Lir. 35

Wele abiita Yakobo chikhabi e Beteli

1 # Lir. 28.11-17 Wele aboolela Yakobo ali, “Yinyokha, oche e Beteli omenyeyo mala wombakhe alutare khu Wele wakhubonekhela nga ne waba ne wilukha wandaayo Esau.”

2Nio Yakobo aboolela be munju mwewe ne naabo ba baba ne naye boosi ali, “Mwaata bifwaani bie bawele bakeni boosi nibio muli nabio mwikwalaasie mala mufware chingubo chimiiliu. 3Mala khwinyokhe khuche e Beteli, nio nombakheyo alutare khu Wele owanjeeta mu ndaalo eye sibi siase, lundi owabeele ne nase buli abuundu osi osi niio nacha.” 4Nio baelesia Yakobo bifwaani bie bawele bakeni bioosi nibio baba nabio, ne chimbete chichaba khu maru khwabwe, mala Yakobo abisiikha asi we kumurongooro kukwaba siimbi e Shekemu.

5Mala nga Yakobo ne babaana bewe bachiililila ne lukeendo, Wele akhola babaandu be chingoba chichaba siimbi baaba ne buuri bukali bwaakila khutima khu ba okhwa Yakobo tawe. 6Yakobo ne babaandu bewe boosi boola Lusi, (Lukoba lulwamanyikhana nga Beteli) luli mu sibala sia Kanaani. 7Abwenao ombakhao alutare mala atiuukhao ali “El-Beteli,” sikila Wele amubonekhela abwenao nga ne aba ne elukha khukhwama khu wandaaye. 8Debora, omulesi owa Rabeka afwa mala asiikhwa asi we kumurongooro amwalo owa Beteli. Nio lisina liao lialaangwa bali Aloni-bakuti (kumurongooro kwe khulila).

9Nga Yakobo ne ama e Padani-aramu, Wele amubonekhela lundi mala amubiita chikhabi. 10#Lir. 32.28 Wele amuboolela ali, “Lisina liowo lili Yakobo, ne khukhwama luno se lilaba Yakobo tawe ne kakhali lilaba Isiraeli.” Nio Wele amutiuukha lisina ali Isiraeli. 11#Lir. 17.4-8 Wele achiililila khumuboolela ali, “Ese ndi Wele Owe Bunyali Bwoosi. Saala babaana bakali mala okuche, ekholo ne bipupu bie chikholo biliama mwiwe ne babaami baliama mu lisaaye liowo. 12Ndakhua ewe sibala nisio naelesia Aburahamu ne Isaaka, mala ndiaa lisaaye liowo enyuma wowo.” 13Nio Wele arekukha khukhwama abuundu niio alomaloma ne naye. 14#Lir. 28.18-19 Yakobo asimikha enjeko eye kamabale abuundu niio Wele alomalomelao ne naye ao mala achukhakho siaanwa sie endali ne kamafura. 15Nio atiuukha abuundu niio Wele akachula naye ali Beteli.

Lifwa lia Raeli

16Barekukha khukhwama e Beteli mala nga ne baba ne basilikho sinao khukhwama Efurati, Raeli alumwa burafu bwe khusaala omwana. 17Oli alikho asaala, owamusaasia amuboolela ali, “Okharia tawe sikila luno olasaala omwana owe sisoleeli okundi.” 18Ne nga Raeli aba ne akwiisia kumwoyo (sikila afwa) amutiuukha lisina ali Benoni#35.18 Benoni: sifuno sie lisina lino mu Lueburania sili “Omwana owe bubeeleli bwase.”ne kakhali raraawe amutiuukha ali Benjamini#35.18 Benjamini: sifuno sie lisina lino mu Lueburania sili “omwana ookhabe ne ekhabi endayi.”.

19Nio Raeli afwa mala asiikhwa angila echa Efurati (olwo nilwo lukoba lwa Betelehemu). 20Yakobo ara enjeko khu siliindwa siewe, enjeko eyo yekesia siliindwa sia Raeli khukhwola khu ndaalo yino. 21Isiraeli achiililila ne lukeendo acha ombakha liiema liewe ebweeni we endeleelwa eya Eteri.

Ba okhwa Yakobo

(1 Ke Ch. 2.1-2)

22 # Lir. 49.4 Nga Isiraeli amenya mu sibala esio, Rubeni acha akona ne Bilia mulalakho khu bakhasi nibo raraawe amenyia busa nga omusaale, mala Isiraeli akaulila#35.22 mala Isiraeli akaulila: likaluukhasia lilala lie khaale liatasao lili mala abeelela, Lueburania se luli ne kamakhuwa kano tawe..

Ba okhwa Yakobo baba ekhumi ne babili. 23Babaana ba Lea baba Rubeni (omubele owa Yakobo), Simioni, Lawi, Yuda, Isakari ne Sebuluni. 24Babaana ba Raeli baba, Yosefu ne Benjamini. 25Babaana ba Biliia, omukholi owa Raeli baba Dani ne Nafutali. 26Babaana ba Silipa, omukholi owa Lea baba Kati ne Asieri. Bano nibo babaana ba Yakobo nibo asaalila mu Padani-aramu.

Lifwa lia Isaaka

27 # Lir. 13.18 Mala Yakobo acha khu Isaaka raraawe e Mamure, namwe Kiriati-Ariba (olwo nilwo lukoba lwa Heburoni) niio Aburahamu ne Isaaka bamenya nga baakwa. 28Isaaka amenya osia kimiiko emia ndala ne kamakhumi munaane. 29Nio Isaaka akwiisia kumwoyo, acha khu baandu bewe. Aaba akofuule mala babaana bewe, Esau ne Yakobo, bamusiikha.

Currently Selected:

Lir. 35: LUBUKUSU

Highlight

Copy