MARIKO 3

Yesu ahonia omundu owomukhono kwafwokoya

(Mat. 12:9-14; Luka 6:6-11)

1Mana Yesu khandi niyenjila musinagogi. Ne omundu yalimwo owomukhono kwafwokoya. 2Abandu baliho nibamuhenjelesinjia okhulola naba namuhonia khunyanga eya Isabato, kho mbu bamwinjilile itookho. 3Yesu nalanga owomukhono kwafwokoya oyo namuboolela ari, “Yitsa hano.” 4Mana nareeba abandu ari, “Nomusilo okhukhola amalayi khunyanga eya Isabato noho okhukhola amabi? Okhuhonia obulamu noho okhwira?” Nabo nibaholela butswa tsi.

5Kho olwa Yesu yabahenga yasinyikha khulwa obumilanu bwemioyo chiabwe! Nababeelelela, mana naboolela owomukhono kwafwokoya oyo ari, “Nyiila omukhonokwo kukololoshe.” Kho owomukhono kwafokoya oyo nakunyiila, nakwo nikukololokha nikukalukha habwene. 6Mana Abafarisayo nibarula musinagogi nibakhung'ana lwangu nende abomukanda kwa Herode, nibaloosia shinga olwa banyala okhwira Yesu.

Omukanda kwabandu khuluchinga lweinyanza

7Kho Yesu nende abeechibe nibarulaho nibatsia khunyanza ya Galilaya. Mana omukanda omukhongo kwabandu nikumulondakhwo. Abandu bano barula Galilaya, Yuda, 8Yerusalemu nende mutsingongo tsia Idumea. Abandi barula injelekha womwalo kwa Yorodani, tsigongo tsia Tiro nende Sidoni. Betsa boosi khu Yesu olwa bahulila aka yali nakholanga. 9#Mrk. 4:1; Luka 5:1-3Omukanda okwo, kwali omukhongo muno. Mana Yesu naboolela abeechibe bamurecheshele eliaro yenjilemwo kho mbu abandu baleshe okhumutuya. 10Shichila yali nahoniiye abandu abanji, ne abalwale boosi bafindikana nibasita nibenya okhumutiilakhwo. 11Nabo abali nebishieno olwa bamulolangakhwo butswa, bakwitsanga hasi mumakuluke nibayula nomwoyo omukhongo nibaboola bari, “Oli Omwana wa Nyasaye!” 12Naye nahalabila ebishieno ebio obutinyu mbu, bileshe okhuchila amanyishe.

Yesu yaahula abarume ekhumi nababili

(Mat. 10:1-4; Luka 6:12-16)

13Mana Yesu nanina khushikulu, ne nalanga abo aba yachama okhwaahula, mbu betse khuye. Nabo nibatsia ewa yali. 14Kho niyaahula abandu ekhumi nababili, nabalanga abarumwa, mbu babe ninaye khandi abarume okhutsia okhuyaala, 15khandi nabahelesia obunyali bwokhurusia ebishieno.

16Ekhumi nababili abayaahula mbabano mbu, Simoni (owa Yesu yakulikha Petero), 17Yakobo wa Zebedayo nende omwana wabwe Yohana, (aba Yesu yalaha mbu, “Boanerige, eshisina mbu, Abatulukhanga shinga likulu”), 18Andereya, Filipo, Batsolomayo, Matayo, Tomasi, Yakobo wa Alufayo, Tsadayo, Simoni omukanani, 19nende Yuda Isikarioti, owakhoba Yesu.

Yesu nende Belizebuli

(Mat. 12:22-32; Luka 11:14-23; 12:10)

20Mana Yesu natsia ingo. Ne omukanda omukhongo kwabandu nikukhung'anilayo khandi, mbu kata ye nende abaloondibe shibanyoolakhwo ebise biokhulia eshiokhulia tawe. 21Olwa abeinzu yabwe bahulila akabandu bali nibaboolanga, batsia okhumubukula shichila bali nibaboolanga mbu “ulaluushe.”

22 # Mat. 9:34; 10:25 Ne balala khubahandichi bamalako bali nibetsile okhurula Yerusalemu, baboola bari, “Eshishieno Belizebuli shimwinjilemwo! Khandi yekhoonyelanga obunyali bwomukhongo webishieno okhurusia ebishieno.”

23Kho Yesu nabalanga okhwitsa aha yali, nabareeba mutsinjelo ari, “Setani yakhanyala arie okhulonda Setani washie? 24Lihanga niliakhakabukhana mumikanda echilwana echiene khuchiene, lihanga elo shilinyala okhuralila tawe. 25Kata abomunzu ndala nibakhahukhana mumikanda echilwana echiene khuchiene, abeinzu eyo balasikha. 26Kho oburuchi bwa Setani nibuba nibukabukhana mumikanda, echilwana echiene khuchiene shibwakhatsiililila tawe, nebutswa buba bulasikha.

27“Abulaho ounyala okhwinjila munzu yomundu wamaani mana ayaaye emianduchie, nalaranjiliile okhuboha omundu wamaani oyo. Ne namuboyile nilwo olwa anyala okhuyaaya inzuye eyo. 28Toto mwene emuboolela mbu, abandu balaleshelungwa obwonooni bwabwe bwosi kata amanyeko kabanyeka Nyasaye, 29#Luka 12:10nebutswa, ounyeka Roho Omutakatifu shialaleshelwa obwonoonibwe kata nahatuutu tawe. Okhuba akholile obwonooni bweshilaamo shieinziayo.” 30(Yesu yaboola ako shichila abandu bandi bali nibaboolanga bari, “Ali neshishieno.”)

Nyinamwana Yesu nende abasiani babwe Yesu

(Mat. 12:46-50; Luka 8:19-21)

31Nyinamwana Yesu nende abasiani babwe betsa nibasinjila elwanyi nibarumana mbu, Yesu yetse. 32Ne omukanda kwabandu kwali nikwikhale nikumubotokhane, nibamuboolela bari, “Mamawo nende abasiani benywe bali elwanyi benyanga okhukhulola.” 33Yesu nabakalusia nabareeba ari, “Mama wanje niwina? Ne abasiani befwe nibabo wina?” 34Nahenga eyi nende eyi khubandu abali nibekhale nibamubotokhane naboola ari, “Mama wanje nende abasiani befwe mbabano! 35Omundu yesi yesi oukholanga aka Nyasaye yenya, omwenoyo niye omusiani wefwe, omukhaana wefwe, khandi mama wanje.”

Currently Selected:

MARIKO 3: OLUPR

Highlight

Copy