2 KORINTH 7

1Namar kata, haba ngi don kine ki jingkular, ko ki hep, to ngin ïapynkhuid noh ïa lade na ka jingbit-tngit ka doh bad ka mynsiem baroh, da kaba pynjanai ïa ka jingkhuid ha ka jingsheptieng ïa U Blei.

Ka jingkmen u Paul

2 # 2 Kor. 6:12-13. To phin pdiang sngewbha ïa ngi; ngim shym leh bymdei ïano ïano ruh, ngim shym pynsniew ïano ïano ruh, ngim shym shukor ïano ïano ruh. 3#2 Kor. 6:11-12.Ngam ong ïa kane ïa ka ban pynrem ïa phi: namar nga la ong mynshuwa, ba phi ïalong ha ki dohnud jong ngi, ïa ka ban ïaïap-lem bad ban ïa-im-lem. 4Te ka jingshlur jong nga ban kren ha phi ka long kaba khraw, ka jingkren pyndonburom jong nga ka long kaba khraw shaphang jong phi; la pyndap ïa nga da ka jingtngen, nga shlei da ka jingkmen hapdeng ka jingjynjar jong ngi baroh.

5 # 2 Kor. 2:13; 4:8. Namar haba ngi la lah poi ha Makedonia ruh, ka met jong ngi kam shym ïoh suk khyndiat; hynrei, ha kiei kiei baroh la pynjynjar ïa ngi, habar don ki jingïaleh, hapoh ka jingsheptieng. 6#2 Kor. 2:13; 7:13-14.Hynrei, U Blei uba pyntngen ïa kita ki bajynjar, u la pyntngen ïa ngi ruh da ka jingwan poi u Titos; 7te ym tang da kata kaba poi ma u, hynrei, da kata ka jingpyntngen da kaba la pyntngen ïa u shaphang jong phi ruh, mynba u da ïathuh ha ngi ïa ka jingkwah hir hir jong phi, ïa ka jingïam sngewsih jong phi, ïa ka jingshitrhem jong phi na ka bynta jong nga, katba nga la kham kmen pynban. 8#2 Kor. 2:2.Naba lada nga la pynsngewsih te ïa phi da kata ka shithi, ngam babe shuh, la nga la babe, namar nga sngewthuh ba kata ka shithi ka la pynsngewsih ïa phi, la ka long tang shi por ruh; 9mynta, nga kmen keiñ, ym da lei lei naba la shu pynsngewsih ïa phi, hynrei, naba la pynsngewsih ïa phi ïa ka ban kylla-ka-bamut; namar la pynsngewsih riewblei ïa phi, ba kumta, phin ym shah duh ha kaei kaei ruh da ngi. 10Namar kata ka jingsngewsih bariewblei ka pynlong ka jingkylla-ka-bamut sha ka jingpynim ka bymbabe shuh; hynrei, ka jingsngewsih ka jong ka pyrthei ka pynlong ka jingïap. 11Namar ha khmih, kane kajuh hi kaba la pynsngewsih riewblei ïa phi, kaba katno ka jingsumar minot ka la pynlong ha phi, ho-oid, kaba katno ka jingïada ïa lade, ho-oid, kaba katno ka jingsatnud, ho-oid, kaba katno ka jingsheptieng, ho-oid, kaba katno ka jingkwah hir hir, ho-oid, kaba katno ka jingshitrhem, ho-oid, kaba katno ka jinglehsat! Ha kiei kiei baroh, phi la pyni ïa lade kiba sngur ha kane ka kam. 12#2 Kor. 7:8; 2:3,9.Haba kumta te, la nga la thoh ha phi, ngam shym la thoh tang na ka bynta uta uba la leh bymdei lymne na ka bynta uta uba la lah shah bymdei, hynrei, ba ka jingsumar minot jong phi na ka bynta jong ngi ha khmat U Blei, kan ïohpaw ha phi. 13Naba kumta keiñ, la pyntngen ïa ngi:

Bad ha ka jingtngen jong ngi, ngi la ïakmen kham tam namar ka jingkmen u Titos, naba la pynpyngngad ïa ka mynsiem jong u da phi baroh. 14Naba lada nga la kren ïaroh ei ei ha u shaphang jong phi, ym shym la pynlehrain ïa nga; hynrei, kat kumba ngi la lah ïathuh ha phi ïa kiei kiei baroh ha kaba shisha, kumta biang ruh kata ka jingïaroh jong ngi ha khmat u Titos, la shem ba ka long kaba shisha. 15Bad ka jingsngewieit jong u ïa phi ka kham jur shikatdei eh, haba u kynmaw ïa ka jingkohnguh jong phi baroh, kumno ba da ka jingsheptieng bad ka jingkhynñiuh phi la ïa-pdiang ïa u. 16Nga kmen, namar kata, ba nga don ka jingshaniah ha phi ha kiei kiei baroh.

Currently Selected:

2 KORINTH 7: KHB

Highlight

Copy