OBUCHACHILO 40
40
Yosefu yenoosia eshisina shiamalooro kababohe
1Olunyuma olweshise shitiiti, omukholi womunzu womuruchi wa Misiri nende omufuchi omukhongo womuruchi, bonoonela omuruchi wabwe. 2Mana omuruchi nasinyishila abakholi babili abo. 3Omuruchi nabayila mumbohe eyali munzu yomusinjilili wa balindi bomuruchi, eya Yosefu yali niyabohwamwo. 4Bamenya mumbohe khulwa oluhoono olurambi ne omusinjilili wabalindi bomumbohe oyo nakhola Yosefu okhuba omukhongo wabwe. 5Inyanga yindi mushilo nibali mumbohe, omukholi womunzu oyo nende omufuchi omukhongo oyo, baloora amalooro akahukhaane khandi buli lilooro liali neshisina shialio. 6Olwa Yosefu yetsa khubo nibushiele, yalola nibalali nomulembe ta, 7ne Yosefu nareeba abakholi bomuruchi abayali niyabowa ninabo munzu yomwami wabwe abo ari, “Mbushiina mukhuuniye obweni bwenywe inyanga yino?” 8Nabo nibamukalusia bari, “Khuloorire amalooro ne abulaho ounyala okhukhuboolela eshisina shiako tawe.” Mana Yosefu nababoolela, “Nyasaye niye ouhaananga obunyali bwokhubuula eshisina eshia amalooro.” Khandi Yosefu naboolela ari, “Nimuchama mboolelekhwo amalooro kenywe tsana.”
9Kho omukholi womunzu oyo niyenoosilia Yosefu lilooroolie, naboola ari, “Mwilooro lianje, enduutsi omusaala kwomutsabibu, 10ne khumusaala okwo amasaka kabelekhwo kataru. Olwa amasaafu kachaachile okhumelakhwo butswa, nabio ebimuli nibimulikhakhwo, nolwa emitsabibu chienjilekhwo butswa chirio. 11Nasi embeele nendiilile eshikombe shiomuruchi mumakhono kanje. Kho nembukula emitsabibu emiengu echio nechitiinyila mushikombe shiomuruchi eshio ne nera eshikombe eshio mumakhono komuruchi.”
12Mana Yosefu namuboolela ari, “Eshisina shieliloorolio njieshino. Amasaka kataru ako ni tsinyanga tsitaru. 13Mutsinyanga tsitaru, omuruchi alakhulekhuula okhurula mumbohe muno, ne alakhubeela nende okhukhukalusia khumilimochio, ne olahelesinjia omuruchi eshikombeshie shinga olwa wakholanga khale, noli omukholi womunzuwe. 14Nebutswa olwa nobe noli obulayi, unzitsulile, mana ukholelekhwo eliekhusaaya. Nochama oboolekhwo amakhuwa kanje imbeli womuruchi ukhoonye siesi erule mumbohe muno. 15Okhuba toto mwene ndebwa okhurula mushialo shia Abaheburania, ne kata mumbohe omwa endi muno, shibulaho eshiandakhola eshichila nembohwa tawe.”
16Olwa omufuchi womuruchi oyo yalola mbu, eshisina shielilooro elo neshiokhuchamisia, yaboolela Yosefu ari, “Siesi embeele nelilooro. Embeele nenjelekhasiye ebimwelo biemikaate bitaru khumurwe kwanje. 17Ne eshieikulu shiene shibeelemwo ebiokhulia ebiahukhaane ebiteesheelwe omuruchi. Nebutswa amanyonyi kabibotsilenje okhurula mushimwelo shibeele khumurwe kwanje.”
18Mana Yosefu namukalusia ari; “Eshisina shieliloorolio njieshino mbu, ebimwelo bitaru ebio ni tsinyanga tsitaru. 19Mutsinyanga tsitaru, omuruchi wa Misiri alakhulekhuula, ne alakhukhalaka omurwekwo akhurusiekhwo! Khandi alakhubamba khumusaala, ne amanyonyi kalabootsa inyama yomubilikwo.”
20Khunyanga yakhataru, inyanga eyali yokhwitsulila okhwibulwa khwomuruchi, omuruchi yakaasilia abakholibe boosi lisabo, ne nalekhuula omukholiwe wmunzu oyo nende omufuchiwe oyo okhurula mumbohe, ne nabareera imbeli wabakhongobe. 21Omuruchi oyo nakalusia omukholiwe womunzu oyo khumilimochie chiomunzu, 22ne nabamba omufuchi womunzuwe oyo shinga olwa Yosefu yali nabafumululiile amalooro kabwe. 23Nebutswa omukholi womunzu womuruchi oyo shiyayetsulilakhwo Yosefu ta, yamwibilila butswa.
Currently Selected:
OBUCHACHILO 40: OLUDC
Highlight
Share
Copy
Want to have your highlights saved across all your devices? Sign up or sign in
