Bikh. 16

Timoteo acha ne Paulo ne Sila

1Paulo achiililila ola e Teribe ne Lisitura, niio omukristo niye balanga bali Timoteo amenya. Maawe aaba omuyaudi mala yesi aaba omukristo, ne raraawe aaba Omukiriki. 2Basuubili boosi mu Lisitura ne mu Ikoni balomaloma bulayi bwa Timoteo. 3Paulo enya khubukula Timoteo ache ne naye, khwako amukheba. Akhola ario sikila Bayaudi boosi ba bamenya mu sibala esio bamanya bali raraawe owa Timoteo aba Omukiriki. 4Nga ne baba ne babira mu ngoba echo, baelesia basuubili kamalaka niko barumwa ne babemeelesi be kanisa mu Yerusalemu babisia, ne khubaboolela bakarie. 5Nio chikanisa chatinyilisibwa mu lisuubila ne khukucha buli endaalo.

Paulo aba ne kamalola mu Turoa

6Babirira mu ngoongo cha Firikia ne Kalatia, sikila Roho Omutakatifu se abafukiilila khukhwilwacha mu lukoongo lwa Esia tawe. 7Nga ne boola khulwakha lwa Misia, bakhaka khukhwingila mu sibala sia Bisinia, ne kakhali Roho owa Yesu se abafukiilila tawe. 8Khwako, babirira mu Misia, bachiililila boola e Turoa. 9Oli musilo Paulo aba ne kamalola, abona omundu mulala owa Masedonia emile alikho amuboolela ali, “Yambukha wiche e Masedonia okhuyeete!” 10Nga Paulo amala khubona kamalola kano, khwerekekha khucha Masedonia, sikila khwamanya khuli Wele akhulangile khucha khukhwilwacha Elomo Endayi khu baandu abo.

Likaluukhana lia Litia mu Filipi

11Khukhwama Turoa, khwambukhila mu meeli khwola e Samotirake, oli bwasia lundi khwola e Neapoli. 12Khukhwama ao, khwacha khwola mu sibala sia Filipi, lukoba luboofu mu lukoongo lwa Masedonia mala luli mu bwami bwe Barumi. Khwamenya mu lukoba olwo chindaalo ndiiti chiri. 13Endaalo eye Sabato khwarura enje we lukoba, khwacha aluuchi niio khwebaasia khuli manya Bayaudi basabilangao. Khwekhala aasi khwalomaloma khu bakhasi ba baaba ne bebuusiisieyo. 14Khu bakhasi ba bakhurekeeresia ne khulomaloma, abakho mulala owaria Wele, lisina liewe bali Litia, amenyanga mu lukoba lwa Siatira. Aakusianga chingubo chifwaana buseemwa. Omwami ekula kumwoyo kwewe aulila kamakhuwa niko Paulo alomanga. 15Niye ne be nju bewe ne bamalile khubatiisibwa, akhulaanga ewewe ne aloma ali, “Mwaaba ng'ali ne muboone muli ese nasuubiile Omwami, yiicha mwikhale munju mwase.” Khwako akhwikoonjelela khuche naye.

Paulo Mu siboe e Filipi

16Endaalo ndala, yaba khulikho khucha abuundu e khuusaba, khwakaanana omukhaana mulala nasioobi owaba ne kumusaambwa kwe bulakusi. Omukhaana yuno mu bulakusi bwewe areereranga bakhoongo bewe chirupia chingali. 17Omukhaana yuno aloonda khu Paulo ne nafwe, ne akukuula ali, “Babaandu bano bali bakholi ba Wele owe Angaaki Lukali, balikho bamuboolela engila eye buonia.” 18Achiililila khukhola ario khu ndaalo chingali. Ekhumaliilikha Paulo abiililwa mala amurafwira, ne khuboolela sisieeno esio ali, “Mu lisina lia Yesu Kristo, khurafwira omururemo!” Ao ne nao sisieeno siarura mu mukhana oyo. 19Bakhoongo bo mukhaana oyo nga ne babona bali lilieyikina liabwe lie khunyoola kimiaandu liawele, baamba Paulo ne Sila, ba bakhurura babaila khu soko ebweeni we babemeelesi. 20Babareera ebwami we Barumi baloma bali, “Babaandu bano Bayaudi nibo ne kakhali balakoyanianga lukoba lwefwe. 21Bekisia kimiima kikhafukiilisania ne lilaka liefwe nga Baruumi tawe, lundi efwe se khukhoyela khukikhola tawe.” 22Babaandu baambaana nabo, baapa Paulo ne Sila.

Bakhalaki babafula chingubo ne kamaani mala baboula kimikhomwa. 23Oli bamala khuboula babekaliilila mu siboe, mala banamae be mu siboe baboolelwa khubaliinda lukali. 24Khuloondekhana ne kamalaka niko omunamae oyo aebwa, abara munju eye mukari lukali eye baboe ne khubaboa bikele khu bisiindi bisiro.

25Oli embi mu silo akari, Paulo ne Sila baba ne basaba ne khukhwimba kimienya kifumia Wele, baboe babaandi baba barekeeresie. 26Siise esio, sibala siarakikha khuterema lukali, enju eye baboe yaterema. Ao ne nao kimiliango kioosi kiekukha, ne kiminyololo kikiaboa buli mundu kiakangulukha. 27Omunamae oliindanga baboe enyokha abona ali kimiliango kie siboe kiekuukhe, ebaasia ali fwaana baboe boosi belukhe, nio arusia embalu yewe mala enya khukhweyira. 28Nio Paulo alaanga ne kumumilo kwe angaaki ali, “Okheyira tawe, efwe fweesi khuli muno.”

29Omunamae oyo alaanga bareere etaa, mala atima eengila mukari, akwa mu bikele bia Paulo ne Sila nareenga. 30Nio abarusia enje abareeba ali, “Khola ndiena nio mbonisibwe?” 31Bamukobosia bali, “Khosuubile mu Mwami Yesu mala olaonisibwa alala ne be nju yowo boosi.” 32Nio bamwilwachila elomo eyo Mwami, niye ne be nju yewe boosi. 33Omunamae chana oyo ababukula mu saa eyo abasiinga kamakoonjo kabwe, ne abwene ne abwene, niye omwene nende be nju yewe boosi baabatiisibwa. 34Nio abukula Paulo ne Sila abaila ewewe, abaelesia siakhulia. Niye ne be nju yewe boosi bakhola naikara bekhoya sikila siise sino abele basuubile Wele.

35Nga ne bwasia, Barumi be bunyali baruma banamae babwe khu muliindi we siboe oyo bali, “Lekhuula babaandu abo bache.”

36Nio omunamae wenju eye baboe aboolela Paulo ali, “Bakhulu barumire lilaka bali ewe ne Sila mulekhuulwe. Luno munyala mwarura mala mwacha engo mu muleembe.”

37Ne kakhali Paulo aboolela bakhulu be banamae ali, “Efwe khuli Baruumi, mala baakhuupile bariena ebweeni we babaandu ne khukhura mu siboe ne bakhakhuyaalile tawe? Luno bebaasia bali banyala bakhuulekhuula mu bwikisi! Se kali kario tawe. Babeene khukhwola beche ano bakhuulekhule.”

38Nio banamae bacha baboolela bakhulu be Barumi koosi, ne nga baulila bali Paulo ne Sila bali be mu bwami bwe Baruumi, baaba ne buuri. 39Kakila bacha ba basaba sibelwa, mala babarusia mu siboe ne khubekoonjelela barure mu lukoba olwo. 40Paulo ne Sila bacha munju eya Litia. Mu mwenemwo bakaananilamo ne basuubili, bababoolela kamakhuwa ke khubachuuba mala nibo bacha.

Currently Selected:

Bikh. 16: LUBUKUSU

Highlight

Copy