Lir. 34

Shekemu akwa khu Tina

1Endaalo ndala, Tina, omukhaana niye Lea asaalila Yakobo, arura acha khukeniia bakhaana be mu sibala sia Kanaani. 2Ne nga Shekemu, okhwa Hamori Omuhiti, omwana owe bubwami bwe mu sibala esio, amubona, amukwakho ne kamaani mala akona ne naye amufwolobia. 3Kumwoyo kwewe kwaba khu Tina, omukhaana owa Yakobo. Amusiima, mala amulomalomakho bulayi#34.3 bulayi: amulomalomakho bulayi, namwe amukhola amusiime.. 4Nio Shekemu aboolela raraawe Hamori, ali, “Mbukulile omukhaana yuno abe omukhasi wase.”

5Yakobo aulila ali Shekemu aba afwolobie Tina omukhaana wewe. Basoleeli bewe baba basamuusie chikhaafu mu lukoongo. Nio Yakobo asila busa nabwila baloota. 6Hamori, raraawe owa Shekemu arura acha alomaloma ne Yakobo. 7Nga ba okhwa Yakobo baloota khukhwama mu lukoongo, bakaulila. Mala babiililwa ne khuambwa lirima lukali, sikila Shekemu areera ekifocholi mu Isiraeli khulwe khukona ne omukhaana owa Yakobo. Sisiindu nga esio sirio se sienyekhana khukholwa tawe. 8Hamori alomaloma nabo ali, “kumwoyo kwo omusoleeli wase kwasiimile omukhaana wenywe. Musaba mufukiilile bayilane. 9Khuuliilisiane khukhwaane. Khuelesie bakhaana benywe khukhwe, ne enywe mukhwe babefwe. 10Mulamenya ne nafwe ne sibala sili nga sisienywe, mumenye ne khukhola bubwofuli, mala munyoolemo kimiaandu.”

11Lundi Shekemu yesi aboolela raraawe owa Tina ne bawandaaye ali, “Kholele kumwalaalo kuno, mala ndamuua siosi siosi nisio mwenya. 12Reeba bukhwe ne biaanwa biakhaba bie angaaki mala ndamuua khuloondekhana nga muloma. Ne kakhali musaaya mumbe omukhaana abe omukhasi wase.”

13Ba okhwa Yakobo babea Shekemu ne raraawe Hamori, sikila aba afwolobie omukooko wabwe Tina. 14Babaloma bali, “Se khunyala khukhola likhuwa lino tawe. Lili lie chisoni khwifwe khua omusiinde omukhaana wefwe. 15Khunyala khwauliilisiana nanywe khu likhuwa lilala lino liong'ene: khuli enywe mulaba nga efwe khulwe khukheba buli yesi yesi owe siseecha. 16Nio khumue bakhaana befwe muyile babe bakhasi benywe ne fwesi khuyile bakhaana benywe babe bakhasi befwe ne khulamenya ne nanywe mala khulaba siindu silala. 17Ne mwaba baali se mufukiilila likhuwa liefwe mala mwakhebwa tawe aba khulabukula omukooko wefwe mala khurekukhe.”

18Kamakhuwa kabwe kasiimisia Hamori no musaani wewe Shekemu. 19Ne Shekemu se alindiilila khukhola nisio baloma tawe, sikila omukhaana owa Yakobo amusiimisia lukali. Shekemu aba owakoosibwa lukali mu luuya lwabwe.

20Nio Hamori no musaani wewe, Shekemu, bacha a silibwa sie lukoba, mala balomaloma khu baandu be siseecha be mu lukoba lwabwe, baboola bali, 21“Babaandu bano bali basaale befwe. Khe bamenye mu sibala mala bakholemo bubwofuli, sikila lola sibala sili sibalaayi siboola bulayi. Khe khuyile bakhaana babwe babe bakhasi befwe, ne fwesi khubae bakhaana befwe bayile babe bakhasi babwe. 22Khu likhuwa lino liong'ene babaandu bano balafukiilila khumenya nafwe khube siindu silala: bali buli yesi yesi owe siseecha mwifwe akhebwe nga nibo. 23Chikhaafu chabwe, kimiaandu kiabwe ne bibiaayo biabwe bioosi se bilaba bibiefwe ta ku? Lekha efwe khuuliilisiane busa ne nabo mala balamenya ne nafwe.” 24Ne babaandu be lukoba olwo boosi bafukiilila kamakhuwa ka Hamori no musaani wewe, mala buli owe siseecha owacha mu silibwa sie lukoba akhebwa.

25Khu ndaalo ekhola khataru, oli babiimbile, ba okhwa Yakobo, Simioni ne Lawi, bawandaaye ba Tina, babukula chimbalu chabwe mala bengila mu lukoba olwo babaandu ne bakhamanya tawe mala beera be siseecha boosi. 26Beera Hamori no musaani wewe Shekemu, babukula Tina khukhwama munju eya Shekemu barekukha ne naye. 27Ba okhwa Yakobo bayaaya bibiindu enyuma we khukhwira babaandu sikila omukooko wabwe aaba afwolobisiibwe. 28Babukula kiminyele ne kamatuuli kabwe chipunda ne buli sisiindu siosi siosi sisiaba mu lukoba ne mu lukoongo. 29Babukula kimiaandu kiabwe kioosi ne bakhasi babwe ne babaana, ne buli sisiindu sisiaba mu chinju.

30Yakobo aboolela Simioni ne Lawi ali, “Mwandereere sibi, luno Bakanaani ne Baperisi ne buli mundu owe mu sibala sino alambiila. Babaandu base bali batiiti, ne baaba bali bebuusia alala banjibwaakala nderwa alala ne be nju yase yoosi.”

31Ne kakhali Simioni ne Lawi baloma bali, “Khumulekhe akhole omukooko wefwe khuuba omutaamba?”

Currently Selected:

Lir. 34: LUBUKUSU

Highlight

Copy