Bikh. 15

Kumuse mu Yerusalemu

1 # Bal. 12.3 Babaandu balala bama e Buyuda becha e Andioka mala barakikha khukhwekisia basuubili bali, “Semunyala khuonisibwa ne mukhakhebiilwe nga Lilaka lia Musa ne liboola tawe.” 2Paulo ne Baranaba bayingana nabo lukali khu likhuwa lino, nio liakhalakwa bali Paulo ne Baranaba alala ne babaandikho khube mu sibala sia Andioka, bache Yerusalemu babonane ne barumwa ne babemeelesi khu likhuwa lino.

3Barumwa ne kanisa, ne nga baba ne bacha babirira Foenike ne Samaria, ne baboola nga Be Chikholo ne balakobolelanga Wele. Kamakhuwa mene ako kareera busangaafu bukali khu basuubili. 4Nga ne boola mu Yerusalemu, bakaanilwa ne kanisa, barumwa, ne babemeelesi. Nio bababoolela koosi niko Wele aaba ne akholile khubirira mu nibo. 5Nio balala khu basuubili ba baaba be mumukaanda kwe Bafarisayo benyokha baloma bali, “Be Chikholo khukhwola bakhwebwe, lundi baboolelwe khuria Lilaka lia Musa.”

6Barumwa ne babemeelesi be kanisa bekhala alala khukhwinoosia lireeba liene elio. 7#Bikh. 10.1-43 Enyuma we khuloleelela mwikhuwa elio khu siise sileeyi, Petero enyokha aloma ali, “Bawandaayase, mumanyile muli Wele andobora khaale khukhwama mwinywe nilwache burume bwe Elomo Endayi khu Be Chikholo, nio baulile ne khusuubila. 8#Bikh. 2.4; 10.44 Ne Wele, omanyile kamebaasio ka buli mundu ekesia abuwaanga ali afukiliile be Chikholo khulwe khubaelesia Roho Omutakatifu bulayi bwene nga ne akhuelesia efwe fwesi. 9Se atomboola akari wefwe ne nabo tawe. Ababeela bubwoni bwabwe sikila basuubila. 10Khwako, siina sikila enywe luno ne mwenya khukhaka Wele nga ne mularechanga busiro khu mikoongo kie basuubili khaba nibwo akhaba efwe fwabeene namwe bakuuka befwe baakhanyala khusuta tawe? 11Efwe khusuubila khuli khubirira mu mwalaalo kwo Mwami Yesu, efwe khulaonisibwa bulayi bwene nga nibo.”

12Babaandu boosi basila ne khurekeeresia Baranaba ne Paulo, nga baboola kamayia nende bie khuukia nibio Wele aaba ne akholile mu Be Chikholo khubirira mu nibo. 13Nga bamala khulomaloma, Yakobo asuta kumumilo kwewe aloma ali, “Bawandaayase, ndekeeresie! 14Simoni ama khukhwinoosia nga Wele mu khunyoa ne echa mu Be Chikholo khubukulamo babaandu khulwe lisina liewe. 15Chilomo che bang'oosi chifukiilisiana elala ne nakano, niio liiandiko liloma lili,

16 # Amo. 9.11-12 “Omwami aloma ali,

‘Enyuma we kamakhuwa kano ndakobola,

ndakobosiao bubwami bwa Daudi.

Niio bwatechukha ndabwombakha lundi,

mala mbukhole bube bwe kamaani lundi.

17Nio babaandu baramire Be Chikholo boosi nibo nalaanga khuuba babaase samwene, balecha niio ndi.

18Omwami owakhola kano kamanyikhana khaale aloma ario.’ ”

19Yakobo achiililila khuloma ali, “Ese ndola ndi, se khukhoyeele khwanaania Be Chikholo balakobolelanga Wele tawe. 20#Khur. 34.15-17; Bal. 17.10-16; 18.6-23 Ne kakhali, khukhoyeele khubaandikile ebarwa khubaboolela balekhe khulia siakhulia siosi siosi siili sie kumusaango, siaanilwe nga siianwa khu bifwaani, be bebee bukhobani, lundi bakhalia enyama yosi yosi, niyo bakokile, namwe khulia ne khunywa kamalasile tawe. 21Sikila Lilaka lia Musa liasomilwe khu siise sileeyi mu masinakooki buli endaalo eye Sabato, ne kamakhuwa kewe kelwachibwanga mu buli lukoba.”

Ebarwa khu basuubili Be Chikholo

22Nio barumwa, ne babemeelesi alala ne kanisa yoosi bakhalaka khurobora babaandu balala khukhwama mu sipupu esio bache e Andioka alala ne Paulo ne Baranaba. Barobora babaandu babili nibo basuubili baria lukali, Yuda owalaangwa Barisaba ne Sila. 23Ba baruma ne ebarwa yino: “Efwe, barumwa ne babemeelesi be kanisa, khuli bawandaayenywe, khuruma kimileembe khu bawandaayefwe boosi ba basaalwa mu Chikholo ba bamenya e Andioka, Siria ne Silisia. 24Khwaulile bali babaandu babaandi ba barura mwifwe, bamunaanisie ne khumwonaka kimiooyo kienywe sikila niko baloma, ne efwe se khwabalakakho balome likhuwa liosi liosi tawe. 25Khwako, khwekhaale alala mala fwesi khwafukiilisiana khurobora barumwa, khubarume khwinywe. Balecha ne basaale befwe bakoosi Baranaba ne Paulo, 26babeana bulamu bwabwe khukholela Omwami Yesu Kristo. 27Nono, khulikho khuruma Yuda ne Sila; kane babenabo bamuboolele ne kumunwa niko khuandiike kano. 28Lialolekhaane lilayi khu Roho Omutakatifu ne nafwe, khukhamutiuukha enywe busiro bukali tawe, ne kakhali kamalaka kali ne bukhala niko kano; 29Mukhalia biakhulia bie kimisaango nibio baosiisie khu bifwaani, namwe kamalasile, namwe enyama eye sisiaayo sikokiilwe tawe. Mwiyaye mukhaba be sifwaabi tawe. Mulaba bulayi mwaba ne mweliinda khu makhuwa kano. Muliindwe.”

30Basibula barumwa chana abo bacha e Andioka, ebweeneyo balaanga basuubili alala mala babaelesia ebarwa eyo. 31Nga ne basoma ebarwa eyo, kamakhuwa kakabaamo, kabasangaasia ne khubachuuba. 32Yuda ne Sila ba baaba bang'oosi, bakachula ne balebe abo khu siise sileeyi ne ba bachuuba ne khubaramo kamaani. 33Enyuma we khubayo khulwe siise, basuubili ba basibula mu muleembe bakobola niyo ba baabaruma baba. [ 34Ne kakhali Sila akhalaka khuramayo.]#15.34 Chibibilia chindala se chili ne lunyilili luno tawe.

35Paulo ne Baranaba barama e Andioka khulwe siise, baambaana ne babaandi ne bekisia ne khukhwilwacha Elomo Endayi eyo Mwami.

Paulo ne Baranaba baukhana

36Nga chindaalo ngekhe chabira, Paulo aboolela Baranaba ali, “Khukoboleyo khulambuule bawandaayefwe mu buli lukoba nimwo khwelwacha elomo eyo Mwami, khubone nga ne balikho bachiililila.” 37Baranaba enya bache ne Yoana Mariko yesi. 38#Bikh. 13.13 Ne kakhali Paulo se enya bache ne Mariko tawe, sikila aabalekha e Pamufilia, aloba khuchiililila nabo mumilimo kiabwe. 39Kamayiingamo kamarafu kabao, mala baukhana. Baranaba abukula Mariko, baniina emeeli bambukha Saipurasi. 40Ne Paulo arobora Sila mala bacha, enyuma we basuubili khubara mu buliindi bwe kumwalaalo kwo Mwami. 41Nio Paulo abirira mu Siria ne Silisia ne atinyilisia chikanisa.

Currently Selected:

Bikh. 15: LUBUKUSU

Highlight

Copy