Bar. LIMANYISIA
LIMANYISIA
Ebarwa eya Paulo khu Barumi yaandikwa khurekekha ekanisa eye Burumi khu likeniia nilio Paulo aba narekeekhe khubakenia. Aba erekekhe khucha akhole kimilimo mu bakristo baali Rumi khulwe siise mala bamuelesie buyeeti achiililile ne lukeendo ole Sipeini. Aandika khukhwinoosia limanya liewe lie lisuubila lie bukristo ne nga likaluukhasia bikholwa mu limenya lie bakristo. Sitabu sino siboola burume bwa Paulo mu bwichufu.
Paulo, aboola sifuno sie barwa enyuma we khukheesia babaandu be kanisa eye Burumi ne khubaboolela nga nabasabilanga “Elomo Endayi efuunula nga Wele ne akholanga babaandu baba baluungi khu niye omwene. Lili khubirira mu lisuubila, khukhwama mu khurakikha, khukhwola khu siakamo” (1.17).
Nono, Paulo abalaya lisoma lino. Lulwibulo lwe khu sibala babaandu boosi, Bayaudi nende Be Chikholo benyekha bakholebwe babe baluungi khu Wele, sikila boosi bafwaanana, bali aasi we bunyali bwe bubwoni. Babaandu bakholebwa khuuba baluungi khu Wele khubirira mu lisuubila mu Yesu Kristo. Liloondakho Paulo enoosia bulamu buyia mu buambaani ne Kristo bubwamanga mu buambaani buyia buno ne Wele. Omusuubili ali ne kumuleembe ne Wele mala Roho owa Wele amuelesia bulekhuule khukhwama khu bunyali bwe bubwoni ne lifwa. Mu miliango kia 5—8 Paulo aboola khu sifuno sie Lilaka lia Wele ne kamaani ka Roho owa Wele mu bulamu bwo musuubili. Nono, Omurumwa arekana ne lireeba nga nilwo Bayaudi nende Be Chikholo boolana mu lienya lia Wele khulwe babaandu boosi. Amaliila ali sikholwa sie Bayaudi khukhwikaana Yesu sili sitonyi sie lilienya lia Wele nio kumwalaalo kwewe mu Yesu Kristo kwolele babaandu boosi, ne asuubila ali Bayaudi se baliloba Yesu buli lwoosi tawe. Ekhumaliilisia Paulo aandika nga nilwo bulamu bwo mukristo bukhoyeele khuuba mu ngila eye busiime mu buambaani ne babaandi. Aboola khuloondekhana ne bukholi khu Wele, kimilimo kie bakristo khu serekari ne khu beene ne babeene, ne kamareeba khu mebaasio ke mumwoyo. Amaliilisia ebarwa ne kamakhuwa kewe omwene ne kamakhuwa ke khufumia Wele.
Kaalimo mu bwimbi
Limanyisia ne Burume 1.1-17
Nga nilwo babaandu bakhoyela khunyoola buonia 1.18—3.20
Engila eya Wele eye buonia 3.21—4.25
Bulamu buyia mu Kristo 5.1—8.39
Isiraeli mu lilienya lia Wele 9.1—11.36
Liiba lio mukristo 12.1—15.13
Limaliilisia ne kimileembe kiewe omwene 15.14—16.27
Currently Selected:
Bar. LIMANYISIA: LUBUKUSU
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019