Lir. 46

Yakobo nende be enju yewe bacha e Misiri

1Nio Isiraeli arakikha lukeendo nende nibio aaba nabio bioosi ola e Beerisheba mala aana embosio khu Wele owa raraawe Isaaka. 2Mala Wele alaanga Isiraeli mu malola ke siilo ali, “Yakobo, Yakobo.” Ne Yakobo akobosia ali, “Ndi ano.”

3Wele aloma ali, “Ese ndi Wele, Wele owa paapa wowo, okharia khukhwiikha oche e Misiri tawe, sikila ebweeneyo ndakhukhola obe sibala siboofu. 4Ndacha e Misiri ne nawe mala lundi ndiniinia lisaaye liowo likobole mu sibala sino. Ne Yosefu niye olikhumiina chimoni ne olikho ofwa.”

5Yakobo arekukha khukhwama e Beerisheba. Babaana ba Isiraeli bameemela paapa wabwe, babaana babwe bakeekhe, ne bakhasi babwe, mu makaari niko Farao aruma kabameeme. 6#Bikh. 7.15 Babukula akhaba chikhaafu chabwe ne bibiindu biabwe nibio baba ne banyoola mu sibala sia Kanaani, mala bacha e Misiri. Yakobo ne lisaaye liewe lwoosi, 7babaana bewe, babechukhulu bewe, bakhaana bewe ne babechukhulu bewe bakhaana bacha e Misiri.

8Kano niko kamasina ke lisaaye lia Isiraeli babacha mu Misiri, Yakobo ne babaana bewe Rubeni, omwana wewe omubele. 9Ne ba okhwa Rubeni, Anoki, Palu, Hesironi ne Karimu. 10Ba okhwa Simioni baba: Yemueli, Yamini, Ohati, Yakini, Soari ne Shauli, babaana bo omukhaana omukanaani. 11Ba okhwa Lawi baba: Kerishoni, Koati ne Merari. 12Ba okhwa Yuda baba: Eri, Onani, Shela, Peresi, Sera (ne kakhali Eri ne Onani bafwila mu sibala sia Kanaani). Ba okhwa Peresi baba: Hesironi ne Hamuli. 13Ba okhwa Isakari baba: Dola, Puba, Yobu ne Simuroni. 14Ba okhwa Sebuluni baba: Sereti, Eloni ne Yaeleeli. 15Bano bali babaana ba Lea nibo asaalila Yakobo mu Padani-aramu alala ne omukhaana wewe Tina. Boosi alala babaana bewe basoleeli ne bakhaana baba kamakhumi kataru ne bataru.

16Ba okhwa Kati baba: Sifioni, Hagi, Siuni, Esiboni, Eri, Aroti ne Areli. 17Babaana ba Asieri baba Imuna, Isiba, Isibi, Beria ne Sera omukooko wabwe. Babaana ba Beria baba: Heberi ne Malikieli. 18(Bano baba babaana ba Silipa, niye Labani aelesia omukhaana wewe Lea, mala asaalila Yakobo babaandu ekhumi na sita.)

19Babaana ba Raeli, mukha Yakobo baba: Yosefu ne Benjamini. 20#Lir. 41.50-52 Ne Yosefu asaalila mu sibala sia Misiri: Manase ne Efuraimu nibo Asenati, omukhaana owa Potifera, omusaayi owa Oni, amusaalila. 21Ne ba okhwa Benjamini baba: Bela, Bekeri, Asibeli, Kera, Naamani, Ehi, Roshi, Mupimu, Hupimu ne Ariti. 22(Babaandu ekhumi na bane bano lili lisaaye nilio Raeli asaalila Yakobo.)

23Ba okhwa Dani baba: Hushimu. 24Ba okhwa Nafutali baba: Yaiseeli, Kuni, Yeseri ne Silemu. 25(Babaandu saba bano bali lisaaye nilio Bilia, nasioobi niye Labani aelesia omukhaana wewe Raeli, asaalila Yakobo).

26Babaandu ba Yakobo boosi babeecha mu Misiri, ba baba lisaaye liewe, ne okhatubilekho bakhasi be babaana bewe tawe, baba kamakhumi sita na sita boosi alala. 27#Bikh. 7.14 Ne babaana ba Yosefu babasaalwa mu Misiri baba babili: Babaandu be enju eya Yakobo boosi babeecha mu Misiri baba kamakhumi saba.

Yakobo nende be munju yewe e Misiri

28Yakobo aruma Yuda arangire ache areebe Yosefu akaanile paapa wabwe e Kosieni, mala boola mu sibala sia Kosieni. 29Yosefu arekekha kamakaari kewe, mala acha khukhwakaanila Isiraeli raraawe mu Kosieni. Amwakaanila mala amukwa mwikosi alililamo khulwe siise. 30Isiraeli aboolela Yosefu ali, “Luno nakhafwa khefwe, sikila nakhuboone, mala namanyile ndi ewe osiliio omulamu.”

31Yosefu aboolela bawandaaye nende be munju eya raraawe ali, “Ndaniina nje mboolele Farao, ndi ‘Bawandaayase ne be nju eya paapa wase bababeele mu sibala sia Kanaani, bechile khwise. 32Ne babaandu bano bali babaayi be chikhaafu, mala bechile ne kiminyele kiabwe ne kamatuuli kabwe, ne bibiindu bioosi nibio bali nabio.’ 33Farao ne amulaanga mala ne amureeba ali, ‘Kimilimo kienywe kili siina?’ 34Mumukobosia muli, ‘Bakholi bowo bali babaayi be chikhaafu khukhwama mu buele khukhwola luno luri, efwe ne bapaapa befwe.’ Nio mumenye mu sibala sia Kosieni, sikila buli omwaayi owe chikhaafu ali sibiilisio khu mu Misiri.”

Currently Selected:

Lir. 46: LUBUKUSU

Highlight

Copy