1 TIMOTHI 6

1Kat kiba long ki shakri hapoh ka lyngkor, to ai ba kin ñiew ïa kita ki kynrad la ki jong hi kiba dei ban ïoh ka burom baroh, ba yn ym krenbeiñ ïa ka kyrteng ka jong U Blei bad ïa kata ka jinghikai. 2Kita ruh kiba don ki kynrad kiba ngeit, to wat ai ba kin ibeiñ ïa ki, naba ki long ki parabangeit; hynrei, to kin kham shakri ïa ki, naba kita kiba ïaïoh bynta na kata ka jinglehbha, ki long ki bangeit bad kiba la ieit.

Ka jingmaham shaphang kiba hikai ïa kaba khyllah bad shaphang ka jingkwah ban long riewspah

Ïa kine kiei kiei ruh, to men hikai bad men kyntu. 3Lada uno uno ruh u hikai da kumwei, bad um kohnguh ïa kita ki ktien bajanai jong U Jisu Khrist uba U Trai jong ngi bad ïa kata ka jinghikai kaba katba kum ka jingriewblei, 4la pynsarong eh ïa u, haba um tip ei ei ruh, hynrei, u da skuiñ shaphang ki jingïasaid bad ki jingïaleh ktien, na kiba ki mih ka jingbishni, ka jingïania, ki jingkrenbeiñ, ki jingtharai sniew, 5ki jingïasaid ki briew ba la pynpyut ha la ka jingmut, bad ki bymdon ka jingshisha, ki da tharai ba ka jingriewblei ka long ka lad ban myntoi. 6Hynrei, kata ka jingriewblei lem bad ka jingsngewhun ka long ka jingmyntoi bakhraw. 7Namar ngim shym wallam ei ei ruh sha ka pyrthei, bad ngim lah ban leit kit noh ei ei. 8Hynrei, haba ïoh jingbam bad jingkup, da kata ngin sngewhun. 9Hynrei, kita kiba kwah eh ban riewspah, ki hap sha ka jingpynshoi bad ka jingriam, bad sha ki bun ki jingkwah brai kiba bieit bad kiba pynsniew, kiba pynjyllop ïa ki briew sha ka jingjot bad ka jingkordit. 10Namar u thied jong ki kynja basniew baroh, long kata kaba ieit sbai: ïa kaba don kiba haba ki beh eh, la ïalam bakla ïa ki na ka jingngeit, bad la dung ïa ki hi, da kiba bun ki jingsngewsih.

Ka jingkyntu ïa u bangeit

11Hynrei, ma me, A u briew u jong U Blei, to phet ïap noh na kine kiei kiei ruh; bad to beh brai ïa ka hok, ïa ka jingriewblei, ïa ka jingngeit, ïa ka jingieit, ïa ka jingïaishah, ïa ka jingjemnud. 12To ïaleh ïa ka jingïaleh babha jong ka jingngeit, to men bat khak ïa ka jingim bymjukut, sha kaba la khot ruh ïa me, bad me la phla ïa kata ka jingphla babha ha khmat bun ki sakhi. 13#Ïoan. 18:37.Nga hukum ïa me ha khmat U Blei, uba pynlong im ïa kiei kiei baroh, bad ha khmat U Khrist Jisu uba la sakhi ha khmat u Pontios Pilat ïa kata ka jingphla ka babha, 14ba men sumar ïa kane ka hukum khlem thohbria, khlem shah kynnoh pop, haduh kata ka jingmihpaw U Jisu Khrist uba U Trai jong ngi: 15ïa kaba un pyni ha la ki por ba dei hi, uba long Uba la kyrkhu bad U Bakhrawbor tang ma u hi, U Syiem ki syiem bad U Trai ki trai; 16uba tang ma u hi uba don ka jingbymïap, uba shong ha ka jingshai bym lah kot; ïa uba ym don briew uba la ïohi, lane ba lah ban ïohi; ha uba to long ka burom bad ka borbah bymjukut: Amen.

17To hukum ïa kita ki bariewspah ha kane ka pyrthei ban ym sngewmeng, lane ban ym kyrmen ha ka jingbymthikna ka spah, hynrei, ha U Blei, u ba ai kyrhai ha ngi ïa kiei kiei baroh ïa ka ban pyndonkam sngewbha ïa ki; 18ba kin leh bha, ba kin man kyrhai ha ki jingleh babha, ba kin long kiba la kloi ban ai, kiba la kloi ban ïasngewlem; 19kiba kynshew ïa lade ïa ka nongrim babha ïa ka por lawei, khnang ba kin ïoh bat khak ïa kata ka jingim kaba long ka jingim kaba shisha.

20A Timothi, to sumar kyndong ïa kata kaba la aiti ha me, da kaba phai noh na kita ki ktien bieit bathala bad ki jingïaleh pyrshah jong kata ka jingtip ïa kaba la shu khot kumta; 21ïa kaba don kiba haba ki la kohnguh, ki la bakla shaphang ka jingngeit.

To long ka jingaiei bad phi: Amen.

Currently Selected:

1 TIMOTHI 6: KHB

Highlight

Copy