Bar. 1
1
1Khukhwama khu Paulo omukholi owa Yesu Kristo lundi omurumwa niye Wele arobora ne khulaanga nio elwache Elomo yewe Endayi, 2niyo asuubisia khaale khubirira mu bang'oosi bewe, mu maandiko kamatakatifu. 3Eli Elomo Endayi khu ko Mwana wewe owebulwa mu lisaaye lia Daudi. Khulwe liiba liewe nga omundu, 4ne khulwe butakatifu bwewe bwe buwele, okesibwa ne bunyali bukali po, khuba Omwana owa Wele nga ne alamusibwa khukhwama mu lifwa.
5Khubirira mu niye Wele ambelesia ese bubweyaangu bwe khuba omurumwa khulwa Kristo nio ndangirire babaandu Be Chikholo choosi basuubila ne khuria. 6Lino liambaasia akhaba enywe muli mu Rumi, nibo Wele alangile mube ba Yesu Kristo.
7Nono muandikila enywe mwesi muli mu Rumi nibo Wele asiima, mala amulaanga mube babaandu bewe omwene.
Lekha Wele Paapa wefwe no Mwami Yesu Kristo amuelesie kumwalaalo ne kumuleembe.
Lisaba lie khuaana orio
8Nyoa khusiima Wele wase khubirira mu Yesu Kristo sikila enywe mweesi, sikila sibala siosi silikho siulila lisuubila lienywe. 9Wele ali omuloli wase, nilio mboola lili ng'ali, Wele niye kholelanga kimilimo ne kumwoyo kwase kwoosi mukhwilwacha Elomo Endayi khu ko Mwana wewe. Wele amanyile ali mukhebulilanga enywe 10buli nga ne saba. Saba ndi Wele mu lienya liewe lilayi akhole kanyalikhe khwise luno mukeniye enywe. 11Sikila ne koomba lukali khumubona enywe nio saange mu khabi cha roho ne nanywe, khumukhola enywe mube ne kamaani. 12Nilio ndikho mboola lili lino; enywe ne nase khunyoole buyeeti, mulala khukhwama khu kuundi. Enywe munyoole buyeeti khukhwama khwisuubila liase, ne ese khukhwama khu lienywe.
13 #
Bikh. 19.21
Enywe wandaayase khukhwola mukhebulile muli biise bikali nirekekhanga khu mukeniia, mala buli lwoosi siindu sikhiingililanga khukhola ndio. Nenya nyoole babeeka akhaba mwinywe mwesi nga nendi nabo mu kholo chichiindi. 14Sikila ndi ne likobi mu mwoyo khu baandu boosi, khu bakesi ne basilu, babasoma ne bakhamanyile siindu tawe. 15Nono, ndi ne silukuluku khukhwilwacha Elomo Endayi akhaba khwinywe mumenyile mu Rumi.
Bunyali bwe Elomo Endayi
16 #
Mk. 8.38
Sikila se mbonela chisoni elomo endayi eya Wele tawe, eli bunyali bwa Wele khuonia boosi basuubila, khurakikhira khu Bayaudi ne khukhwola akhaba khu Bakiriki bosi. 17#Hab. 2.4 Sikila Elomo Endayi ebuula nga Wele nakholanga babaandu khuba baluungi khu niye omwene. Lili khubirira mu lisuubila, khukhwama mu khurakikha khukhwola khu siakamo. Nga liiandiko ne liboola lili, “Omundu oluungisibwa ne Wele khubirira mu lisuubila alamenya!”
Bumayaanu bwe babaandu
18Lirima lia Wele libuulikha khukhwama mwikulu khu bwoni bwoosi ne bumayaanu bwe babaandu bakhiingilila bung'ali bukhamanyikhana tawe khulwe chingila chabwe chimayaanu. 19Wele abaelesia siiukuumo sikila kanyala kamanyikhana khu Wele nga ne ali abuwaanga busa khu nibo, sikila Wele omwene akakhola kabe abuwaanga. 20Khukhwama nga Wele ne abaang'ana sibala, liba liewe likhabonekha tawe, bunyali bwewe bwa mindali ne liba liewe lie buwele, bioombi biabonekha abuwaanga, bibonekhana mu biindu nibio Wele abuumba. Khwako babaandu abo se bali ne nisio bebeelakho siosi siosi tawe! 21#Baef. 4.17-18 Bamanya Wele, ne kakhali se bamuechanga liria liewe nga Wele tawe, lundi se bamupilanga orio tawe. Sisiilima siayichula mu mebaasio kabwe lundi se kalimo limanya tawe. 22Baboola bali, bali bakesi, ne khana bali basilu, 23#Likh. 4.16-18 mu bweyaangu bwe khusaaya Wele omenyile mindali khulwa mindali na mindali basaaya bifwaani bibiang'oonwa biafwaana nga omundu, chinyuni, chisaang'i namwe chimbulu ne chindemu.
24Khwako Wele alekhuulile babaandu abo bakhole bibiindu binyaalu nibio kimiooyo kiabwe kikoomba, mala bakholanila ke chisoni buli mundu no okundi. 25Bakaluukhasia bung'ali khu Wele khulwe bubeeyi, basaaya ne khukholela kimilimo nibio Wele abuumba mu bweyaangu bwe khusaaya ne khukholela kimilimo omubuumbi omwene, ofumisibwa mindali na mindali! Amina.
26Sikila bakhola kano, Wele abalekhuula bakhole ke liliekoomba lili lie chisoni. Akhaba bakhasi babwe bakaluukhasia kumwiima kwe siikhasi kwa ng'ali, mala bakhola kukhali kwe siikhasi tawe. 27Akhaba baseecha boosi balekha liba liabwe lie khuba ne bakhasi babwe mala bekoombana babeene ne babeene. Baseecha bakholanila ke chisoni mulala no kundi, mala nga kamakobosio bererera babene siiukuumo nisio bolaana banyoole khulwe likhola liabwe lie sifwaabi. 28Sikila babaandu abo baloba khura mu mebaasio limanya lia ng'ali khu Wele, Wele abalekhuula babe ne kamebaasio kamakhiikha, nio bakhole bibiindu nibio bakhakhoyeele bakhole tawe. 29Bukhiikha chingano choosi bwabechulamo, sifwaabi, kumuluungo ne bunyaalu. Likhalikhililwa, bubwiri bukhupani, bubacha, bulosi, bakutana, 30mala bakikhana babeene ne babeene. Bali babiila Wele, bakhalafu, bebonia, ne khukhola be lukhole, bebaasia chingila chingali che khukhola kamamayaanu, se baria basaasi babwe tawe, 31se bali ne liba lie khumanya kamalayi tawe, bafunaka lisuubisia liabwe, mala se bakhola kamalayi namwe kakekesia siisa khu baandi tawe. 32Bamanya bali lilaka lia Wele liboola lili babaandu bamenya mu ngila yino bolaana lifwa. Mala nibo bachiililila khukhola bibiindu bino ne khufukiilila babaandi babikhola.
Likhalaka lia Wele
Currently Selected:
Bar. 1: LUBUKUSU
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
