2 TIMOTHI 1

Ka jingkhublei

1U Paul, u apostol U Khrist Jisu da ka mon U Blei, katba kum ka jingkular ka jingim kaba ha U Khrist Jisu,

2 # Ki Kam. 16:1. Ha u Timothi, u khun ba-ieit jong nga:

Ka jingaiei, ka jingisynei, ka jingsuk, na U Blei uba U Kpa bad U Khrist Jisu uba U Trai jong ngi.

Ka jingainguh bad ka jingpynshait

3Nga ainguh ïa U Blei, ïa uba nga shakri na la ki kpa tymmen da ka jingïatiplem bakhuid, ba nga don ka jingkynmaw kaba khlem da pud keiñ shaphang jong me ha ki jingduwai jong nga mynmiet bad mynsngi, 4nga da kwah eh ban ïohi ïa me, haba nga kynmaw ïa kita ki jingjaw ummat jong me, ba yn ïoh pyndap ïa nga da ka jingkmen: 5#Ki Kam. 16:1.haba nga la kynmaw ïa kata ka jingngeit bakhlem arsap kaba ha me, kaba la shong nyngkong ha ka kiaw jong me ka Lois, bad ka kmie jong me ka Ïuniki; bad nga ngeit skhem, ha me ruh. 6Namar kane ka daw keiñ, nga pynkynmaw ïa me ba men tynruh ïa kata ka jingai jong U Blei, kaba don ha me da kata kaba buh ïa ki kti jong nga. 7Namar U Blei um shym la ai ha ngi, ka mynsiem ka jingsheptieng; hynrei, ka jong ka bor, bad ka jong ka jingieit, bad ka jingleh adkar.

8Namar kata, wat sngewlehrain ïa kata ka jingphla ïa U Trai jong ngi, lymne ïa nga u nongsah byndi jong u; hynrei, to ïashah shitom bad ka gospel katba kum ka bor U Blei; 9uba la pynim ïa ngi, bad uba la khot ïa ngi da ka jingkhot bakhuid, ym katba kum ki jingleh jong ngi, hynrei, katba kum ka jingthmu bad ka jingaiei jong u hi, ïa kaba la ai ha ngi ha U Khrist Jisu mynshuwa ki Ïa bymjukut, 10hynrei, ïa kaba la pynpaw mynta da kata ka jingmihpaw U Nongpynim jong ngi U Khrist Jisu, uba la pynduh noh ïa ka jingïap, bad uba la pynpaw ïa ka jingim bad ïa ka jingbympyut da ka gospel: 11#1 Tim. 2:7.sha kaba la thung ïa nga u nongïalap, bad u apostol, bad u nonghikai. 12Namar kane ka daw, nga shah ruh ïa kine kiei kiei: pynban, ngam sngewlehrain; namar nga la ithuh ïa uta ha uba nga la ngeit, bad nga ngeit skhem ba u long uba lah ban da ïa kata kaba nga la aiti ha u hamar kata ka sngi. 13To ïaibat ïa ka rukom ki ktien bajanai, ïa kiba me la ïohsngew na nga, ha ka jingngeit bad ka jingieit kaba ha U Khrist Jisu. 14Ïa kata ka babha ïa kaba la aiti ha me, to sumar da U Mynsiem Bakhuid uba shong ha ngi.

15Me tip ïa kane, ba kita baroh kiba ha Asia ki la ïaphai dien noh na nga; na ki jong kita, long u Phijelos bad u Hermojenis. 16To U Trai un ai ka jingisynei ha ka ïing u Onesiphoros; naba bunsien u la pynpyngngad ïa nga, bad um shym la sngewlehrain ïa ka kynjri jong nga; 17hynrei, mynba u la don ha Rom, u la wad eh ïa nga, bad u la shem ïa nga. 18(To U Trai un ai ha u ban shem ka jingisynei na U Trai ha kata ka sngi); bad ha kiba katno kiei kiei u la shakri ha Ephesos, me tip bha eh.

Currently Selected:

2 TIMOTHI 1: KHB

Highlight

Copy