1 KORINTH 15

Shaphang ka jingmihpat U Khrist

1Te nga pyntip ha phi, ko parabangeit, ïa kata ka gospel ïa kaba nga la ïalap ha phi, bad ïa kaba phi la pdiang, bad ha kaba phi ïai-ïeng ruh, 2da kaba yn pynim ïa phi ruh, lada phi bat skhem ïa kaba kumno ka ktien nga la ïalap ha phi, lymda phi la ngeit lehnohei.

3 # 1 Kor. 11:23; 1 Pet. 2:24; Isa. 53:5-12. Namar nga la aiti pateng ha phi ka banyngkong eh ïa kata kaba nga la pdiang ruh, ba U Khrist u la ïap namar ki pop jong ngi katba kum Ki Jingthoh, 4#Mat. 16:21; Salm. 16:8-9; Hos. 6:2.bad ba la tep ïa u, bad ba la pynmih pat ïa u ruh ha ka balai sngi katba kum Ki Jingthoh, 5#Luk. 24:34; Mat. 28:16,17; Mrk. 16:14; Luk. 24:36; Ïoan. 20:19.bad ba la ïohi ïa u da u Kephas, hadien kata, da ki khat-ar ngut; 6hadien kata, la ïohi ïa u da ki sanspah tam ki parabangeit shisyndon, kiba kham bun na kita ki sah haduh mynta, hynrei, kiwei ki la ïohthiah noh; 7hadien kata, la ïohi ïa u da u Jakob, ynda kumta, da ki apostol baroh. 8#1 Kor. 9:1; Gal. 1:16; Ki Kam. 9:3-6.Bad khatduh eh, kum ha uba khalor, u la paw ha nga ruh. 9#Ki Kam. 8:3.Namar nga long u barit tam na ki apostol, uba ngam long uba dei ban khot ïa nga “u apostol”, namar nga la behbeiñ ïa ka balang U Blei. 10Hynrei, da ka jingaiei U Blei nga long kane kaba nga long: bad kata ka jingaiei jong u kaba la ai ha nga, kam shym la long lehnohei keiñ; hynrei, nga la trei minot kham tam shikatdei ban ïa ki baroh: te pynban ym ma nga, hynrei, kata ka jingaiei U Blei keiñ, kaba la don lem bad nga. 11Kumta te, la ma nga ne ma ki, kumta ngi ïai-ïalap, kumta ruh phi la ngeit.

Shaphang ka jingmihpat ki baïap

12Hynrei, lada ïalap ïa U Khrist ba la pynmih pat ïa u na ki baïap, hato kumno ba kiba hapdeng jong phi ki ïa-ong, ba ym don ka jingmihpat ki baïap? 13Hynrei, lada ym don ka jingmihpat ki baïap, te ïa U Khrist ruh ym shym la pynmih pat: 14#1 Thes. 4:14.hynrei, lada ïa U Khrist ym shym la pynmih pat, te kumta ka jingïalap jong ngi ka long kaba lehnohei, bad ka jingngeit jong phi ruh kaba lehnohei. 15Nalor kata, la shem ruh ïa ngi ki sakhi lamler shaphang U Blei; naba ngi la ïaphla shaphang U Blei, ba u la pynmih pat ïa U Khrist, ïa uba um shym la pynmih pat, lada ka long ba ïa ki baïap yn ym pynmih pat. 16Namar lada ïa ki baïap yn ym pynmih pat, te ïa U Khrist ruh ym shym la pynmih pat; 17te lada ïa U Khrist ym shym la pynmih pat, ka jingngeit jong phi ka long kaba thala; phi dang sah ha ki pop jong phi. 18#1 Thes. 4:16.Te kumta ruh, kita kiba la ïohthiah ha U Khrist ki la jot noh keiñ. 19Lada tang ha kane ka jingim hi ngi long kiba kyrmen ha U Khrist, ngi long kiba kordit tam na ki briew baroh.

20Hynrei, mynta, ïa U Khrist la pynmih pat na ki baïap, bad u la jia long u soh nyngkong keiñ na kita kiba la ïohthiah noh. 21#Rom. 5:12.Namar kumba da u briew la jia ka jingïap, kumta, da u briew ruh, ka jia ka jingpynmihpat ïa ki baïap. 22#Rom. 5:14-18.Namar kumba ha u Adam baroh ki ïap noh, kumta ruh, ha U Khrist yn pynim ïa baroh. 23#1 Thes. 2:19.Hynrei, uwei pa uwei ha ka jingryntih la ka jong ka jong; u soh nyngkong long U Khrist; hadien kata, kita ki jong U Khrist, ha kata ka jingwanpaw jong u. 24Ynda kumta, long ka bakut, ynda un aiti noh pat ïa ka hima ha U Blei uba U Kpa, ynda u la pyndam noh ïa ka jingsynshar baroh, bad ïa ka jingdonbor baroh bad ïa ka bor baroh. 25#Salm. 110:1.Namar ka dei ïa u ban synshar tad ynda u la pyndem ïa ki nongshun jong u baroh hapoh ki kjat jong u. 26Ka nongshun ka bakhatduh ïa kaba yn sa pynduh ka long ka jingïap. 27#Salm. 8:6; Eph. 1:22.Naba u la pyndem ïa kiei kiei baroh hapoh ki kjat jong u. Hynrei, haba u ong ba la pyndem ïa kiei kiei baroh kumta, ka paw ba lait uta uba la pyndem ïa kiei kiei baroh hapoh jong u. 28#Php. 3:21.Te ynda la pyndem ïa kiei kiei baroh ha u, ynda kumta, ïa U Khun hi ruh yn pyndem ha uta uba la pynhapoh ïa kiei kiei baroh ha u, khnang ba U Blei un ïoh long kiei kiei baroh ha baroh.

29Lymda kumta, aïu kin leh kita ïa kiba la pynbaptis na ka bynta ki baïap? lada ïa ki baïap yn ym pynmih pat satia, balei te ba pynbaptis ïa ki na ka bynta jong ki? 30Balei ba ngi ruh ngi pha ïa lade man la ka por baroh? 31#Rom. 8:36.Nga smai da kata ka jingsngewsarong namar jong phi kaba nga don ha U Khrist Jisu uba U Trai jong ngi, ba nga ïap ha la ka sngi. 32#2 Kor. 1:8-9; Isa. 22:13.Lada kum u briew nga la ïaleh bad ki mrad khlaw ha Ephesos, hato ka myntoi aïu ïa nga? Lada ki baïap kim mihpat, “To ïa ngin ïabam ngin ïadih, namar lashai ngi ïap noh keiñ!” 33To wat shah ban shukor noh ïa phi; “ki jingïasyllok basniew ki ïa-pynpyut plak keiñ ïa ki akor babha”. 34#Rom. 13:11.To phin da kyndit bynriew hok bad wat leh pop phi; namar don kiba khlem jingtip shaphang U Blei, khnang ïa ka ban pynsngewlehrain ïa phi, nga kren ïa kane keiñ.

Da ka met kaba kumno ngin ïamihpat

35Hynrei, uei ruh uei un kylli, “Hato kumno yn pynmih pat ïa ki baïap? Bad da ka met kaba kumno kin wan?” 36#Ïoan. 12:24.A u babieit! Ïa kata ïa kaba me hi me bet yn ym pynlong im ïa ka lymda ka ïap noh keiñ; 37bad ïa kata kaba me bet ruh, mem bet keiñ ïa kata ka met ka ban sa long, hynrei, tang u symbai hi, ka jong u Kew ñiuma, ne ka jong uwei pat u symbai; 38#Jen. 1:11.hynrei, U Blei u ai ha u ka met kat kumba u sngewbha hi, bad ha uwei pa uwei u symbai ïa la ka jong ka jong ka met. 39Ka doh baroh ruh kam long kajuh ka doh; hynrei, don kawei ka doh briew, bad kawei pat ka doh mrad, bad kawei pat ka dohkha, bad kawei pat de ka doh sim. 40Don ruh ki met kiba kynja bneng, bad ki met kiba kynja khyndew: hynrei, ka burom jong kita kiba kynja bneng ka long kawei, bad ka jong kita kiba kynja khyndew ka long kawei pat. 41Don kawei ka burom ka sngi, don ruh kawei pat ka burom u bnai, bad kawei pat ka burom ki khlur; namar u khlur u pher na u khlur ha la ka burom.

42 # Dan. 12:3. Kumta keiñ, ka long kata ka jingpynmihpat ïa ki baïap ruh. La bet ïa ka ha kaba pyut, yn pynmih pat ïa ka ha ka bympyut; 43la bet ïa ka ha kaba khlem burom, yn pynmih pat ïa ka ha ka burom; la bet ïa ka ha ka jingtlot, yn pynmih pat ïa ka ha ka bor; 44la bet ïa ka kum ka met bakynja doh, yn pynmih pat ïa ka kum ka met bakynja mynsiem. Kumba don ka met bakynja doh, don ruh ka met bakynja mynsiem. 45#Jen. 2:7.Kumta ruh, la thoh: “Ïa u Adam u briew u banyngkong la thaw ka mynsiem ba-im,” hynrei, ïa u Adam u bakhatduh ka mynsiem bapynim; 46hynrei, kam shym long nyngkong kata kaba kynja mynsiem, hynrei, kata kaba kynja doh, hadien kata te, kaba kynja mynsiem. 47Uta u briew u banyngkong u la long na ka khyndew, uba kynja 'dewmet; uta u briew u ba-ar u long U Trai na bneng. 48Kat kumba long uta uba kynja 'dewmet, kumta biang ruh kita kiba kynja 'dewmet; bad kat kumba u long uta uba kynja bneng, kumta biang ruh kita kiba kynja bneng keiñ. 49Bad kat kumba ngi la bit ïa ka dur ka jong uba kynja 'dewmet, ngin da bit ruh ïa ka dur ka jong uta uba kynja bneng keiñ. 50Hynrei, la lei lei ïa kane nga ong, ko parabangeit, ba ka doh bad ka snam kim lah ban ïoh ïa ka hima U Blei, lymne kata kaba pyut kam ïoh ïa kata ka bympyut.

51 # 1 Thes. 4:15-17. Ha khmih, nga ïathuh ha phi ïa ka jingmaïan: ngin ym ïohthiah baroh, hynrei, yn pynkylla ïa ngi baroh shisyndon, ha kaba shi khyllipmat keiñ, ha ka turoi ka bakhatduh. 52Namar ka turoi kan sawa, ynda kumta, ïa ki baïap yn pynmih pat ki bympyut, bad ïa ngi yn pynkylla. 53Namar ka dei da lei lei ïa kane kaba pyut ban phong ïa ka bympyut, bad ïa kane ka baïap ban phong ïa ka bymïap; 54#Isa. 25:8.te ynda kane kaba pyut kan phong ïa ka bympyut, bad kane ka baïap kan phong ïa ka bymïap, ynda kumta, yn pyndep khoit ïa kata ka jingong ïa kaba la thoh:

“Ïa ka jingïap

la nguid noh khoit

ha ka jingjop.”

55 # Hos. 13:14. “A ka jingïap,

hangno ka jingjopthiaw

ka jong pha?

A ka jingïap,

hangno ka sni ka jong pha?”

56Te ka sni jong ka jingïap ka long ka pop, bad ka bor ka pop ka long ka hukum. 57Hynrei, ka jingnguh ïa U Blei, u ba ai ha ngi ïa kane ka jingjopthiaw da U Jisu Khrist uba U Trai jong ngi!

58Naba kumta, ko parabangeit ba-ieit jong nga, to long phi kiba ïaineh skhem, bad ki bymkynriah noh, bad kiba man kyrhai man la ka sngi ha ka kam U Trai, haba phi tip skhem ba kata ka jingtrei minot jong phi kam ju long kaba lehnohei ha U Trai.

Currently Selected:

1 KORINTH 15: KHB

Highlight

Copy