha phi ruh, ko parabangeit, shaphang kata ka jingaiei U Blei ïa kaba la ai ha kita ki balang ka Makedonia. 2Kumno ba ka jingtynjuh bakhraw ka jingjynjar, ka jingdap ka jingkmen jong ki, bad ka jingduk sat jong ki, ki la roi kyrhai haduh ka jingshlei ka jingai kylluid jong ki. 3#1 Kor. 16:2.Namar katba kum ka bor jong ki, nga phla, shisha bad palat ïa ka bor jong ki, ki la sngewbha hi ban ai; 4#Ki Kam. 24:17; Rom. 15:31.ki da ïakyrpad ïa ngi da ka jingkyrpad kaba jur ba ngin shim ïa kata ka jingai, bad ïa kata ka jingïasyllok ha kaba ïasam ïa ka ha ki riewkhuid. 5Te ïa kane ki la leh, ym kat kumba ngi la ïakhmih lynti, hynrei, ki la aiti ïa lade nyngkong ha U Trai, ynda kumta, ha ngi ruh da ka mon U Blei; 6#2 Kor. 8:16,23; 2:13.kat haduh ba ngi la kyntu ïa u Titos, ba kumba u la lah sdang mynshuwa, kumta ruh, un pyndep noh ha phi ïa kane ka jingaiei ruh. 7Hynrei, kumba phi la roi kyrhai ha kiei kiei baroh, ha ka jingngeit, bad ka ktien, bad ka jingtip, bad ka jingminot baroh, bad ha ka jingieit jong phi sha ngi, to sumar ba phin roi kyrhai ha kane ruh ka jingaiei.

8Ngam kren kumba da ka hukum, hynrei, namar ka jingsumar minot jong kiwei, bad ban tynjuh ïa ka jingsngur ka jingieit jong phi. 9#2 Kor. 6:10.Namar phi ithuh ïa ka jingaiei U Jisu Khrist uba U Trai jong ngi; ba la u la long u bariewspah, pynban, u la wan long duk na ka bynta jong phi, khnang ban pynriewspah ïa phi da kata ka jingduk jong u. 10#2 Kor. 9:2; 1 Kor. 16:2-3.Hynrei, ha kane nga shu pyni ïa la ka jingmut; namar kane ka myntoi ïa phi, kiba la sdang nyngkong la mynnymwei, ym tang ïa ka ban leh, hynrei, ïa ka ban mon sngewbha. 11Te mynta, to pyndep noh ruh ïa kata ka jingleh, ba kat kumba la don kata ka jingsngew-la-kloi ïa ka ban mon sngewbha hi, kumta ruh, kan don ka jingpyndep noh na kata kaba phi don. 12Namar lada don lypa kata ka jingsngew-la-kloi, la pdiang sngewbha ïa ka kat kum kaba u briew u don, ym kat kum kaba um don. 13Namar ngam mut ban pynjem ïa kiwei, bad ban pynshipa ïa phi: 14hynrei, da kaba marryngkat; ha kane ka por kaba mynta kata ka jingroi kyrhai jong phi kan ïoh pyndap ïa kata ka jingkyrduh jong ki, ba kata ka jingroi kyrhai jong ki ruh kan ïoh long ka jingpyndap ïa ka jingkyrduh jong phi; ba kumta, kan ïoh long kaba marryngkat; 15#Eks. 16:18.kumba la thoh: “Uta uba la lum bun, um shym la don tam keiñ; bad uta uba la lum khyndiat, um shym duna ruh.”

U Titos bad ki para baïatrei lem

16Hynrei, ka jingnguh ïa U Blei uba buhti ïa kajuh ka jingsumar minot na ka bynta jong phi ha ka dohnud u Titos; 17naba shisha, u la pdiang sngewbha ïa ka jingkyntu jong ngi; hynrei, ba u long hi uba shitrhem eh, u la wan sha phi da la ka mon sngewbha hi. 18#2 Kor. 12:18.Ngi la ïaphah ryngkat ruh bad u ïa uta u parabangeit uba ka jingïaroh jong u ha ka gospel ka don ha ki balang baroh; 19#1 Kor. 16:3-4.bad ym tang kata hi, hynrei, ïa uba la jied ruh da kita ki balang ban leit ryngkat bad ngi, lem bad kane ka jingaiei ïa kaba ngi ïasam ïa ka burom U Trai, bad ban pynpaw ïa ka jingsngew-la-kloi jong phi; 20da kaba kiar na kane, ba uno uno ruh un ym ïoh kynnoh ïa ngi ha kane ka jingai bun sbai kaba ngi sam; 21#Pro. 3:4.da kaba pynkhreh lypa ïa kiei kiei ki bahok, ym tang ha khmat U Trai, hynrei, ha khmat ki briew ruh. 22Ngi la ïaphah ryngkat ruh bad ki, ïa u parabangeit jong ngi, ïa uba ngi la shem bunsien ba u da long uba sumar ha shibun kiei kiei ruh, hynrei, mynta uba kham sumar shibun, namar kata ka jingshaniah bakhraw kaba u don ha phi. 23Lada don ba kylli shaphang u Titos, u long u para baïabynta lem jong nga, bad u lok baïatrei lem shaphang jong phi; lane shaphang ki para jong ngi, ki long ki nongkit-ktien ki balang, bad ka burom ïa U Khrist. 24Namar kata, to phin pyni ha ki ha khmat kita ki balang ïa ka dak ka jingieit jong phi, bad ka jingïaroh jong ngi na ka bynta jong phi.

Currently Selected:

2 KORINTH 8: KHB

Highlight

Copy