Bikh. 14

Paulo ne Baranaba mu Ikoni

1Ne bali Ikoni bengila boombi mu sinakooki eye Bayaudi, mala belwacha. Babaandu bakali Bayaudi ne Bakiriki alala basuubila. 2Ne Bayaudi bakhasuubila tawe, baachilisia Be Chikholo ne khubakhola babiile basuubili. 3Ne kakhali Paulo ne Baranaba bachiililila khumenyayo lukali ne balomaloma ne bunyindaafu ko Mwami. Omwami naye aandalasia burume bwabwe bwe kumwalaalo kwewe mu khubaelesia kamaani khukhola kamayia ne bikholwa bie liiukia. 4Babaandu be mu lukoba babukhana, balala baloonda Bayaudi ne babaandi barumwa.

5Enyuma wako Bakiriki balala ne Bayaudi, ne babemeelesi babwe, bakhalaka khu khupia siibi barumwa ne khubapa kamabaale. 6Nga barumwa ne bamanya kamene ako, belukhila mu ngoba cha Lisitura ne Teribe mu Likaonia ne chingoongo chiili siimbi ne nao. 7Ebweeneyo belwacha Elomo Endayi.

Mu Lisitura ne Teribe

8Mu Lisitura abamo omundu omuleme owalemala khukhwama mu khusaalwa khwewe, aba sanyala khukeenda tawe. 9Omundu mwenoyo aba ekhaale arekeeresie nga Paulo ne elwacha. Paulo amuloleelela mala abona ali, ali ne lisuubila linyala liamuonia. 10Aloma ne kumumilo kwe aangaki ali, “Yinyokha wime!” Omundu oyo enyokha khangu, mala arakikha khukeenda. 11Babaandu bakali abo nga ne babona niko Paulo akhola, barakikha khu khuupa luyoka mu lulomo lwabwe Lulikaonia bali, “Bawele becheele mu lukoondo lwe babaandu!” 12Batiuukha Baranaba bali Seusi, Paulo bali Herimesi sikila niye aaba omulomalomi Omukhulu. 13Mala omusaayi owa wele niye balaanga bali Seusi, niye lukaangu lwewe lwaba enje we lukoba, areera chiuunwa ne bimuli esilibwa, sikila niye ne babaandu abo benya khurusia embosio khu barumwa.

14Baranaba ne Paulo nga ne baulila niko babaandu benya khukhola, batabulaka chingubo chabwe mala batimaka bacha akari we babaandu abo ne khuyokela bali, 15#Khur. 20.11; Chiny. 146.6 “Balebe, sikila siina ne mulikho mukhola kamakhuwa kano? Efwe khuli babaandu busa bulayi bwene nga enywe! Khuli ano khumureerera Elomo Endayi, khumuboolela enywe murure khu biindu bikhamuyeeta tawe, muche khu Wele omenyile mindali owabuumba likulu, sibala, enyanja nende bioosi bilimo. 16Khaale Wele alekha babaandu boosi bakhole nga ne benya. 17Kakhaba kario, buli lwoosi Wele aananga buloli bubwekesia buli aliio, khubirira mu biindu bilayi nibio akholanga. Amureereranga efula khukhwama mungaaki ne khumuelesia bibiaalwa mu siise silayi. Lundi amuelesianga biakhulia ne busangaafu mu miooyo kienywe.” 18Ne akhaba ne baloma bario, bwaba bulume khu khiingilila babaandu abo balekhe khubarusilia embosio.

19Nio Bayaudi balala becha khukhwama e Andioka mu Pisitia ne Ikoni, bafukiilisiana ne babaandu abo, baapa Paulo kamabaale, bakela bali afwiile nio bamukhuruura bamurusia enje we lukoba. 20Ne nga basuubili ne babuusiana bamubotookhelela niio aaba, enyokha mala akobola mu lukoba. Endaalo yaloondakho niye ne Baranaba bacha e Teribe.

Paulo ne Baranaba bakobola e Andioka mu Siria

21Paulo ne Baranaba belwacha Elomo Endayi mu Teribe banyoola babeeka bakali. Nio bakobola e Lisitura ne Ikoni, lundi boola e Andioka mu Pisitia. 22Batinyilisia basuubili ne khubachuuba bachiililile mu lisuubila. Bababoolela bali, “Khukhwola khubirire mu butinyu bukali nio khwingile mu bwami bwa Wele.” 23Buli mu kanisa barobora babemeelesi, ne khubirira mu lisaba ne khukhweyima khulia, babara ebweeni wo Mwami, niye basuubila.

24Nga ne bamala bario, babirira mu ngoongo cha Pisitia, boola e Pamufilia. 25Nga bamala khukhwilwacha elomo mu Perika ne mala bacha Atalia, 26ne khukhwama ebweeneyo bakobolela mu liaro e Andioka, abuundu yaba niio babara aasi we kumwalaalo kwa Wele khulwe kimilimo nikio yaba batabusiisie.

27Nga ne boola e Andioka, babuusia alala babaandu be kanisa ne khubaboolela koosi niko Wele aaba ne abarumikhiire khukhola, lundi nga aaba ne ekuule engila khu Be Chikholo khusuubila. 28Nio bamenyayo siise sileeyi ne basuubili.

Currently Selected:

Bikh. 14: LUBUKUSU

Highlight

Copy