MARIKO 2
2
Yesu ahonia omundu owafwokoya
(Mat. 9:1-8; Luka 5:17-26)
1Ne olwa tsinyanga tsindiiti tsiali nitsihwele, Yesu yachelela mwitookho lia Kaperinaumu, mana nikamanyikha mbu achelele ingo. 2Mana abandu abanji nibakhung'anilaho halala, kho mbu obwiyangu shibwalikhwoho kata hamuliango honyene tawe. Naye Yesu yali nabayaalilanga likhuwa lia Nyasaye. 3Abandu bane betsa nibachinjile omundu owafwokoya khushitali nibamureera aha Yesu yali. 4Ne shichila abandu bali nibahachile mumuliango, bakhaywa shinga olwa bamubisia mbu yoole aha Yesu yali. Kho nibaniina khushilama shieinzu, nibashilisambula mana nibenjisiliaho owafwokoya oyo okhuula aha Yesu yali. 5Ne olwa Yesu yalola obusuubili bwabwe, yaboolela owafwokoya oyo ari, “Mwana wanje, olesheelwe obwonoonibwo.” 6Abahandichi bamalako bandi bali nibekhalemwo, nibakanakania mumioyo chiabwe bari, 7“Omundu uno aboolanga ario mbushiina? Khuno shinokhunyeka Nyasaye? Owakhanyala okhuleshela abandu obwonooni niwiina, nalali Nyasaye yenyene?”
8Mana habwene nahabwene Yesu namanya mumwoyokwe aka bali nibayililisinjia mumioyo chiabwe, yabareeba ari, “Mukanakaninjia murio mumioyo chienywe mbushiina? 9Eliangu nelilena? Okhuboolela owafwokoya mbu, ‘Olesheelwe obwonoonibwo,’ noho okhumuboolela mbu, ‘Buukha, obukule eshitalishio mana ochende?’ 10Ne ndalamumanyia inywe mbu, Omwana womundu ali nobunyali khushialo okhuleshela obwonooni.” Khulweshio, yaboolela owafwokoya oyo ari, 11“Ekhuboolela mbu, buukha, obukule eshitalishio, otsie ingo!”
12Mana owafwokoya nabuukha nabukula eshitalishie bwangu ne narula imbeli wabwe. Ne boosi nibahuchisibwa, nibaboola bari, “Khushili okhulolakhwo eshindu shinga shino tawe.” Mana nibetsoomia Nyasaye.
Yesu alanga Lawi okhuba omuloondiwe
(Mat. 9:9-13; Luka 5:27-32)
13Mana Yesu khandi narula natsia khuluchinga lweinyanza ya Galilaya. Omukanda omukhongo nikukhung'anila aha yali, naye nabeechesia. 14Ne olwa yali nabiranga, yalola Lawi, omusololi wobushuru owali omusiani wa Alufayo, niyekhaale aha basololelanga obushuru. Yesu naboolela Lawi ari, “Nondakhwo.” Naye Lawi nasinjila, namulondakhwo.
15Mana Yesu natsia munzu mwa Lawi, naheebwa eshiokhulia. Olwa yali nalitsanga, abasololi bobushuru nende abonooni abanji betsa nibekhala ninaye nende abeechibe okhulia eshiokhulia, okhuba abali nibamuloondangakhwo bali abanji. 16Ne olwa abahandichi aba Abafarisayo balola mbu, Yesu alitsanga nabonooni nende abasololi bobushuru, bareeba abeechibe bari, “Nishiina eshichila Yesu nalia nende abasololi bobushuru nende abonooni?”
17Ne olwa Yesu yahulilakhwo amakhuwa ako, yababoolela ari, “Abali abalamu shibakhabaanga omusilishi ta, habula abalwale nibo abakhabaanga omusilishi. Shindayetsa okhulanga abalunjishi ta, habula ndetsa okhulanga abonooni.”
Lireebo khukokhwiyima eshiokhulia
(Mat. 9:14-17; Luka 5:33-39)
18Ne bulano abeechi ba Yohana omubatiisi nende aba Abafarisayo bali nibeyimile eshiokhulia. Kho abandu nibetsa khu Yesu nibamureeba bari, “Mbushiina abeechi ba Yohana omubatiisi nende aba Abafarisayo nibeyimanga eshiokhulia, nabo abeechibo shibeyimangakhwo eshiokhulia tawe?”
19Mana Yesu nakalusia nabareeba ari, “Abacheni beshiselelo bakheyima barie eshiokhulia, lwomwene eshiselelo aba nashili ninabo? Oluhoono lwomwene eshiselelo ashili ninabo, shibanyala okhwiyima eshiokhulia tawe. 20Nebutswa tsinyanga tsitsanga lwomwene shiselelo aliyinibwaho okhurula khubo. Inyanga yaliyinibwaho eyo, niyo eya baliiyima eshiokhulia.
21“Abulaho ounabanga eshilaka shieingubo imbia, khungubo ikhulu tawe. Shichila eshilaka shieingubo imbia shilekhuuna mana shimeete okhurandula ingubo ikhulu eyo. 22Khandi abulaho outsukhanga idivai indoro mumifuko chiamaseelo emikhulu tawe. Okhuba idivai indoro yakharulaka emifuko emikhulu echio, mana biosi nibisasikha. Habula idivai indoro yitsukhungwa mumifuko chiamaseelo amayiakha.”
Lireebo khukeinyanga eya Isabato
(Mat. 12:1-8; Luka 6:1-5)
23 #
Okhuk. 23:25
Khunyanga yindi eya Isabato, Yesu nabeechibe bali nibabiranga mumikunda chieingano. Nibali khuluchendo olwo, abeechibe bachaaka okhwamula ingano. 24Kho Abafarisayo nibareeba Yesu bari, “Lola, khulwa shiina abeechibo bakholanga akomusilo khunyanga eya Isabato?”
25Naye Yesu nabakalusia ari, “Shimwasomakhwo amakhuwa ka Daudi yakhola olwa ye nende aba yali ninabo bali inzala nibenyanga eshiabalia ta? 26#Abal. 24:9#1 Sam. 21:1-6Olwa Abiatsari yali omwisaaliisi omukhulundu, Daudi yenjila munzu ya Nyasaye, nalia emikaate echiali nichihaaniilwe Nyasaye. Ne kwali omusilo omundu yesi yesi okhuliakhwo emikaate echio okhurusiakhwo abesaaliisi bonyene. Khandi nahelesiakhwo aba yali ninabo.” 27Mana Yesu nababoolela ari, “Isabato yarebwaho khulwa omundu, shiali omundu owarebwaho khulwa Isabato tawe. 28Kho Omwana womundu nomwami kata khunyanga eya Isabato.”
Currently Selected:
MARIKO 2: OLUPR
Highlight
Share
Copy
Want to have your highlights saved across all your devices? Sign up or sign in
