Lir. 47

1Nio Yosefu acha mwa Farao mala amuboolela ali, “Paapa wase ne bawandaayase, ne kiminyele kiabwe, ne kamatuuli kabwe, ne bibiindu biabwe bioosi, bechile khukhwama mu sibala sia Kanaani, siise sino bali e Kosieni.” 2Ne khukhwama mu bawandaaye, abukulamo basaani baraano, mala abekesia khu Farao. 3Farao areeba bawandaaye ali, “Kimilimo kienywe kili siina?” Bakobosia bali, “Bakholi bowo bali babaayi be bibiaayo nga bapaapa befwe ne baaba.” 4“Khwichile khumenyekho mu sibala sino, sikila bakholi bowo se bali ne kamaayilwe ke bibiaayo tawe, lundi enjala eli endafu lukali mu sibala sia Kanaani. Nono khukhusaba okhue efwe bakholi bowo kumunwa khumenye mu sibala sia Kosieni.” 5Nio, Farao aboolela Yosefu ali, “Paapa wowo ne bawandaayo bechile khwiwe. 6Sibala sia Misiri sili ebweeni wowo, elesia paapa wowo ne bawandaayo kamaloba kamalayi khukhila koosi mu sibala sino bamenyemo. Lekha bamenye mu maloba ka Kosieni. Ne waaba ne omanyile mu nibo, basaani banyala khukhunjayila chikhaafu chase bareekho banjayile.”

7Yosefu areera Yakobo, raraawe, amwekesia khu Farao mala Yakobo abiita Farao chikhabi. 8Nio Farao areeba Yakobo ali, “Ewe oli ne bukhulu bwe kimiiko kinga?”

9Yakobo akobosia Farao ali, “Bulamu bwase bwe khuuya-uuya buli kimiiko emia ndala ne kamakhumi kataru. Kimiiko ekio kili mikeekhe mala kie butinyu ne se kilekhaana ne kimiiko kimikali kie bulamu bwe khuuya-uuya bwe bakuuka base tawe.” 10Nio Yakobo abiita Farao chikhabi mala arura ebweeni wewe. 11Yosefu amenyia raraawe ne bawandaaye, abaa kumukabwa mu sibala sia Misiri, mu maloba kamalayi khukhila koosi, mu lukoongo lwe Ramusesi nga Farao ne aaba ne alaka. 12Nio Yosefu aelesia raraawe, bawandaaye ne babaandu boosi be munju mwa raraawe siakhulia, khuloondekhana ne babaandu nibo baba ne nabo.

Enjala

13Nono Siakhulia se siabakhoo mu sibala tawe. Enjala yaba endafu lukali, mala babaandu be mu Misiri ne mu Kanaani bang'aa lukali sikila enjala eyo. 14Yosefu abuusia chirupia mu sibala sia Misiri ne sia Kanaani nga kumuruungo kwe biakhulia nibio babaandu bakula mala achiyila mwichipi lia Farao. 15Ne nga chirupia choosi chaba ne chiweele mu sibala sia Misiri ne mu sibala sia Kanaani, Bamisiri boosi becha khu Yosefu mala baloma bali, “Khue biakhulia! Okhakhulekha khwafwila mumoni chowo tawe, sikila chirupia chefwe choosi chaweele.”

16Yosefu abakobosia ali, “Chirupia chenywe chaba ne chiweele, mbe bibiaayo ne ese ndamuua enywe biakhulia.” 17Nio bareera bibiaayo khu Yosefu, mala Yosefu abaa biakhulia khulwe khukulasia ne chifarasi, ne kiminyele, kamatuuli, ne chipunda chabwe. Kumwiiko okwo abaelesia biakhulia khulwe khukulasiamo bibiaayo biabwe bioosi.

18Nga kumwiiko okwo ne kwawa, becha khu Yosefu mala bamuboolela bali, “Omwami se khulakhukisa tawe, chirupia chefwe choosi chaweele, ne bibiaayo biefwe bioosi, luno bili bibiowo. Se siliio siramire nisio khunyala khwakhua tawe, ne kakhali fwabene ne kamaloba kefwe. 19Okhakhulekha khwafwila mumoni chowo tawe. Khukule efwe ne kamaloba kefwe mala efwe ne kimikuunda kiefwe khulaba nasioobi ba Farao, khue biakhulia khulie enjala ekhakhwira tawe, lundi khue bumiicho khumiiche mu mikuunda kikhaba busa tawe.”

20Nio Yosefu akulila Farao kimikuunda kie mu sibala sia Misiri kioosi, sikila Bamisiri boosi bakusia kimikuunda kiabwe khulwe enjala eyaba endafu lukali khu nibo. 21Mala akhola babaandu mu Misiri mwoosi baba nasioobi ba Farao. 22Kimikuunda kie basaayi kiong'ene nikio akhakula tawe, sikila basaayi baba ne sikelo sie biakhulia buli lwoosi khukhwama khu Farao, mala bamenyela khulwe khunyoola biakhulia nibio Farao abaechanga. Khwako se bakusia kimikuunda kiabwe tawe. 23Nio Yosefu aboolela babaandu ali, “Lola endaalo yino namukulile enywe ne kimikuunda kienywe mube ba Farao. Nono bumiicho obusiina mumiichemo. 24Ne khukhwola mu likesa, mulielesia Farao silala khu biraano sie likesa lienywe ne biramire bibe biakhulia bienywe ne bumiicho.”

25Bamukobosia bali, “Wakhuoniisie: Omwami nosiima efwe khulaba nasioobi ba Farao.” 26Nio Yosefu alikhola liaba lilaka mu sibala sia Misiri, ali silala khu biraano sie likesa sili sia Farao. Lilaka lino lisiliio khukhwola luno. Kamaloba ke basaayi kong'ene kakhaba ka Farao tawe.

Lilienya lia Yakobo limaliilisi

27Baisiraeli bamenya mu sibala sia Misiri, mu lukoongo lwa Kosieni mala banyoolamo kimiaandu lundi basaalana baba bakali lukali. 28Nio Yakobo amenya mu sibala sia Misiri kimiiko ekhumi ne saba, nio kimiiko kie bulamu bwa Yakobo kiaba emia ndala ne kamakhumi kane ne kimiiko saba. 29#Lir. 49.29-32; 50.6 Ne nga siise siola sie lifwa lia Isiraeli, alaanga omwana wewe Yosefu amuboolela ali, “Naaba luno ne nyoolile kumwalaalo mumoni mwowo, ra kumukhono kwowo akari we kamaraango kase mala unjechubile oli se olisiikha mu sibala sia Misiri sino tawe. 30Nenya siikhwe niio bapaapa bali, sute undusie mu Misiri mala musiikhe niio nibo basiikhwa.”

Yosefu akobosia ali, “Ndikhola nga ne olomile.”

31Ne Isiraeli amuboolela ali, “Njechubile.” Mala Yosefu amwichubila. Nio Isiraeli enamikha bubweeni bwetiila khu sitanda siewe.

Currently Selected:

Lir. 47: LUBUKUSU

Highlight

Copy