Lir. 45

Yosefu ebuula khu bawandaaye

1 # Bikh. 7.13 Yosefu se aanyala khukhwefwiilisia ebweeni wa boosi ba baba ne bamwimileo tawe, mala ayokela lukali ali, “Khola buli omundu arekukhe andureo.” Nio, se aramao omundu yesi yesi nga Yosefu ne ebuula khu bawandaaye tawe. 2Mala alila lukali Bamisiri nende be munju mwa Farao boosi baulila. 3Nio Yosefu aboolela bawandaaye ali, “Ese ndi Yosefu, paapa asiili omulamu ku?” Ne kakhali bawandaaye se bamukobosia tawe, sikila baria lukali ebweeni wewe. 4Yosefu aboolela bawandaaye ali, “Musaba mwisende siimbi.” Mala beseenda siimbi. Ababoolela ali, “Ese ndi wandaayenywe, Yosefu, niye mwakusia mu Misiri. 5Nono mukheembeelela namwe mukhebiiya khukhungusia muno tawe, sikila Wele anduma ese ebweeni wenywe embonie bulamu. 6Sikila enjala yabeleo mu sibala kimiiko kibili kino, mala kiaramire kimiiko kiraano nikio khulima namwe khukesa se khulabao tawe. 7Wele anduma ese ebweeni wenywe khumuonia enywe ne khukhola lisaaye lienywe lirame khu sibala. 8Se muli enywe mumwandeera eno tawe ne kakhali Wele niye wandeera, lundi akholile mbe raraawe owa Farao, no mwami owe enju yewe yoosi ne khu sibala sia Misiri sioosi.

9 # Bikh. 7.14 “Khola khangu mala muche khu paapa mu muboolele muli, ‘Omwana wowo Yosefu alomile ali, Wele ayikhola khuba omwami mu Misiri mwoosi, yiikha wiche niio ese ndi, okhakhiinda tawe. 10Olamenya mu sibala sie Kosieni ne olaba siimbi ne nase, ewe ne babaana bowo ne babechukhulu bowo ne kiminyele ne kamatuuli ne bibiindu bioosi nibio oli nabio. 11Ne oli Kosieni, ndakhuliinda, sikila kiaramire kimiiko kiraano kie enjala kilikho kikiicha, busa ewe ne be nju yowo, ne bibiaayo biowo mukhafwe enjala.’ ”

12Yosefu achiililila khuloma ali, “Luno enywe mweesi, ne akhaba ewe Benjamini, mwabone muli ese ng'ali Yosefu. 13Kenyekhana muboolele paapa wase luyali lwase mu Misiri, ne niko mubone koosi. Mukhole khangu mureere paapa wase emwalo eno.”

14Nio akwa mwikosi mwa wandaaye Benjamini mala alila, akhaba Benjamini yesi alila. 15Ekwayila ne buli sia mulala khu bawandaaye boosi mala abalililakho. Enyuma wako bawandaaye bakachula ne naye.

16Nga kamakhuwa ne kola munju mwa Farao bali bawandaaye ba Yosefu bechile, liasiimisia Farao alala ne bakholi bewe. 17Farao aboolela Yosefu ali, “Boolela bawandaayo oli, ‘Khola muri: boa kimifuko kienywe khu punda chenywe mala muche mu sibala sia Kanaani, 18mubukule paapa wenywe nende be munju yenywe boosi mwiche khwise. Ndamua kamaloba kamalayi mu Misiri khukhila abuundu aandi oosi, mala mulalia bilayi bie sibala sino.’ 19Lundi baboolele oli, ‘Khola muri; bukula kamakaari khukhwama mu sibala sia Misiri khulwe babaana bakeekhe ne bakhasi benywe, mureemo paapa wenywe mala mwiche. 20Mukhebaasia khu biindu bienywe tawe, sikila kamaloba kamalayi khukhila koosi, ka Misiri kali kakenywe.’ ”

21Ba okhwa Isiraeli bakhola bario mala Yosefu abaelesia kamakaari, khuloondekhana ne lilaka lia Farao, lundi abaelesia biakhulia bie khu lukeendo. 22Aelesia buli mulala chingubo che khukhwekaluukhasia ne Benjamini amua bitonyi chimia chitaru bie efwesa, ne chingubo chiraano che khukhwekaluukhasia. 23Arumira raraawe chipunda ekhumi, nicho baboakho bibiindu bilayi bia Misiri chipunda chikhasi ekhumi chichasuta biakhulia, kimikaati ne biakhulia bibiindi bie khu lukeendo lwa raraawe. 24Akheesia bawandaaye ne nga baba ne balikho barekukha aloma ali, “Mukhalomanila khungila tawe.”

25Nio baniina, barura mu Misiri, mala bola mu sibala sia Kanaani, khu paapa wabwe Yakobo. 26Bamuboolela bali, “Yosefu asilio omulamu mala ali omwami owe sibala sia Misiri sioosi!” Mala Yakobo esiindukha kumwoyo sikila se abasuubila tawe.

27Ne kakhali nga ne bamuboolela kamakhuwa ka Yosefu koosi, niko aba ne ababoolele, lundi nga ne abona kamakaari niko Yosefu aaba ne arumire kamumeeme, kumwoyo kwa paapa wabwe Yakobo kwanyoola kamaani. 28Mala Isiraeli aloma ali, “Kanyalile kario, omwana wase Yosefu asiili omulamu, ndacha mubone ne ekhafwa tawe.”

Currently Selected:

Lir. 45: LUBUKUSU

Highlight

Copy