1 ÏOANNIS 3

Ki khun U Blei

1 # Ïoan. 1:12; 16:3. Ha khmih phi, kaba kumno ka jingieit uta U Kpa u la ai ha ngi, ba la khot ïa ngi “ki khun U Blei”: bad kumta ngi long. Namar kane keiñ, kata ka pyrthei kam ithuh ïa ngi, naba kam shym la ithuh ïa u. 2Ko hep ba-ieit, mynta ngi long ki khun U Blei, bad ym pat la pynpaw ïa kaei ba ngin sa long; hynrei, ngi tip ba, ynda la pynpaw ïa u, ngin long kiba kum ma u; naba ngin ïohi ïa u kumba u long hi. 3Te uwei pa uwei baroh uba don kane ka jingkyrmen ha u, u pynkhuid ïa lade, kat kumba ma u, u long u bakhuid.

4Uwei pa uwei baroh uba ïai-leh ïa ka pop u ïai-leh ruh ïa ka jingpalat hukum; te ka pop ka long ka jingpalat hukum. 5#Ïoan. 1:29.Bad phi tip ba la pynpaw ïa u khnang ba un da ïoh kit noh ïa ki pop jong ngi; bad ka pop kam don ha u. 6Uwei pa uwei baroh uba ïaisah ha u, um ju leh pop; uwei pa uwei baroh uba leh pop, um shym la ïohi ïa u, lymne um shym la ithuh ïa u. 7Ko khun hep, wat ai ïano ïano ruh ba un ïalam bakla ïa phi; jar uba ïai-leh ïa ka hok u long u bahok, kat kumba ma u, u long u bahok. 8#Ïoan. 8:34,44.Jar uba ïai-leh ïa ka pop u long na u Soitan; naba uta u Soitan u ju leh pop naduh kaba mynnyngkong. Ïa kane khnang, la pynpaw ïa U Khun U Blei, ba un ïoh pynjot noh ïa ki jingleh jong uta u Soitan. 9#1 Ïoan. 5:18.Uwei pa uwei baroh ba la kha na U Blei um ju leh ïa ka pop, naba u symbai jong u, u ïaisah hapoh jong u: te um lah ban ïai-leh pop, naba la kha ïa u na U Blei. 10Ha kane keiñ, ki la paw kita ki khun U Blei, bad kita ki khun u Soitan. Uwei pa uwei baroh u bym ju leh ïa ka hok um long na U Blei, lymne uta u bymieit ïa la u para.

Ka dei ban ïa-ieit paralok hi

11 # 1 Ïoan. 1:5; Ïoan. 13:34. Naba kane ka long kata ka ktien ïa kaba phi la ïohsngew naduh kaba mynnyngkong, ba ngin ïa-ieit paralok hi: 12#Jen. 4:8.ym kumba u Kain u la long na uta u basniew, bad u la pynïap noh ïa la u para. Te na ka balei u la pynïap noh ïa u? Naba ki jingleh jong u hi ki long ki basniew, hynrei, kita ki jong uta u para jong u ki bahok. 13#Ïoan. 15:18-19.Phi wat sngewkyndit, ko parabangeit jong nga, lada ka pyrthei ka shun ïa phi. 14#Ïoan. 5:24.Ngi tip ba ngi la lait shiliang na ka jingïap sha ka jingim, naba ngi ieit ïa ki parabangeit. Jar u bymieit u dang sah ha kata ka jingïap. 15#Ïoan. 8:44.Uwei pa uwei baroh uba shun ïa la u parabangeit u long u nongshohnoh briew: bad phi tip ba ym don u nongshohnoh briew uba don ka jingim bymjukut kaba sah ha u. 16#Ïoan. 13:1; 15:13.Ha kane ngi la ithuh ïa kata ka jingieit, naba u la aiti noh ma u ïa la ka jingim na ka bynta jong ngi: ngi ruh, ka dei ïa ngi ban aiti noh ïa la ki jingim na ka bynta ki parabangeit. 17Hynrei, jar uba don ka spah ka jong ka pyrthei, bad u da ïohi ïa u parabangeit jong u ha ka jingkyrduh, bad un khang khop ïa ka jingsngewsynei jong u na u, hato kumno kata ka jingieit jong U Blei ka ïaisah ha uta? 18#Jak. 1:22.Ko khun hep, wat ai ngin ïa-ieit tang da ka ktien hi, lymne da u thylliej; hynrei, ha ka jingleh bad ha ka jingshisha.

Ka jingsngewshlur sha U Blei

19Te da kane ngi tip ba ngi long na kata ka jingshisha, bad ngin pynskhem ïa la ki dohnud ha khmat jong u, 20ha kita kiei kiei ba kata ka dohnud jong ngi ka pynrem ïa ngi; naba U Blei u long uba kham khraw ïa ka dohnud jong ngi, bad u tip ïa kiei kiei baroh. 21#1 Ïoan. 5:14.Ko hep ba-ieit, lada kata ka dohnud jong ngi kam pynrem ïa ngi, te ngi don ka jingsngewshlur sha U Blei. 22Bad lada ngi pan ïa kaei kaei ruh, ngi pdiang na u, naba ngi sumar ïa ki hukum jong u, bad ngi ïai-leh ïa kita kiei kiei ruh ba pynsngewbha ha khmat jong u. 23#Ïoan. 6:29; 13:34; 15:17.Te kane ka long ka hukum jong u, ba ngin ngeit ha ka kyrteng U Khun jong u, U Jisu Khrist, bad ba ngin ïa-ieit paralok hi, kumba u la ai ïa ka hukum ha ngi. 24#1 Ïoan. 4:13.Bad uta uba sumar ïa kita ki hukum jong u, u ïaisah ha u, bad u ruh ha uta. Te da kane ngi tip ba u ïaisah ha ngi, na uta U Mynsiem ïa uba u la ai ha ngi.

Currently Selected:

1 ÏOANNIS 3: KHB

Highlight

Copy