Sak. 14

Yerusalemu ne chikholo chichiindi

1Endaalo niyo Wele Omunyali Owa Bioosi akhakholelekho bukhalaki yoolile. Khu ndaalo ng'eneyo bibiindu biili mu Yerusalemu bikhayaaywe mala babikabane ebweeni wenywe. 2Sikila khabuusie Be Chikholo boosi bapanie Yerusalemu. Lukoba lulibukulwa, chinju chikhayaaywe mala babaandu balikwa khu bakhasi. Enusu eye babaandu be mu lukoba bakhayilwe mu mbaambe ne baramire se balirusibwa mu lukoba tawe. 3Enyuma wako Wele Omunyali Owa Bioosi alicha apane ne chikholo echo nga aapananga khale. 4Mu siise esio Wele Omunyali Owa Bioosi akheeme khu sikulu sia Museituni siili ebukwe owa Yerusalemu. Nio sikulu chana sikhakabwemo khabili ne litooma liboofu likhaame ebukwe ne licha mumbo. Nio sitonyi silala sie sikulu siile ebunaswa ne sisiindi siafubo. 5Ne litooma lie sikulu siase silimikhwa sikila litooma lie bikulu bililwitiilakho. Ne enywe mulilukha bulayi bwene nga bakuuka benywe ne belukha literema lie sibala mu biise bia Usia omwami owa Yuda. Enyuma wako Wele Omunyali Owa Bioosi, Wele wenywe akheeche ne batakatifu bewe boosi.

6Mu biise ebio, bunyifu, ebarafu namwe sisiilima se bikhabeo tawe. 7Khukhabe ne kumuumu kwong'ene buli lwoosi, akhaba siilo. Wele Omunyali Owa Bioosi yeng'ene niye omanyile endaalo eye bibiindu bino.

8 # Esek. 47.1; Yn. 7.38; Lif. 22.1 Mu biise ebio kameechi ke bulamu kakhaame Yerusalemu. Enusu kakhache mu nyanja niyo balaanga bali eya chumbe ne kakaandi mu nyanja eya Mediterenia kalibisia biise bioosi mu siimiyu ne mu munaane. 9Siise esio, Wele Omunyali Owa Bioosi akhabe omwami we sibala sioosi, ne buli mundu akhamusaaye niye nga Wele mala amumanye khu lisina lieneli.

10Lukoongo lwoosi khukhwama Keba ebunaswa khukhwola Rimoni ebunafubo owa Yerusalemu lukheekele kumweyeywe. Ne kakhali Yerusalemu lulibonekha angaaki khukhwama khu silibwa sie Babenjamini khukhwola abuundu we silibwa sikhale, khukhwola khu silibwa sie mukoona, lundi lulibonekha angaaki khukhwama khu ndeleelwa eya Hananeli khukhwola niio basurira endali yo mwami. 11#Lif. 22.3 Ne babaandu bakhamenye mu Yerusalemu mu muleembe ne se bakharikhirisibwe lundi tawe.

12Wele Omunyali Owa Bioosi akhareere bulwaale bubi khu baandu boosi babebwaakala Yerusalemu. Balibola ne bakeenda. Chimoni chabwe chilibola ne chisili mu bikhookho, ne chinimi chabwe chilibola ne chisiili mukhanwa mwabwe.

13Ne mu siise esio Wele Omunyali Owa Bioosi akhabareerere likoyaana nio buli mundu akhakaluukhane khu wasie oli siimbi amwibwaakale. 14Babaandu ba Yuda bakhapane khuliinda lukoba lwa Yerusalemu. Bakhayaaye kimiaandu kie chikholo choosi biindu nga esahabu, efwesa ne chingubo chingali po.

15Bulwaale bubi bulikwa akhaba khu farasi, chinyumbu, chingamia, chipunda ne chisaang'i chosi chosi nicho basiku baliba nacho mu biabuusi biabwe.

16 # Bal. 23.39-43 Nio boosi bakhaone khukhwama mu kholo chichebwaakala Yerusalemu. Balicha ebweeneyo buli kumwiiko khusaaya Omwami, Omwami Owe Banamae ne khukhola Naikara eye Bisali. 17Kaaba bali chikholo chiili khu sibala se chiicha Yerusalemu khusaaya Omwami, Omwami Owe Banamae tawe, aba efula se ekhakwe mu sibala siabwe tawe. 18Baaba bali Bamisiri baloba khukhola Naikara eye Bisali, aba bakhanyoole bulwaale nibwo Wele Omunyali Owa Bioosi alikho akwiisia khu Be Chikholo bakhaliindanga Naikara eyo tawe. 19Sino siliba siiukuumo khu Misiri nende Be Chikholo chichiindi boosi babaaba bakhaliinda Naikara eye Bisali tawe.

20Mu siise siene esio akhaba kimisiipi kie chifarasi kiliaandikwakho kamakhuwa kano, “Kino kia Wele Omunyali Owa Bioosi.” Chindeekhelo che mu Lukaangu chiliba chindakatifu nga bibuumba bie khu alutare. 21Buli endeekhelo mu Yerusalemu ne mu Yuda mwoosi bakhakire alubeka khulwe kimilimo kia Wele Omunyali Owa Bioosi. Babaandu bakhaane chimbosio balibukula batekhelemo chinyama che chimbosio. Mu siise esio, omucheusi se aliba lundi mu Lukaangu lwa Wele Omunyali Owa Bioosi.

Currently Selected:

Sak. 14: LUBUKUSU

Highlight

Copy