OBUCHACHILO 41
41
Yosefu yenoosia eshisina shiamalooro komuruchi
1Emiyika chibili nichihwele, omuruchi wa Misiri yaloora mbu, abeele nasinjiile ahambi khumwalo kwa Naili, 2ne nalola tsing'ombe musaafu etsianera khandi etsianula nitsitikulukhanga okhurula mumwalo kwa Naili, nitsiaya obunyasi bweliise. 3Khandi nalola tsing'ombe tsindi musaafu, etsiang'aha khandi tsiasaamuukha nitsitikulukhanga okhurula mumwalo kwa Naili, nitsiloondakhwo. Mana nitsisinjila ahambi nende etsindi etsio khulukuku lwomwalo kwa Naili. 4Mana tsing'ombe musaafu etsiang'aha etsio nitsilia tsing'ombe musaafu, etsinula khandi etsianera etsio. Mana omuruchi oyo nabuukha mutsindoolo. 5Mana nakona tsindoolo khandi, ne olwa tsindoolo tsiamuyila, yaloora olwa khabili, nalola emirwe musaafu echieimele, eminefu khandi emilayi echiali nichimelanga okhurula khushisina shilala. 6Mana olunyuma, nalola emirwe chindi musaafu echieimele eminyelele khandi echiafululukha khulwa omuyeka kweshimiyu. 7Mana emirwe musaafu echieimele eminyelele echio nichimila emirwe musaafu echietsulakhwo imele echio. Omuruchi yasisimukha okhurula mundoolo ne namanya mbu, abeele nalooranga. 8#Dan. 2:2Kho olwa bwashia yahenda omwoyo ne narumasia mbu, abafumu ba Misiri boosi nende abandu bobusitsa mushialo shia Misiri boosi bareerwe. Omuruchi nababoolela amalooroke, nebutswa abulaho owanyala okhwinoosia eshisina shiako khuye tawe.
9Mana omukholi womunzu womuruchi naboolela omuruchi ari, “Omuruchi, nditsuliile obumayanu bwanje inyanga yino. 10Olwa iwe omuruchi wali nokhusinyishiile, wakhuyila mumbohe, eyali munzu mwomusinjilili wabalindi bomuruchi, isie nende omufuchiwo omukhongo. 11Inyanga yindi mushilo, buli mulala khwifwe yaloora lilooro, ne amalooro tsana ako kali ende ebisina ebiahukhaane. 12Omuraaka omuyahudi yali naliho ninefwe, owali omusumba womusinjilili wabaliindi. Ne olwa khwamwinoosia amalooro kefwe yakhuboolela eshisina shiamalooro kefwe ako, ne naboolela buli mundu eshisina shieliloorolie. 13Ne shinga olwa yakhwinoosilia eshisina shiako, nolwa kamala nikekholekha kario. Isie ndakalusibwa khumilimo chianje ne omuteshi wemikaate nabambwa.”
14Mana omuruchi narumasia mbu balanje Yosefu, nibamureera lwangu lwangu okhurula mumbohe, ne olwa yali niyebechile liswi nende okhwikalukhasia tsingubotsie, yetsa imbeli womuruchi. 15Mana omuruchi naboolela Yosefu ari, “Endoorire lilooro, ne abulaho ounyala okhunzinoosilia eshisina shialio tawe. Ne embulile nibaboola khwiwe mbu, nohulila lilooro onyala okhubuula eshisina shialio.” 16Yosefu nakalusia namuboolela ari, “Omwami shiendi isie tawe, ni Nyasaye oulakhuhelesia eshisina shieliloorolio.” 17Kho omuruchi naboolela Yosefu ari, “Mwilooro lianje, embeele nesinjiile khulukuku lwomwalo kwa Naili. 18Ne nindola tsing'ombe musaafu etsianera, khandi etsinula nitsitikulukhanga okhurula mumwalo kwa Naili, nitsiayanga obunyasi bweliise. 19Natsio etsindi musaafu nitsikulukha nitsitsilondakhwo. Etsio tsiali tsimbi, nitsiarula amakumba khandi nitsiang'aha, etsiashili kata okhulolakhwo mushialo shia Misiri tawe. 20Mana tsing'ombe musaafu, etsiarula amakumba khandi etsiang'aha etsio nitsimila musaafu tsinefu tsiaranjilila etsio. 21Nebutswa olwa tsiamila tsing'ombe tsinefu etsio, shiyaliho owamanya mbu, tsimilile ta, okhuba tsiali nitsishing'ang'uushile butswa shinga olwambeli! Mana nesimukukha okhurula mundoolo. 22Khandi ningona ne nindola mwilooro emirwe echieimele musaafu eminefu khandi emilayi nichimelanga khushisina shilala. 23Olunyuma nindola emirwe musaafu echieimele eminyelele khandi echiafululukha khulwa omuyeka kweshimiyu kwomushiangalamwe. 24Mana emirwe musaafu eminyelele echio nichimila eminefu musaafu echio. Ndabooleelekhwo abafumu, nebutswa abulaho kata mulala owayanzinoosiye eshisina shiako tawe.”
25Mana Yosefu naboolela omuruchi ari, “Omwami, eshisina shiamalooroko ni shilala butswa, Nyasaye akhubisuliile aka ali ahambi okhukhola. 26Tsing'ombe musaafu tsindayi etsianera etsio nemiyika musaafu, ne emirwe musaafu eminefu echio nemiyika musaafu, ne lilooro elo nelala. 27Tsing'ombe musaafu etsiang'aha muno, etsiitsile nitsiloondakhwo etsio, nemiyika musaafu, ne emirwe emikhaya musaafu echiafululukha khulwa omuyeka kweshimiyu okhurula ebukwe echio, nemiyika musaafu echieinzala. 28Omwami kali shinga olwa ekhubooleele. Nyasaye akhumanyiye aka ali ahambi okhukhola. 29Emiyika chitsiokhubaho musaafu, echieshiokhulia shilabaho eshinji muno mushialo shia Misiri. 30Nebutswa olunyuma lwemiyika musaafu, chililondakhwo emiyika chieinzala, ne inzikura yoosi yakhebililwe mushialo shia Misiri, inzaala eyo yakhamulule eshialo shino. 31Khulwokhuba inzala eyo yakhabe indulu, eshiokhulia shishiakhabekhwoho mushialo tawe. 32Okhukalushilwa khweliloorolio akhandi khabili khumanyisia mbu, Nyasaye amalile okhutinyisia likhuwa elo ne okhuula alaliusia olunyuma lwebise bitiiti.
33“Khulweshio bulano, okhoyile okhulobola omundu omurecherefu khandi omuchesi omwemeshe asinjilile eshialo shia Misiri. 34Khandi olobole abandi basinjililile eshialo mana obukule eshitonye shiakharano shiokhubichese biomushialo shia Misiri khulwa oluhoono lwemiyika musaafu chieinzikura. 35Mana obaboolele babunjelesie ebiokhulia biosi ebiemiyika echiitsanga chieinzikura echio, babiishe imele eyo mubiachi hasi wobunyalibwo. 36Eshiokhulia eshio shiakhabe shiokhuhonia eshialo mumiyika musaafu chieinzala eyitsanga mushialo shia Misiri, kho mbu abandu baleshe okhusikha okhubirila munzala.”
Yosefu yemekhwa okhuba omulondi womuruchi wa Misiri
37Tsinganakani tsia Yosefu etsio tsiachamisia omuruchi nende abakhulundu bomushinashie boosi. 38Kho omuruchi nareeba abakhulundu bomushiinashie ari, “Omundu alikhwoho toto owetsulamwo Roho wa Nyasaye shinga uno?” 39Mana omuruchi naboolela Yosefu ari, “Okhuba Nyasaye akhubisuliile kano koosi, bulano oundi omurecherefu khandi owobusitsa shinga iwe abulaho tawe. 40#Ebikh. 7:10Niwe oulaba omusinjilili weshialo shianje, ne abandu banje boosi balakhola shinga lwobalaka. Habula nisie oulaba omukhongowo sienyene, okhuba nisie omuruchi.” 41Mana omuruchi naboolela Yosefu ari, “Ekhwahuule okhuba omukhongo khubandu beshialo shia Misiri shiosi.” 42#Dan. 5:29Mana omuruchi oyo nabukula ingakaye yomukasa nafwala khumukhono kwa Yosefu, nende okhumusiaha nende ebifwalo bietsingubo tsiobukusi tsieikitani, ne nara olunyolo lweitsahabu mwikosi mwa Yosefu. 43Mana namufuchilila okhuchendela mwikaari liakhabili lioburuchi. Mana abelihe nibemila imbeliwe nibayiba nomwoyo omukhongo bari, “Sikame hasi!” Nolwa omuruchi oyo yemekha Yosefu okhusinjililila eshialo shia Misiri ario. 44Okhumeeta khwako, omuruchi wa Misiri yaboolela Yosefu ari, “Isie nisie omuruchi, ne omundu yesi yesi shialachinguulakhwo omukhonokwe noho kata eshilenjeshie mushialo shia Misiri shiosi iwe nolamufuchiliile tawe.” 45Kho omuruchi oyo nakulikha Yosefu mbu, Zefenatsi-Paneha. Khandi namuhelesia Asenatsi omukhaana wa Potifera, omwisaaliisi welitookho lia Oni, okhuba omukhasiwe. Mana Yosefu nachenda mushialo shia Misiri shiosi.
46Olwa Yosefu yachaaka okhukhalabanila omuruchi weshialo shia Misiri, yali nali nemiyika amakhumi kataru. Mana Yosefu narula mulwanyi lwomuruchi, ne nachenda mushialo shia Misiri shiosi. 47Eshialo shia Misiri shiarusia eshiokhulia mubunji khulwemiyika musaafu chieinzikura. 48Mana olwa eshiokhulia shialiho mubunji mushialo shia Misiri khulwemiyika musaafu echio, Yosefu yabunjelesia eshiokhulia shiosi, nashibiikha mubiachi mumatookho. Yabiikha eshiokhulia buli mwitookho, eshia yachesa okhurula mumikunda chili ahambi ninalio. 49Mana Yosefu nabiikha imele inyinji muno, niyitsula shinga omuyeshe kwomunyanza, kata nalekha okhuyichela, okhuba shiyakhanyaliilwe okhuyichela yoosi tawe.
50Emiyika chieinzala nichishili okhuula, Yosefu yali nanyoolile abaana abasiani babili, abebulwa nende Asenatsi omukhaana wa Potifera omwisaaliisi welitookho lia Oni. 51Yosefu nakulikha owambeli mbu, Manase, eshisina mbu, okhwibilila, okhuba yaboola ari, “Nyasaye yakholile okhwibilila omatinyu kanje nende aka abeinzu ya papa wanje koosi.” 52Yakulikha owakhabili mbu, Efuraimu, eshisina mbu, okhwibula, okhuba yaboola ari, “Nyasaye yambelesiye omwana mushialo shiamanyakhano kanje.”
53Emiyika musaafu echia inzikura yaliho mushialo shia Misiri chiola khushiakamo. 54#Ebikh. 7:11Mana emiyika musaafu echieinzala nichichaaka okhwitsa shinga olwa Yosefu yali niyaboola. Inzala yaliho mubialo bindi biosi. Nebutswa mushialo shia Misiri, eshiokhulia shialimwo. 55#Yoh. 2:5Olwa inzala yenjila mushialo shia Misiri shiosi, abandu bahaabila omuruchi nibenya eshiokhulia. Omuruchi naboolela Abamisiri boosi ari, “Mutsie khu Yosefu, ne eshialamuboolela mukhole.” 56Kho olwa inzala yali niyitswanile eshialo shiosi, Yosefu niyekula ebiachibie biosi, ne nakusilia Abamisiri ebiokhulia, okhuba inzala eyo yali indulu muno. 57Abebialo bindi betsa mushialo shia Misiri okhukula ebiokhula khu Yosefu okhuba inzala eyo yali indulu muno mushialo shiosi.
Currently Selected:
OBUCHACHILO 41: OLUDC
Highlight
Share
Copy
Want to have your highlights saved across all your devices? Sign up or sign in
