Lir. 44

Sikoombe sisiatiba

1Yosefu alaka omukholi omukhulu owe munju mwewe ali, “Yichusia biakhulia mu mifuko kie babaandu bano, nga kimifuko kiabwe ne kinyala kiasuta mala okobosie chirupia cha buli mundu emunwa we kumufuko kwewe. 2Ne ra sikoombe siase sie efwesa emunwa we kumufuko kwo omukeekhe khu boosi, ne chirupia chewe che biakhulia.” Mala akhola nga Yosefu ne amuboolela. 3Nga bwasia busa buri, babaandu abo balekhuulwa bacha ne chipunda chabwe. 4Nga baba bachiile lukeendo lulwimbi busa khukhwama mu lukoba, Yosefu aboolela omukholi wewe omukhulu ali, “Yinyokha oloonde khu baandu abo, mala ne obanyoola obaboolele oli, ‘Siina sikila ne muruungire bubi khu malayi? Siina sikila ne mwibile sikoombe sie efwesa sio mwami wase?#44.4 Siina sikila ne mwibile sikoombe sie efwesa sio mwami wase?: Siina sikila ne mwibile sikoombe sie efwesa sio mwami wase? Lueburania se luli ne kamakhuwa kano tawe. 5Se sili nisio omwami wase anyweelangamo lundi nisio alakulilangamo ku? Mwakholile bubi bukali.’ ”

6Nga omukholi owa Yosefu abolakho alomaloma kamakhuwa kano. 7Bamukobosia bali, “Siina sikila omwami wase ne alomaloma kamakhuwa nga kano. Bakholi bowo se banyala bakhola sisiindu nga sino tawe! 8Chirupia nicho khwanyoola emunwa we kimifuko kiefwe, khwachikobosia khukhwama mu sibala sia Kanaani. Nono khunyala khweba khuriena efwesa namwe esahabu khukhwama munju mwo omwami wowo? 9Omukholi wowo yesi yesi, niye silanyoolekhakho, lekha erwe ne akhaba efwe khulaba nasioobi bo mwami wefwe.”

10Abakobosia ali, “Nafukiiliile nga mulomile, ne niye sikoombe silanyoolekhakho, niye yeng'ene olaba nasioobi wase, ne babaandi se balaba ne lie khubekiicha tawe.” 11Khangu busa, buli omundu aruura kumufuko kwewe asi, mala buli mundu akaangulula kumufuko kwewe. 12Arakikha khupula, khukhwamila khu mukhulu mala amaliilisia ne omukeekhe khu boosi. Mala sikoombe sianyoolekhana mu mufuko kwa Benjamini. 13Nio, bawandaaye batabula chingubo chabwe, ne buli omundu akobosia kumufuko kwewe khu punda bakobola mu lukoba.

14Nga Yuda ne bawandaaye bakobola munju mwa Yosefu, aaba asilimo. Baakwa asi ebweeni wewe. 15Yosefu abareeba ali, “Sikholwa siina nisio mukholile sino? Se mumanyile muli omundu nga ese nyala nalakula ta ku?”

16Yuda amukobosia ali, “Omwami, khukhubolele khuli sina? Khulome siina? Khunyala khwekaana khuriena? Wele afunuule bubi bwe bakholi bowo, nono, efwe khuli nasioobi bo mwami wase, efwe ne noyo niye sikoombe sinyoolekhe mukhono mwewe.” 17Ne kakhali Yosefu aloma ali, “Se enyala nakhola ndio tawe! Ne kakhali omundu niye sikoombe sinyoolekhane mukhono mwewe yeng'ene niye olaba nasioobi wase, ne enywe, khe murekukhe muche engo mu muleembe khu paapa wenywe.”

Yuda ekoonjelela sikila Benjamini

18Yuda eseenda siimbi khu Yosefu mala amuboolela ali, “Nosiima, omwami, mbe kumunwa, khusaba, mboolele omwami wase likhuwa. Okhaambwa lirima khu mukholi wowo tawe, sikila ewe oli nga Farao omwene. 19Omwami, ewe wareeba bakholi bowo oli, ‘Muli ne paapa wenywe namwe wandaayenywe okundi?’ 20Mala khwakobosia omwami wase khuli, ‘Khuli ne paapa mala ali omusaakhulu ne wandaayefwe omukeekhe, niye paapa asaala ne ali omusaakhulu. Ne wandaaye aafwa arama yeng'ene khu baana ba maawe, ne paapa wefwe amusiima lukali.’ 21Ewe waloma bakholi bowo oli, ‘Cha, mumureere nenya khumubona.’ 22Khwaboolela omwami wase khuli, ‘Omwana oyo se anyala alekha raraawe tawe, ne aaba bali amulekha anyala afwa.’ 23Ne ewe, omwami wakhuboolela efwe, bakholi bowo oli, ‘Mukhambonekhela ne mukheechile ne wandaayenywe omukeekhe tawe.’

24“Nga khwakobola engo khu mukholi wowo, paapa wefwe khwamuboolela kamakhuwa ko mwami wase. 25Ne nga paapa ne akhubooleele ali, ‘Khemuche lundi e Misiri, mukuleyo biakhulia bitiiti,’ 26Khwamukobosia khuli, ‘Se khunyala khwekha lundi e Misiri, kaaba bali wandaayefwe omukeekhe se alikho acha ne nafwe tawe. Aba khuleekha khucha, sikila se khufukiililwa khubona omundu oyo wandaayefwe omukeekhe, ne akhali ne nafwe tawe.’ 27Ne omukholi wowo, paapa wase akhuboolela ali, ‘Enywe mumanyile muli omukhasi wase Raeli asaalila ese babaana babili, 28mulala afwa ayindekha, mala naloma ndi, ng'ali atabulakwa mu bitonyi ne solo eye mundaa, ne khamubonakho khukhwama ao tawe. 29Mwaba ne mumbukula yuno yesi mala kamabi kamukwakho, bubeeleli nibwo khabe nabwo bulinjira busa omusaakhulu nga ne ndii ndi.’

30“Khwako, omwami, nga ne ngobola khu mukholi wowo, paapa wase, mala omwana se ali ne nafwe tawe, mala bulamu bwewe bwabowa mu bulamu bwo omwana yuno, 31nga ne alabona ali omwana se ali ne nafwe tawe alafwa, mala aba bakholi bowo, khulafwiisia omusaakhulu paapa mu bubeeleli. 32Ese, omukholi wowo naana bulamu bwase khulwo mwana yuno khu paapa ne ndoma ndi, ‘Naaba ne khamukobosia khwiwe tawe, lekha mbe ne liliekicha mumoni cha paapa wase mu bulamu bwase bwoosi.’ 33Nono, khwako ekhusaba, ese ndame mu bweyaangu bwo omwana yuno, nga nasioobi wo mwami wase, mala olekhe omwana yuno akoboleyo ne bawandaaye, 34sikila ese nyala nakobola ndiena khu paapa wase omwana yuno aaba ne akhali ne nase tawe? Ndi ne buuri khubona kamabi kaacha khuba khu paapa.”

Currently Selected:

Lir. 44: LUBUKUSU

Highlight

Copy