Sak. 13
13
1Omwami Owe Banamae aloma ali, “Siise esio ne sioola esebele ekhatubukhe khukwalaasia babaandu be lisaaye lia Daudi ne bamenywa ba Yerusalemu khubakwalaasia khukhwama khu bwoni bwabwe ne khusaaya bifwaani. 2Ne siise esio kharusieo kamasina ke bifwaani mu sibala ne se alibao na mulala olibikhebulila tawe. Kharusieo yesi yesi owilaanga khuba omung'oosi ne lilienya lie khusaaya bifwaani. 3Ne omundu yesi yesi okhayilila ali niye ali omung'oosi, maawe ne raraawe bakhamuboolele bali, Ewe okhoya ofwe, sikila oboola bubeeyi mu lisina lia Wele Omunyali Owa Bioosi. Ne achiililila ne bung'oosi obwo maawe ne raraawe bakhamuunake afwe. 4Siise esio ne sioola buli omung'oosi aliambwa chisoni khulwe kamalola kewe ne ali khang'oola, salibea babaandu khulwe khufwara chingubo che bung'oosi tawe. 5Ne kakhali akhalome ali, ‘Ese se ndi omung'oosi tawe, ese omulimi busa, khukhwama bwana bwase ndi busa omulimi.’ 6Ne omundu ne areeba omung'oosi oyo ali, ‘Wanyoola oriena kamakoonjo kaali khu mukoongo kwowo kano?’ Akhakobosie ali, ‘Nanyoola munju mwe basaale base.’ ”
Lilaka khukhwira omwaayi owa Wele
7 #
Mat. 26.31; Mk. 14.27 Omwami Owe Banamae aloma ali,
“Ee wanambalu, yinyokha wibwaakale omwaayi wase,
owimaanga siimbi nase
yiira omwaayi wase nio kamakheese kasalaanile,
ndebwaakala bakhenyalila tawe.
8Khu buli baandu bataru mu sibala
babili bakhafwe mulala akhaone.
9Khabare mu mulilo bakharame,
khubakwalaasia nga efwesa,
lundi nga esahabu.
Bakhasabe ese mala mbakobosie,
khalome ndi, ‘Bano bali babaandu base,’
nabo bakhalome bali, ‘Wele Omunyali Owa Bioosi ali Wele wefwe.’ ”
Currently Selected:
Sak. 13: LUBUKUSU
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
