OBUCHACHILO 39
39
Yosefu nende omukhasi wa Potifa
1Yosefu yayilwa Misiri, ne Potifa, mulala khubemilisi bomuruchi, nakula Yosefu okhurula khu Abaishimaeli abali nibamureerireyo. 2#Ebikh. 7:9OMWAMI Nyasaye yali halala nende Yosefu ne namukhoonya okhukhola buli shindu obulayi, kho Yosefu namenya munzu ya Potifa. 3Mana omwamiwe nalola mbu, OMWAMI Nyasaye yali halala nende Yosefu, khandi mbu, OMWAMI Nyasaye niye ouchilanga amakhuwa ka Yosefu koosi nikaba amalayi. 4Kho Yosefu nakhalabanila Potifa khandi namuchamisia muno, naye omwamiwe oyo nakhola Yosefu okhuba omusinjilili weinzuye khandi owebindu bia yali ninabio biosi. 5Okhurula khubise bia Potifa yakhola Yosefu okhuba omusinjilili weinzuye nende webindubie biosi ebia yali ninabio, OMWAMI Nyasaye yahelesia inzu ya Potifa ikhabi khulwa Yosefu. OMWAMI Nyasaye yara ikhabi mubindu biosi ebia Potifa yali ninabio munzuwe nende mumukundakwe. 6Kho Potifa nalekha ebindu bia yali ninabio biosi mumakhono ka Yosefu, khadi Potifa nalateebakhwo eshindu shiosi shiosi ta, habula eshiokhulia eshia yalitsanga shionyene.
Yosefu yali owelikondo lilayi khandi nomubili omulayi. 7Ne olunyuma lweshise shitiiti, omukhasi wa Potifa yachaaka okhwikomba Yosefu, ne namuboolela ari, “Chenda khukone ninawe.” 8Nebutswa Yosefu yaloba ne naboolela omukhasi wa Potifa oyo ari, “Lola, omwami wanje shiatebangakhwo eshindu shiosi shiosi munzu muno ta, okhuba isie endi hano, yalekha ebindu biosi ebia ali ninabio mubunyali bwanje. 9Isie endi nende obunyali munzu muno obuhela shinga obwa ali ninabwo. Ne shiyayanzikalilakhwo okhutiila khushindu shiosi shiosi munzu muno ta, okhuyiniakhwo iwe wenyene, shichila oli omukhasiwe. Ndakhakhola endie obumayanu obukhongo shinga buno nikhola obwonooni imbeli wa Nyasaye?” 10Kata buli lwosi lwomukhasi oyo yareeba Yosefu, Yosefu shiyafuchilila amakhuwake kokhukona ninaye noho kata okhuba ninaye tawe.
11Nebutswa inyanga yindi, olwa Yosefu yenjila munzu okhukhola emilimochie, omundu yesi yesi owomunzu omwo nalalimwo ta, 12omukhasi oyo yakwa khunguboye naboola ari, “Khukone ninawe.” Nebutswa Yosefu yelukha narula munzu omwo, nalekha inguboye mumakhono komukhasi oyo. 13Ne lwomukhasi oyo yalola mbu, Yosefu yeluushe arulile munzu omwo ne aleshile inguboye mumakhonoke, 14yalanga abandu bomuzumwe nababoolela ari, “Lolekhwo amakhuwa kano, omusaatsa wanje yakhureereere Omuheburania okhukhufwola ifwe. Yetsile munzu muno niyenya mbu khukone ninaye, nasi nikhupa tsimbungu. 15Ne olwa ahuliile nikhupa tsimbungu, yeluushe narula elwanyi, ne niyandeshela inguboye.”
16Mana nabiikha ingubo eyo aha yali, okhuula lwomwamiwe yachelela hango, 17ne namuboolela amakhuwa katsana ako ari, “Omukhalabani Omuheburania, owa wakhureerera yetsile mushisika shianje niyafwola, 18nebutswa olwekhupile tsimbungu, yeluushe narula elwanyi ne niyandeshela inguboye.”
19Olwa omwamiwe yahulila omukhasiwe namuboolela ari, “Nolwa omukhalabaniwo yakholile ario,” yatiilwa noburima. 20Mana omwamiwe nabukula Yosefu ne namura mumbohe, ewa ababohe bomuruchi bekalilungwa. 21#Ebikh. 7:9Nebutswa OMWAMI Nyasaye yali halala nende Yosefu, namuhelesia ikhabi, mana omulindi womumbohe nachamisibwa ninaye. 22Mana omulindi womumbohe niyemekha Yosefu okhuba omukhongo wababohe bashie, khandi namukhola oukhusinjilila amakhuwa koosi akekholekhanga mumbohe omwo. 23Omulindi oyo shiyasinjililakhwo eshindu shiosi shiosi eshiali mubunyali bwa Yosefu ta, shichila OMWAMI Nyasaye yali halala nende Yosefu, ne liosi liosi elia Yosefu yakholanga, OMWAMI Nyasaye yalikholanga okhuba lilayi.
Currently Selected:
OBUCHACHILO 39: OLUDC
Highlight
Share
Copy
Want to have your highlights saved across all your devices? Sign up or sign in
