1 TIMOTHI 5

Ka jingkyntu ban leh sumar ha ka jingïadei parabangeit

1To wat sneng eh ïa uba kham tymmen, hynrei, men kyntu ïa u, kum ïa u kpa; bad ïa kita kiba kham samla, kum ïa ki para keiñ, 2bad ïa ki kynthei kiba kham tymmen, kum ïa ki kmie; bad ïa ki kynthei kiba kham samla, kum ïa ki para, da ka jinglong sngur baroh.

3To burom ïa ki riewkynthei kiba long shisha ki riewkynthei. 4Hynrei, lada kano kano ka riewkynthei ka don ki khun lane ki ksiew, to ai kin nang nyngkong ban pyni ka jingriewblei ïa ka ïing la ka jong hi, bad ban siew kylliang ha la ki kmie ki kpa: namar kane ka long ka babha bad kaba pdiang hun ha khmat U Blei. 5Te kata kaba long da shisha ka riewkynthei bad ba marwei, ka kyrmen ha U Blei, bad ka ïaineh ha ki jingkyrpad bad ki jingduwai mynmiet bad mynsngi. 6Hynrei, kata kaba im pahuh ka la ïap naduh ba dang im. 7Te ïa kine kiei kiei ruh, to hukum, ba kin ïoh long kiba khlem shah kynnoh pop. 8Hynrei, lada uno uno ruh um sumar sukher ïa la ki jong hi, bad kham tam ïa kiba dei ha la ïing, u la len ïa ka jingngeit, bad u long kham sniew ban ïa u bymngeit.

9Wat ai ban kheiñ ïano ïano kum ka riewkynthei, kaba duna hynriewphew snem ka rta, kaba la long ka tnga jong uwei u briew, 10ïa kaba la phla babha shaphang ki jingleh babha; lada ka la ri khun, lada ka la khot basa ïa ki nongwei, lada ka la sait ïa ki kjat ki riewkhuid, lada ka la ïarap ïa kiba shipa, lada ka la ïaibeh biang ïa ka jingleh babha baroh. 11Hynrei, to kyntait ïa ki riewkynthei ba kham poh ka rta; namar ynda ki la ïaleh bymsuidñiew ïa U Khrist, kin kwah ban shongkurim noh; 12kiba don ka jingpynrem naba ki la lyndet noh ïa la ka jingngeit ka banyngkong. 13Bad ruh putet ki nang mlien ban long kiba alhia haba ki kyntiap na ïing sha ïing; te ym tang kiba alhia, hynrei, kiba blab blab ruh bad kiba lorni, haba ki kren ïa kiei kiei ruh ki bymdei ban kren. 14Nga mon, namar kata, ïa ki riewkynthei ba kham poh ka rta ban shongkurim, ban kha khun, ban sharai ïa la ka ïing, ban ym ai daw kaba kumno kumno ïa u nongshun ban krenbeiñ. 15Namar don lypa kiba la lah kynran noh sha u Soitan. 16Lada uno uno ruh u bangeit lane ka bangeit ki don ki riewkynthei, to kin ïarap ïa ki, bad wat ai ba yn ban khia ïa ka balang; ba kan ïoh ïarap ïa kita kiba long keiñ ki riewkynthei shisha.

17Kita ki tymmen basan kiba la synshar bha to ai ba yn ñiew ïa ki kiba dei ban ïoh ar shah ka burom, kham tam kita kiba trei minot ha ka ktien bad ha ka jinghikai. 18#Deu. 25:4; Mat. 10:10; Luk. 10:7; 1 Kor. 9:9,14.Namar kata Ka Jingthoh ka ong: “Men ym khum shyntur ïa u masi dab haba u dang ïuh ban khlur kba.” Bad: “Ka dei ïa u nongtrei ban ïoh ïa la ka bainong.” 19#Deu. 17:6; 19:15.Me wat pdiang ïa ka jingmudui ïa u tymmen basan, lymda na ar ngut ne lai ngut ki sakhi. 20Ïa kita kiba leh pop, to sneng ha khmat baroh, ba kita kiwei ruh kin sheptieng. 21Nga hukum jur ha khmat U Blei, bad U Khrist Jisu, bad ki angel kiba la jied, ba men sumar ïa kine kiei kiei ruh khlem da bishar lypa, khlem da leh shiliang ïa kaei kaei ruh. 22Me, wat buh kyrkieh ïa la ki kti hano hano ruh em; lymne wat ïakit pop lem bad kiwei ki briew: to ri ïa lade uba sngur. 23Me, wat long shuh u nongdih um, hynrei, to shim khyndiat ka Waiñ na ka bynta ka 'nierbah jong me, bad kita ki jingkhrew jyndei jong me. 24Don ki briew kiba ki pop jong ki, ki paw lypa, ki da ïaid noh ha shuwa sha ka jingbishar; hynrei, don ruh ki briew kiba ki ïabud nadien. 25Kumjuh ruh, don ki jingleh babha kiba paw lypa; bad ïa kita kiba long da kumwei, ym lah ban buhrieh.

Currently Selected:

1 TIMOTHI 5: KHB

Highlight

Copy